Kitajskim industryjalnym parkam pad Smalavičami zacikaviłasia Financial Times
23 lipienia zakančvajecca hramadskaje abmierkavańnie ŭ internecie hienieralnaha płana budaŭnictva biełaruska-kitajskaha industryjalnaha parku kala Smalavičaŭ. Na 24 lipienia pryznačanyja słuchańni ŭ Smalavickim rajvykankamie.
Alaksandr Łukašenka ŭ intervju kitajskamu ahienctvu Sińchua napiaredadni svajho vizitu ŭ Piekin na minułym tydni zajaviŭ, što realizacyja hetaha prajektu dazvolić atrymlivać ad ekspartu dadatkova da 50 miljardaŭ dalaraŭ štohod. A paśla viartańnia ź Piekina ŭ Minsk Łukašenka daručyŭ pryśpiešyć budaŭnictva industryjalnaha parku.
«Łukašenku prainfarmavali ab tym, što ŭžo sioleta płanujecca zaviaršyć prajektavańnie asnoŭnych inžyniernych kamunikacyj, u pryvatnaści haza-i elektrazabieśpiačeńnia pieršaj paŭnočnaj placoŭki pad zabudovu novymi pradpryjemstvami» — paviedamiła pres-słužba kiraŭnika Biełarusi.
Tym časam brytanskaja hazieta Financial Times u svaim artykule pra pajezdku Łukašenki ŭ Kitaj i pra biełaruska-kitajskija ekanamičnyja dačynieńni cytuje Kiryła Karaciejeva — pieršaha namieśnika hienieralnaha dyrektara kampanii, jakaja zajmajecca pabudovaj industryjalnaha parku pad Minskam — jaki spadziajecca, što Biełaruś u zmozie pryciahnuć zamiežnych inviestaraŭ u hety park praz padatkovyja ilhoty, libieralnaje zakanadaŭstva adnosna zamiežnaj ułasnaści dy tannuju i dobra adukavanuju pracoŭnuju siłu.
«Da 2015 hoda my pavinny prasunucca nastolki daloka, kab stać cikavymi dla vialikich kampanij. Ja raźličvaju na pieršyja vialikija inviestycyi z Kitaja», — skazaŭ brytanskaj haziecie Karaciejeŭ.
Što zapisana aficyjnaj pryčynaj śmierci adzinaha syna Jarmošynaj?4
Kamientary