Idyličny piejzaž minskaha holf-kłuba.
Pieršyja damy «Hrynviča» budujucca zusim pobač z palami.
Dyrektar «Holf-kłuba» Andrej Nikanionak.
Vakoł budoŭli staić vysokaja aharodža, rasstaŭlenyja niekalki kantrolna-prapusknych punktaŭ, na jakich achoŭniki z sabakami pierapisvajuć numary aŭto. Zajechać možna tolki tym, chto ŭniesieny ŭ dazvoleny śpis.
Na pazaminułym tydni ŭ holfkłubie adbyŭsia pieršy turnir, praŭda, zakryty dla hledačoŭ. Adnak napiaredadni spabornictvaŭ na spartyŭnaje pole puścili presu, kab pakazać jakaść padrychtoŭki travy. «Naša Niva» skarystałasia situacyjaj, kab naviedać «Hrynvič» i pabačyć pasiołak na svaje vočy.
Čyje hrošy?
U prajekt užo ŭkładziena $18 miljonaŭ, i heta tolki pačatak, tłumačyć dyrektar «Holf-kłuba» Andrej Nikanionak. «Letaś nakupili techniki na $200 tysiač, sioleta patracili jašče kala $600 tysiač…» — raskazvaje jon. Razmach adčuvajecca. Praź niekalki miesiacaŭ płanujecca adkryćcio holfakademii, paśla źjavicca i kłubny dom.
Pa padlikach, štohod tolki na ŭtrymańnie pola daviadziecca tracić kala $1,5 miljona.
Architektar byŭ zamoŭleny z Anhlii, dy i piersanał, jaki absłuhoŭvaje pali, zaprasili z-za miažy. Choć patrochu hadujuć i ajčynnych śpiecyjalistaŭ.
Dla krainy, u jakoj u holf hulaje niekalki dziasiatkaŭ čałaviek, inviestycyi vyhladajuć dziŭnymi. Adnak ułaśniki pierakananyja: prajekt akupicca.
Farmalna «Holf-kłub» ličycca rasijska-biełaruskim tavarystvam z abmiežavanaj adkaznaściu. Adnak, pa słovach Nikanionka, u prajekcie kruciacca hrošy ŭkrainskaha miljaniera Mikałaja Łahuna. U Biełarusi jon vałodaje «Delta-bankam» i strachavymi kampanijami.
Partnior «Holf-kłuba» — Prezidencki spartyŭny kłub na čale ź Dźmitryjem Łukašenkam. «My ŭdziačnyja im za dapamohu», — kaža Andrej Nikanionak. «Tolki arhanizacyjnuju ci finansavuju?» — udakładniajem u jaho. Hetaja infarmacyja nie kamientujecca.
Padychod da spravy surjozny. Nikanionak pakazvaje na viertaloty, jakija pralatajuć vysoka ŭ niebie: tut časam pravodziacca vyprabavalnyja paloty, ale šum budzie zaminać halfistam skancentravacca na hulni. Tamu viaducca pieramovy ab spynieńni palotaŭ.
Sarvanyja terminy
Raniej na miescy holfkłuba byŭ palihon, vakoł jakoha — lasy. Ziamla za niekalki kiłamietraŭ ad MKAD zvyšdarahaja. Adnak inviestar atrymaŭ jaje biez aŭkcyjonu, naŭprost prezidenckim ukazam.Dakumient byŭ padpisany jašče ŭ studzieni 2007 i davaŭ navastvoranamu tavarystvu pryvabnyja lhoty. Vyznačać padradčykaŭ možna było advolna, biez praviadzieńnia tarhoŭ, a miascovym uładam nastojliva raiłasia vydzielić padatkovy kredyt na budaŭnictva holfpola. Niekalki punktaŭ ukaza byli schavanyja «dla słužbovaha karystańnia».
Pobač, zhodna z prezidenckimi ŭkazami, musili budavacca hihanckija žyłyja kompleksy «Zialony Bor» i «Natynhiem» miljanieraŭ Juryja Čyža i Anatola Tarnaŭskaha adpaviedna.
Usie abjekty «Hrynviča» — i žyłyja, i spartyŭnyja — musili być kančatkova zdadzienyja ŭ ekspłuatacyju da kanca 2014. Adnak dabudavanych i zasielenych katedžaŭ na terytoryi pasiołka jašče niama. Bolšaść učastkaŭ vyhladaje jak pole ci vysiečany les z zakapanaj tabličkaj «pradadziena». Kamu? Za kolki? Kamiercyjnaja tajamnica.
Pa słovach achoŭnikaŭ, u adzinkavych damach vonkavyja budaŭničyja pracy nasamreč padychodziać da zaviaršeńnia — ustalajucca vokny i dźviery, adnak heta chutčej vyklučeńnie ź situacyi. «Pryjazdžajcie praz hadoŭ dziesiać, moža, tady ŭsio i dabudujuć», — śmiajecca achoŭnik. Praŭda, kiraŭnictva hladzić na situacyju bolš aptymistyčna.
Prystojnaj darohi da «Hrynviča» pakul niama. Niekalki kiłamietraŭ ad MKAD da pasiołka davodzicca treścisia pa hravijcy. Padjezd pabudujuć chiba što naleta.
Čempijanat ananimnych miljanieraŭ
Fienomien biełaruskaha holfa zaklučajecca ŭ tym, što ajčynnyja spartsmieny saromiejucca pryznavacca, što jany ŭdzielničali ŭ spabornictvach.Letaś biełarusy pravodzili nieaficyjny čempijanat pad Vilniaj — minskaje pole tady było jašče niepadrychtavanaje. U čempijanacie hulali kala 20 čałaviek, ale ŭ vynikovym pratakole było zapisana tolki dzieviać proźviščaŭ. Usie astatnija zrabili vyhlad, što ich nie było… Dla sportu, navat amatarskaha, heta nonsens.
Čym tłumačycca takaja situacyja?
Namieśnica dyrektara «Holf-kłuba» Śviatłana Maksimava ličyć, što vinavaty stereatyp: halfist — značycca, bahaciej. «Biełarusy nie chočuć, kab ich zapisali ŭ śpis miljanieraŭ… Albo, naprykład, chtości z hulcoŭ musiŭ być na pracy, a pajechaŭ na turnir», — miarkuje jana.
Darečy, u apublikavanym śpisie pieramožcaŭ minskaha turniru pieravažna zamiežniki. Biełarusaŭ tolki dvoje, i heta daloka nie samyja viadomyja asoby. Ale nie sakret, što siarod amataraŭ hulni jość dzieci ŭpłyvovych čynoŭnikaŭ dy biźniesmieny.
Holf dla pačatkoŭcaŭ
Dla biełarusa ź siarednim zarobkam ceny na hulniu ŭ holf kusajucca, ale nie vyhladajuć hihanckimi.Hrupavyja ŭroki dla navičkoŭ u minskim holfkłubie kaštujuć $40—50, indyvidualnyja zaniatki z trenieram jašče daražejšyja. Sama arenda maleńkaha pola kaštuje da $30, vialikaha — da $70. Ale da hetych sum treba dadać košt vopratki i abutku (aby ŭ jakim na pole nie puściać), invientaru (a ŭ Biełarusi kluški pakul nie kupiš), miačykaŭ… Pa słovach Andreja Nikanionka, kab pačać hulać, treba patracić kala $600—700. Heta bolš za miesiačny zarobak u krainie.
