«Džazavyja suboty kala ratušy» — sieryja kancertaŭ na płoščy Svabody ŭ Minsku projdzie ŭ červieni

Dziesiać kalektyvaŭ i vykanaŭcaŭ z krain Jeŭropy i ZŠA vystupiać u ramkach novaha prajekta «Džazavyja suboty kala ratušy». Kancerty adbuducca 8, 15, 29 červienia pad adkrytym niebam na płoščy Svabody ŭ stalicy. Ab hetym 4 červienia na pres-kanfierencyi ŭ Minsku paviedamiła dyrektar kancertnaha ahienctva «Ekvilibryum ARTS» Inha Buchvałava.

Arhanizatarami prajekta stali Mižnarodny sacyjalna-ekanamičny fond «Ideja», ahienctva «Ekvilibryum ARTS» i Minharvykankam. Hienieralnymi partniorami mierapryjemstvaŭ prajekta vystupili AAT «Bank BiełZEB» i aŭtacentr Kia «Atłant-M Baravaja».

Pavodle słoŭ Buchvałavaj, u prahramie prajekta pradstaŭleny «sučasny jeŭrapiejski džaz, jakim žyvie ŭsia Jeŭropa, tradycyjny amierykanski džaz i małady, ale ŭsim znajomy biełaruski džaz».

Prajekt adkryjecca 8 červienia vystupleńniem zorki novaj džazavaj chvali Šendy Ruł (ZŠA) u supravadžeńni biełaruskaha kalektyvu Apple Tea. Paśla słuchačy pačujuć niezvyčajnuju sumieś džaza, avant-roka i tanha ŭ vykanańni maładoha trya Exultet (Francyja), a zaviaršyć pieršy viečar ukrainski hurt Pur:Pur, jaki ihraje indzi-rok z elemientami džaza.

Druhaja subota prajekta, 15 červienia, pačniecca z hukaŭ truby 74-hadovaha Edzi Chiendersana (ZŠA), pieršy ŭrok jakomu davaŭ lehiendarny Łui Armstranh. Viečar pradoŭžyć niamieckaje trya Three Fall, jakoje vykonvaje sumieś chip-chopa i džaza, a paśla — biełaruskaja džaz-banda Lipnitsky Show Orchestra.

Zaviaršalny kancert prajekta 29 červienia paraduje vystupleńniem hurtu adnaho ź lepšych estonskich akardeanistaŭ Jaka Łutsoji. Budzie pradstaŭlena muzyka roznych kirunkaŭ — ad džaza da tradycyjnych indyjskich matyvaŭ. Paśla na scenu vyjduć italjanskija muzykanty Kieka Farnareli i Rabierta Čerylja. Prajekt zavieršyć vystupleńnie biełaruskaha džazavaha trya Kanstancina Haračaha.

Dyrektar pa karparatyŭnaj sacyjalnaj adkaznaści fondu «Ideja» Viktar Radźkoŭ na pres-kanfierencyi adznačyŭ, što, chacia ŭ prajekcie zapłanavany kancerty na praciahu tolki troch subot červienia, «heta tolki pačatak». «My ŭsie dajem pačatak tym mierapryjemstvam, jakija mohuć naradzicca ŭžo paśla nas, — skazaŭ jon. — Ja ŭpeŭnieny, što ŭpraŭleńnie kultury navat nie z nami, a inšymi partniorami zmoža realizoŭvać takija prajekty, da prykładu, nie tolki džaz, ale i fołk, bluz i navat rok-fiestyvali».

Arhanizatary i partniory džazavaha prajekta vykazali nadzieju, što jon stanie tradycyjnym i budzie pravodzicca sistematyčna.

• 0
• 0
• 0
• 0
• 0
• 0