Dla siamiejnych skandalistaŭ uvodzicca novaja prafiłaktyčnaja miera — achoŭnaje pradpisańnie
Im zabaronieniać kantakty z achviaraj, u tym liku pa telefonie, a taksama naviedvańnie achviary i vyśviatleńnie jaje miescaznachodžańnia.
U Biełarusi ŭvodzicca novy instrumient prafiłaktyčnaj pracy — vyniasieńnie hramadzianinu achoŭnaha pradpisańnia. Adpaviednaje pałažeńnie praduhledžana ŭ zakonaprajekcie «Ab asnovach dziejnaści pa prafiłaktycy pravaparušeńniaŭ», pryniatym deputatami Pałaty pradstaŭnikoŭ na pasiadžeńni 28 červienia.
Jak paviedamiŭ namieśnik hienieralnaha prakurora Alaksandr Łašyn, achoŭnaje pradpisańnie budzie prymianiacca «ŭ dačynieńni da asob, jakija ŭčynili šerah pravaparušeńniaŭ na hlebie siamiejnych skandałaŭ». Takim asobam buduć zabaronienyja znosiny z achviaraj, u tym liku pa telefonie, a taksama naviedvańnie achviary i vyśviatleńnie jaje miescaznachodžańnia. Vynosicca achoŭnaje pradpisańnie budzie na termin ad troch da tryccaci sutak.
Łašyn paviedamiŭ, što zakonaprajekt praduhledžvaje miery ahulnaj prafiłaktyki pravaparušeńniaŭ i miery indyvidualnaj prafiłaktyki pravaparušeńniaŭ. U miežach ahulnaj prafiłaktyki dakumientam praduhledžvajecca paradak raspracoŭki kompleksnych prahram pa prafiłaktycy pravaparušeńniaŭ miascovymi vykanaŭčymi i rasparadčymi orhanami. Hetyja rehijanalnyja prahramy pavinny zabiaśpiečvać praviadzieńnie mierapryjemstvaŭ, skiravanych na praduchileńnie nasilla ŭ siamji.
Zakonaprajekt taksama detalizuje praceduru praviadzieńnia prafiłaktyčnaj hutarki, praduhledžvaje abaviazkovy rehularny ŭdzieł hramadzian, jakija stajać na prafiłaktyčnym uliku, u hrupavych prafiłaktyčnych mierapryjemstvach.
Łašyn adznačyŭ, što zakonaprajekt zaklikany «prapahandavać pazityŭnyja žyćciovyja kaštoŭnaści, akazvać padtrymku asobam, jakija apynulisia ŭ niebiaśpiečnym sacyjalnym stanoviščy».
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary