Alejnika sudzili da poźniaj nočy

Pačaŭšysia ŭ 14:00, praces «Jury Alejnik suprać Akademii Kiravańnia» zaciahnuŭsia da poźniaje nočy. Tolki ŭ 10 hadzin nočy ŭsie prysutnyja na sudzie ludzi zmahli vyjści na śviežaje pavietra.

Padtrymać Juryja pryjšli jahonyja siabry, studenty Akademii kiravańnia, i, viadoma, baćki. Pierad pačatkam pracesu Juraś skazaŭ, što jaho sprava znakavaja, i tamu za joj sočać studenty z usioj Biełarusi.

Miesca ŭ maleńkaj zali z usiaho tryma radami łaŭ ledź chapiła niepasrednym udzielnikam.

Na pačatku pasiedžańnia Jury chadajničaŭ ab pradstaŭleńni jamu ŭ dapamohu hramadzkaha pradstaŭnika Aleha Hułaka i advakata Łarysy Atamančuk, što i było zroblena. Z boku Akademii kiravańnia pradstaŭnikami vystupili Dajna Babrovič, viadučy juryskonsult Akademii, i Alaksandar Varankoŭ, načalnik upraŭleńnia kadraŭ.

U sudovaj pramovie Juraś Alejnik adznačyŭ, što mieŭ pry navučańni siarednim bałam 9, aktyŭna ŭdzielničaŭ u studenckim žyćci, atrymlivaŭ roznyja hramaty, ŭ tym liku spartovyja, a pryčynaj adličeńnia ličyć svaju hramadzkuju dziejnaść: udzieł u dazvolenym «Čarnobylskim šlachu», staršynstva ŭ TBM Mienskaje vobłaści i siabroŭstva ŭ Biełaruskaj asacyjacyi žurnalistaŭ. Jon taksama spasłaŭsia na Kanstytucyju j mižnarodnyja kanvencyi ab svabodzie palityčnych pohladaŭ i pravie na adukacyju.

Pradstaŭniki i śviedki Akademii nie pryznavali palityčnaha padtekstu spravy, a rabili akcent na na «systematyčnaje parušeńnie dyscypliny i rasparadku». Kali pradstaŭniki Alejnika pastavili pytańnie pra propuski astatnich studentaŭ, sudździa jaho adchiliła. Taksama jana admoviłasia dałučyć da spravy chadajnictva ab admienie zahadu rektaru, padpisanaje 260 studentami, na padstavie taho, što «heta było paśla adličeńnia».

Pradstaŭnica Akademii Dajna Babrovič nie zmahła patłumačyć, ni čamu Juryja dvojčy pakarali za adnyja i tyja ž propuski, ni čamu jaho nie painfarmavali pra vymovy, ni čamu Juryja adličyli za 22 prapuščanyja hadziny, a studenty z bolšaj kolkaściu propuskaŭ vučacca dalej.

Načalnik upraŭleńnia kadraŭ Alaksandar Varankoŭ nazvaŭ Juryja «złosnym parušalnikam», jaki «demanstratyŭna zachvočvaŭ astatich studentaŭ nie chadzić na zaniatki». Toje, što bolšaść propuskaŭ adbyłasia, kali Juraś jeździŭ na pachavańnie dzieda i chadziŭ u palikliniku, «nia jość uvažlivaj pryčynaj, bo Juraś nie padaŭ zajavy». Na pytańnie, što jość uvažlivaj pryčynaj, Varankoŭ adkazaŭ: «Zachvorvańnie, viasielle i pachavańnie, ale tolki svajo viasielle i svaje pachavańnie».

Staršynia prafkamu, studentka Hanna Dabravolskaja, nie zmahła patłumačyć, čamu padpisała zahad ab adličeńni Alejnika zamiest zboru kalehijumu prafsajuznaha kamitetu.

Maci Juryja Alejnika, spadarynia Halina, zaśviedčyła, što z‑za chvaroby joj prychodziłasia časta vyklikać Juryja ź Miensku ŭ Maładečna, kab jon dahladaŭ małodšaha brata. I raptam siamja daviedałasia, što Juryja Alejnika adličyli z VNU za propuski:

«Heta było šokam, bo syn zaŭždy dobra vučyŭsia, adznaki byli vysokija, i nichto z administracyi VNU navat nie patelefanavaŭ, nie papiaredziŭ.»

U adkaz joj zadali pytańnie: «Kali b vaš syn pracavaŭ, a nie vučyŭsia, vy b vyzyvali jaho ŭ čas chvaroby?»

Urazili śmiełyja vystupy śviedkaŭ-studentaŭ u prysutnaści kiraŭnictva Akademii:

— Za daterminovaje hałasavańnie na vybarach možna hulać ceły tydzień.

— Adličyli Juryja za palityku, heta praktykujecca ŭ Akademii i inšych VNU.

— Heta nia toj student, jakoha treba było adličyć.

— Kali adličać za takuju kolkaść propuskaŭ, tady b mianie ź pieršaha kursu adličyli.

— Heta ŭsio tolki farmalnaść, jakuju administracyja nie zmahła navat hramatna aformić.

— Vydatny student, niezrazumieła, za što jaho možna adličyć, jak studenta. Tolki za aktyŭnuju hramadzianskuju pazicyju.»

Pieršy pierapynak u pracesie byŭ zrobleny tolki a 21‑j. Siońnia, 6 vieraśnia, praciah pasiedžańnia a 9-j ranicy. Najvierahodniej, u chutkim časie budzie abvieščany prysud.

Pavialičyć

• 0
• 0
• 0
• 0
• 0
• 0
• 0
• 0