Nichto nie idealny. Nie važna, čyja była vina, ale ty z harački nahavaryła lubimamu čałavieku mnostva niepryjemnych rečaŭ, dy i jon nie maŭčaŭ. Ale minuŭ čas, ty astyła i zaraz nie viedaješ, jak padyści da kachanaha čałavieka i prapanavać mir.
Prysłuchajsia da parady Elizabet Tejłar, jakaja kazała: «Vypi kryšačku, napamadź vusny i źbiarysia!». Źbiarysia i prapanuj svajmu mužčynu mir.
1. Skažy heta adnym skazam. My možam svarycca za drabnicu: za hrošy, za toje, chto siońnia myje posud ci što hladzieć pa televizary. Ale heta ŭsio tolki viarchoŭka ajśbierha. Na samaj spravie pryčynaj svarki stanoviacca inšyja, značna bolš hłybokija emocyi. My možam inicyjavać svarku z-za niaŭpeŭnienaści ŭ sabie, tamu što my adčuvajem siabie niavartymi svajho partniora.
Časam svarka stanovicca prajavaj našaha strachu być pakinutym. Jašče my časta svarymsia, bo adčuvajem, što prykładajem značna bolš namahańniaŭ dla padtrymańnia adnosin, čym naš partnior.
Važna ŭśviadomić, što mienavita ciabie turbuje, i skazać pra heta. Budź karotkaj. Skažy, naprykład: «Mnie strašna, kali ty prapaŭ na ŭvieś viečar i nie telefanavaŭ, bo ja bajusia, što ty ź inšaj žančynaj». Abo: «Ja nie adčuvaju, što maja praca pa chacie naležnym čynam šanujecca». Tvaja zadača nie abvinavacić, a rastłumačyć, jakija tvaje pieražyvańni vyklikali svarku.
2. Napišy jamu list. Časam vielmi ciažka padabrać patrebnyja słovy, jakija nie buduć atakavać tvajho mužčynu, a raskažuć pra tvaich emocyjach. Akramia taho, u vusnaj formie byvaje ciažka danieści svaju dumku da surazmoŭcy, bo jon nie hatovy ciabie słuchać. U takim vypadku napišy list.
Vyniesi na papieru ŭsio, što ty chočaš skazać. Pieračytaj. Praanalizuj intanacyju tekstu i vyrašy, ci adpaviadaje jana tvaim emocyjam, ci pieradaje naležnym čynam tvoj stan. Uniasi patrebnyja vypraŭleńni. I nie dasyłaj list elektronnaj poštaj! Razdrukuj jaho, a lepš — napišy ad ruki i pryniasi svajmu chłopcu. Chaj pračytaje ŭ tvajoj prysutnaści i skaža, što jon dumaje.
3. Zrabi padarunak sa značeńniem. Kali ty kupiš hatovuju reč, jon moža vyrašyć, što ty sprabuješ adkupicca. Tamu ŭkładzi ŭ padarunak namahańni i čas, a značyć — svajo serca, svaju luboŭ, svajo škadavańnie. Naprykład, namaluj paštoŭku. Abo z dapamohaj śpiecyjalnych farbaŭ i trafareta napišy na futbołcy «Prabač mnie!». Jon nie zmoža doŭha kryŭdzicca, kali ŭbačyć ciabie ŭ takim ubory.
4. Pryśviaci jamu čas. Kupi kvitki na kancert ci spartovaje mierapryjemstva, zaprasi jaho pakatacca na kartynhu ci navat skoknuć z parašutam. Padumaj, pra što tvoj lubimy maryć. Ździejśni jaho maru i pražyvi jaje razam ź im. Niachaj viedaje, što dziela jaho ty hatovaja na podźvih. Navat na kancert Rammstein.
5. Abdymi jaho. Kali duša nie lažyć ni da adnaho z vyšejpieraličanych sposabaŭ, pamiataj, što dotyk — lepšy sposab vykazać svaju luboŭ i ŭvahu. Usiaho 20-siekundnyja abdymki panižajuć ŭ kryvi ŭzrovień kartyzołu — harmonu stresu — i pavyšajuć ŭzrovień aksitacynu, jaki adkazvaje za pazityŭnyja emocyi. Abdymki ŭpłyvajuć na ŭčastki mozhu, adkaznyja za pačućcie davieru, a značyć tvoj partnior adrazu ž adčuje da ciabie prychilnaść. Samy čas prašaptać jamu na vucha: «Ja lublu ciabie».
Kamientary