Rasija znoŭ stvaraje abmienny fond: hramadzianina ZŠA asudzili na 15 hadoŭ za «zbor danych dla sistemy hienietyčnaha skryninhu»
Fiederalnaja słužba biaśpieki Rasii apubličyła viersiju abvinavačańnia ŭ spravie ab špijanažy suprać hramadzianina ZŠA Džyna Śpiektara, jaki byŭ prysudžany da 15 hadoŭ kałonii strohaha režymu, piša «Miedyjazona».
Pavodle viersii FSB, Śpiektar dziejničaŭ u intaresach Pientahona i źviazanaj ź im kampanii, nazva jakoj nie raskryvajecca. Śpiecsłužba śćviardžaje, što amierykaniec źbiraŭ «źviestki pa bijatechnałahičnaj i bijamiedycynskaj tematycy, što ŭ tym liku składajuć dziaržaŭnuju tajamnicu, dla nastupnaha stvareńnia ŭ ZŠA sistemy vysokachutkasnaha hienietyčnaha skryninhu nasielnictva Rasii».
Śpiektar naradziŭsia ŭ Leninhradzie, ale paźniej pierajechaŭ u ZŠA i atrymaŭ tam hramadzianstva. U 2015—2016 hadach jon zajmaŭ pasadu staršyni rady dyrektaraŭ rasijskaha pastaŭščyka miedycynskich vyrabaŭ «Miedpalimierpram».
U 2022 hodzie Śpiektar byŭ pryhavorany da troch z pałovaj hadoŭ kałonii strohaha režymu pa spravie ab pasiarednictvie pry dačy chabaru Anastasii Alaksiejevaj, jakaja była pamočnicaj byłoha vice-premjera Rasii Arkadzia Dvarkoviča. Pavodle śledstva, chabar byŭ pieradadzieny ŭ intaresach troch farmaceŭtyčnych kampanij — «Prammied Rus», «Miedpalimierpram» i «R-Farm». Alaksiejeva pavinna była spryjać hetym firmam u pracy.
24 śniežnia 2024 hoda Masharsud abviaściŭ prysud Śpiektaru pa spravie ab špijanažy — 13 hadoŭ kałonii strohaha režymu. Z ulikam papiaredniaha terminu pa spravie ab chabarnictvie, ahulnaje pakarańnie skłała 15 hadoŭ źniavoleńnia. Taksama ŭ sile zastaŭsia štraf u pamiery 14 116 805 rubloŭ (140 tysiač dalaraŭ), jaki byŭ pryznačany pa pieršaj spravie.
U 2017 hodzie Uładzimir Pucin na pasiadžeńni Savieta pa pravach čałavieka zajaviŭ pra metanakiravany zbor «bijałahičnaha materyjału» rasijan.
«Vy viedajecie, što bijałahičny materyjał źbirajecca pa ŭsioj krainie, pryčym u ludziej roznych etnasaŭ i tych, chto pražyvaje ŭ roznych hieahrafičnych rehijonach Rasijskaj Fiederacyi? Voś pytańnie: navošta heta robiać? Robiać metava i prafiesijna. My taki abjekt vielmi vialikaj cikavaści», — skazaŭ jon.
Paśla hetych słoŭ Pucina Vajenna-pavietranyja siły ZŠA zajavili, što zakuplali rybanukleinavyja kisłoty i sustaŭnuju vadkaść hramadzian Rasii dla zaviaršeńnia daśledavańniaŭ škiletna-myšačnych traŭmaŭ. Pavodle ich pradstaŭnika, uzory byli patrebnyja «ŭ metach abjektyŭnaści daśledavańnia, a nie praź ich pachodžańnia».
Ciapier čytajuć
«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna10
Kamientary