На прэзэнтацыі «рARTisan»у адбылася ідэйная спрэчка: Адам Глёбус не пагадзіўся зь Ігарам Бабковым, а Артур Клінаў распавёў пра «партызанскія» пляны.
У сераду ў «Фальварку «Стары Менск» адбылася прэзэнтацыя №6 часопісу «рARTisan».
Тэма нумару – беларуская вёска. Сярод аўтараў – філёзафы Валянцін Акудовіч і Ігар Бабкоў, мастацтвазнаўцы Сяргей Харэўскі ды Тацяна Бембель, культуроляг Максім Жбанкоў, публіцыст Севярын Квяткоўскі.
Андрэй Кудзіненка зрабіў вандроўку па беларускім кіно – праз могілкі, а Марыя Мартысевіч склала «Палескую хроніку».
Артур Клінаў – галоўны рэдактар часопісу «рARTisan» падкрэсьліў, што адной з задачаў часопісу – разабрацца з усімі беларускімі балючымі кропкамі, тэмамі й комплексамі. А беларуская вёска – адна зь «вечных» тэмаў беларускай культуры.
Гэтая тэма не засталася на старонках часопісу, а выклікала ідэйныя спрэчкі й на прэзэнтацыі. Ігар Бабкоў заявіў, што вёска, якую апявалі нашыя адраджэнцы – ёсьць мітам гарадзкіх інтэлектуалаў. А сапраўдная вёска ў 1994 г. прыйшла й захапіла горад – і яна абыякавая да гарадзкіх мараў і сноў.
Зь Ігарам Бабковым не пагадзіўся Адам Глёбус. Горад захапіла ня вёска, а калгас і тое, што мы сёньня маем – ёсьць «калгасны глямур». А ў сучаснай вёсцы адбываюцца дзіўныя рэчы. Новыя багатыя будуюць на вёсцы трохпавярховыя дамы.
Сяргей Харэўскі падсумаваў, што традыцыйная вёска разбураная, але й вяскоўцы, якія прыехалі ў гарады – не прынесьлі ў горад народнай культуры й не стварылі сваю гарадзкую.
Артур Клінаў распавёў пра далейшыя «партызанскія» пляны. Часопіс будзе выходзіць штоквартальна, наступны нумар будзе прысьвечаны хрысьціянству, пазанаступны – лузэрству. Клінаў выказаў надзею, што «рARTisan» перарасьце ў сетку часопісаў: «рARTisan»-музыка, «рARTisan»-кіно, «рARTisan»-жыцьцё – пра сьвецкія падзеі.
Каб атрымаць альманах сучаснай беларускай культуры, можна зьвязацца з выдаўцамі праз электронную адрэсу [email protected], [email protected] ці праз тэлефон: +029 6534838 (Артур Клінаў), +029 6198053 (Аля Сідаровіч)
Каментары