U sieradu ŭ «Falvarku «Stary Miensk» adbyłasia prezentacyja №6 časopisu «rARTisan».
Tema numaru – biełaruskaja vioska. Siarod aŭtaraŭ – filozafy Valancin Akudovič i Ihar Babkoŭ, mastactvaznaŭcy Siarhiej Chareŭski dy Taciana Biembiel, kulturolah Maksim Žbankoŭ, publicyst Sieviaryn Kviatkoŭski.
Andrej Kudzinienka zrabiŭ vandroŭku pa biełaruskim kino – praz mohiłki, a Maryja Martysievič skłała «Paleskuju chroniku».
Artur Klinaŭ – hałoŭny redaktar časopisu «rARTisan» padkreśliŭ, što adnoj z zadačaŭ časopisu – razabracca z usimi biełaruskimi balučymi kropkami, temami j kompleksami. A biełaruskaja vioska – adna ź «viečnych» temaŭ biełaruskaj kultury.
Hetaja tema nie zastałasia na staronkach časopisu, a vyklikała idejnyja sprečki j na prezentacyi. Ihar Babkoŭ zajaviŭ, što vioska, jakuju apiavali našyja adradžency – jość mitam haradzkich intelektuałaŭ. A sapraŭdnaja vioska ŭ 1994 h. pryjšła j zachapiła horad – i jana abyjakavaja da haradzkich maraŭ i snoŭ.
Ź Iharam Babkovym nie pahadziŭsia Adam Hlobus. Horad zachapiła nia vioska, a kałhas i toje, što my siońnia majem – jość «kałhasny hlamur». A ŭ sučasnaj vioscy adbyvajucca dziŭnyja rečy. Novyja bahatyja budujuć na vioscy trochpaviarchovyja damy.
Siarhiej Chareŭski padsumavaŭ, što tradycyjnaja vioska razburanaja, ale j viaskoŭcy, jakija pryjechali ŭ harady – nie prynieśli ŭ horad narodnaj kultury j nie stvaryli svaju haradzkuju.
Artur Klinaŭ raspavioŭ pra dalejšyja «partyzanskija» plany. Časopis budzie vychodzić štokvartalna, nastupny numar budzie pryśviečany chryścijanstvu, pazanastupny – łuzerstvu. Klinaŭ vykazaŭ nadzieju, što «rARTisan» pieraraście ŭ sietku časopisaŭ: «rARTisan»-muzyka, «rARTisan»-kino, «rARTisan»-žyćcio – pra śvieckija padziei.
Kab atrymać almanach sučasnaj biełaruskaj kultury, možna źviazacca z vydaŭcami praz elektronnuju adresu [email protected], [email protected] ci praz telefon: +029 6534838 (Artur Klinaŭ), +029 6198053 (Ala Sidarovič)