Na «Papiarovaj fabrycy Dziaržznaka» vyjaŭlenyja surjoznyja prypiski

Kryminalnaja sprava stała vynikam dziejnaści Kamiteta dziaržaŭnaha kantrolu, jaki ŭ miežach supravadžeńnia «Dažynak» u kancy 2012 hoda praviaraŭ «na vašyvaść» pretendentaŭ na zvańnie najlepšych ahraryjaŭ krainy.

U vyniku pravierki sa śpisaŭ mahčymych pieramožcaŭ pa Minskaj vobłaści byli vyklučanyja šeść pretendentaŭ, u jakich vyjavilisia prypiski, što skažajuć realnuju karcinu ŭborki zbožžavych. Siarod vyklučanych sa śpisaŭ — AAT «Krutahor'je-Pietkavičy», AAT «Kastryčnickaja revalucyja», PSUP «Dukora-Ahra», AAT «Rečań» i ASP UP «Papiarovaja fabryka Dziaržznaka», filijał «Niŭki». U niejkaj haspadarcy była štučna zanižanaja płošča ŭborki, što dazvalała pavysić uradžajnaść, dzieści zavysili vałavy zbor zbožžavych. Vyniki pravierki KDK dali nahodu dla taho, kab pravaachoŭnyja orhany bolš uvažliva pryhledzielisia da dziejnaści nazvanych sielhaspradpryjemstvaŭ i ludziej, jakija imi kirujuć. Jak vyjaviłasia, nie daremna.

Pretenzii da UP «Papiarovaja fabryka Dziaržznaka» datyčać dziejnaści jaho adasoblenaha strukturnaha padraździaleńnia «Niŭki», jakim i kiruje namieśnik hienieralnaha dyrektara UP «Papiarovaja fabryka Dziaržznaka» pa sielskaj haspadarcy.

Pavodle papiarednich dadzienych Śledčaha kamiteta, namieśnik dyrektara, kab stvaryć bačnaść efiektyŭnaj raboty i kab paźbiehnuć dyscyplinarnaj i materyjalnaj adkaznaści za nievykanańnie pakazčykaŭ sacyjalna-ekanamičnaha raźvićcia sielhaspradpryjemstva, unios u dziaržaŭnuju statystyčnuju spravazdačnaść zahadzia iłžyvyja źviestki ab prybaŭleńni ŭ vazie i pryroście maładniaku bujnoj rahataj žyvioły ŭ ASP UP «Papiarovaja fabryka Dziaržznaka», filijał «Niŭki». Dadzieny fakt daŭ pravaachoŭnikam padstavu dla zaviadzieńnia kryminalnaj spravy pa č.2 art. 427 Kryminalnaha kodeksa Biełarusi (słužbovy padłoh, ździejśnieny z metaj skažeńnia dadzienych dziaržaŭnaj statystyčnaj spravazdačnaści). Sankcyja hetaha artykuła, darečy, praduhledžvaje pakarańnie da troch hadoŭ pazbaŭleńnia voli z pazbaŭleńniem prava zajmać adpaviednyja pasady.

Zrešty, rasśledavańnie tolki pačałosia. Ciapier viadziecca pravierka finansava-haspadarčaj dziejnaści pradpryjemstva. Kali vyśvietlicca, što, vykarystoŭvajučy prypiski, słužbovyja asoby atrymlivali i premii za vykanańnie pakazčykaŭ sacyjalna-ekanamičnaha raźvićcia, sprava moža pryniać jašče bolš surjozny abarot i stać padstavaj dla zaviadzieńnia novych kryminalnych spravaŭ.

Varta adznačyć, što apošnim časam u sielhaspradpryjemstvach Biełarusi prypiski stali asabliva papularnymi. U siarednim štomiesiac pa krainie zavodzicca 2–3 kryminalnyja spravy, źviazanyja mienavita z prypiskami. Samymi papularnymi matyvami dla skažeńnia dziaržaŭnaj statystyčnaj spravazdačnaści stali pieramoha na «Dažynkach» i atrymańnie premijalnych vypłat za vykanańnie pakazčykaŭ sacyjalna-ekanamičnaha raźvićcia. Čaściej za ŭsio prypiski vyjaŭlajucca ŭ vałavym zbory zbožža ci ŭ jaho ŭradžajnaści, a taksama ŭ prybaŭleńni pahałoŭja žyvioły.

• 0
• 0
• 0
• 0
• 0
• 0
• 0
• 0