Arhanizatary Sacyjalnaha maršu majuć namier pravieści akcyju 4 listapada [nia błytać z Eŭrapiejskim, jaki maje prajści 14 kastryčnika]. Pra heta 4 vieraśnia na pres‑kanfierencyi zajaviŭ staršynia arhkamiteta pa padrychtoŭcy maršu Valeryj Uchnaloŭ.
Pavodle jaho słoŭ, Sacyjalny marš — «nie adnarazovaja akcyja, a šerah mierapryjemstvaŭ, raźličanych na praciahły čas». «Heta tolki pačatak kampanii, skiravanaj na źmianieńnie sacyjalnaj palityki biełaruskaj dziaržavy, u jakuju ŭžo ŭklučylisia nie tolki palityčnyja partyi, ale i šmat dziejnych hramadskich arhanizacyj», — zaznačyŭ V.Uchnaloŭ.
Jak paviedamiŭ palityk, vosieńniu 2007 hoda ŭ miežach kampanii pa praviadzieńni Sacyjalnaha maršu zapłanavany try najbolš značnyja akcyi. Tak, 30 vieraśnia abjadnanyja demakratyčnyja siły majuć namier pravieści bolš za 300 pikietaŭ va ŭsich rajonach Biełarusi, padčas jakich jaho arhanizatary rastłumačać nasielnictvu svaju pazicyju adnosna pazbaŭleńnia niekatorych hramadzian sacyjalnych harantyj i lhot. 2 kastryčnika, u dzień adkryćcia asieńniaj siesii Pałaty pradstaŭnikoŭ, arhanizatary zboru podpisaŭ suprać admieny lhot majuć namier uručyć sabranyja podpisy vybarščykaŭ deputatam. 4 listapada arhanizatary płanujuć pravieści ŭ Minsku ŭłasna Sacyjalny marš.
Jak paviedamiŭ V.Uchnaloŭ, płanujecca, što ŭ hety dzień šeście projdzie ad Kastryčnickaj płoščy da budynka Nacyjanalnaj biblijateki. «Nieŭzabavie my padpišam adpaviednuju zajaŭku na praviadzieńnie hetaha mierapryjemstva i pieradadzim jaje ŭ Minharvykankam — za dva miesiacy da praviadzieńnia akcyi. Sam tekst zajaŭki ŭžo hatovy, nam zastałosia tolki sabrać pad joj podpisy», — zajaviŭ V.Uchnaloŭ.
