DZENNIK.BY — chutka pa‑biełarusku

Raspracavany vypusknikami Haradzienskaha ŭniversyteta elektronny dziońnik dahetul maje ŭ Internecie tolki rasiejskamoŭnuju versiju. U chutkim časie z dapamohaj stvaralnikaŭ sajtu Nastaunik.info źjavicca biełaruskamoŭnaja staronka Dzennik.by.

U suśvietnaj praktycy ŭzajemadziejańnie pamiž škołaj i baćkami pry dapamozie Internetu imkliva pašyrajecca. U Biełarusi zroblenaja pieršaja sproba naładzić takuju suviaź. Adpaviednuju prahramu raspracavali i pradstavili dla karystańnia na sajcie Dzennik.by vypuskniki Haradzienskaha ŭniversyteta. Dzennik.by — heta elektronnaja versija klasnaha žurnała paśpiachovaści i naviedvalnaści ŭ Internecie. U im baćki mohuć pabačyć poŭnuju infarmacyju pra svajho vučnia: hrafik paśpiachovaści, paviedamleńni ab zahadzia zaplanavanych piśmovych pracach, chatnija zadańni, padziaki abo zaŭvahi ad vykładčykaŭ, kolkaść prapuščanych zaniatkaŭ. Atrymać nieabchodnuju infarmacyju možna za ličanyja chviliny praz sms‑ i e‑mail‑paviedamleńni, persanalny dostup da sajtu.

Kab skarystacca pasłuhami prahramy, treba padać zajaŭku na padłučeńnie da systemy Dzennik.by. Paśla hetaha supracoŭniki sajtu stvarajuć virtualnuju madel škoły ź jaje vykładčyckim składam, vučniami, raskładami zaniatkaŭ. Štodnia, pa zakančeńni zaniatkaŭ, zapoŭnienyja pedahohami farmulary paśpiachovaści, pieradajucca supracoŭnikam Dzennik.by i ŭvodziacca ŭ ličbavuju systemu kantrolu paśpiachovaści vučniaŭ. Systema aŭtamatyčna rassyłaje paviedamleńni ab adznakach, zaŭvahach i vodhukach pedahohaŭ baćkam vučniaŭ.

Upieršyniu Elektronny školny dziońnik vyprabavali ŭ himnazii №5 Horadni. Pavodle papiarednich vynikaŭ testavańnia prahramy siaredni bał pa klasie vyras praktyčna ŭdvaja, značna palepšyłasia dyscyplina. U biahučym navučalnym hodzie navinku vyprabujuć jašče dvaccać haradzienskich škołaŭ.

Na siońnia elektronny dziońnik maje ŭ Internecie tolki rasiejskamoŭnuju versiju. Ale administracyja sajtu zapeŭnivaje, što ŭ chutkim źjavicca biełaruskamoŭnaja versija. A dapamahčy stvaryć biełaruskamoŭnuju staronku Dzennik.by ŭzialisia stvaralniki sajtu Nastaunik.info. Jak raspaviała administratarka sajtu dla nastaŭnikaŭ Tamara Mackievič, užo pierakładzienaja hałoŭnaja staronka Elektronnaha školnaha dziońnika. «My možam aperatyŭna pierakładać naviny sajtu, ale idealny varyjant, kali b sajt zajmieŭ biełaruski interfejs. A dla hetaha nam patrebna pierakłaści na biełaruskuju movu samu prahramu» — kaža spn. Mackievič. Pa jaje słovach, adpaviednuju prapanovu jany ŭžo zrabili administracyi Dzennik.by i ciapier čakajuć adkazu.

Siamion Piečanko

• 0
• 0
• 0
• 0
• 0
• 0
• 0
• 0