Ekśpiert pra źniknieńnie amierykanskich vajskoŭcaŭ u Litvie: Jość try viersii
Aficer zapasu i ekśpiert u śfiery abarony Darus Antanajcis u intervju telekanału LNK raspavioŭ pra asablivaści palihona i mahčymyja pryčyny trahiedyi, piša Delfi.lt.
«Padbrodski palihon — heta centralny palihon litoŭskaj armii, samy vialiki, tut pravodzicca bolš za ŭsio vučeńniaŭ. Heta vialikaja terytoryja, padzielenaja na mienšyja ŭčastki, dzie prachodziać treniroŭki. Asnoŭnaje pole — dla stralby, bolš za 10 hiektaraŭ adkrytaj miascovaści, dzie možna stralać z roznaj zbroi. Vakoł šmat lasoŭ, uzhorkaŭ, jość bałoty, rečki, aziorcy. Miascovaść vielmi raznastajnaja. Jość navat zona dla «boju ŭ horadzie» — zbudavany nievialiki nasieleny punkt», — raskazaŭ Antanajcis.
«Zaŭsiody možna vybrać adpaviedny ŭčastak dla vučeńniaŭ. Toje miesca, dzie źnikła broniemašyna — bałota», — padkreśliŭ jon.
Razmova idzie pra husieničnuju braniavanuju ramontna-evakuacyjnuju mašynu, pryznačanuju dla evakuacyi ciažkaj techniki z pola boju. Mašyna pabudavana na bazie staroha tanka M60, ź jakoha źniali viežu i ŭstalavali labiodku dy inšaje abstalavańnie. U kuzavie, jaki taksama braniavany, mohuć źmiaścicca 3—4 čałavieki.
Antanajcis adznačyŭ, što dakładna nie viedaje, što adbyłosia, ale prapanavaŭ try mahčymyja viersii:
- Vajskoŭcy patanuli razam z mašynaj.
- Jany vybralisia z mašyny, ale patanuli z-za broniekamizelek, botaŭ i, mahčyma, zbroi.
- Napałochanyja vajskoŭcy dabralisia da bieraha i ciapier chavajucca.
Taksama ekśpiert padkreśliŭ, što ruch na palihonie adbyvajecca pa stroha ŭstanoŭlenych praviłach:
«Nielha prosta tak źjazdžać z darohi — heta i praviły achovy pryrody, i techničnyja patrabavańni. Nie ŭsie darohi vytrymlivajuć takuju ciažkuju techniku. Naŭrad ci ich metaj było zajechać u bałota. Nichto nie moh addać zahad jechać prosta tudy».
Jon adznačyŭ, što ŭ takich vypadkach zaŭsiody važnaja papiaredniaja raźviedka miascovaści:
«My ŭžo bačyli z karotkich videa z Ukrainy, što technika časam hruźnie. Heta značyć, što nie była praviedziena raźviedka, nie acanili ŭmovy, pasłali techniku tudy, dzie jana nie prajedzie. A heta niedapuščalna — nielha pasyłać sałdat tudy, dzie jany nie tolki nie prajeduć, ale i mohuć zahinuć».
Na zakančeńnie Antanajcis adznačyŭ, što hetaj historyjaj «vidavočna skarystajecca rasijskaja prapahanda».
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A praź dźvie hadziny mianie źbili». Ukrainski žurnalist dva hady pravioŭ u rasijskim pałonie — voś što jon pieražyŭ1
Kamientary