OnlyFans błakuje akaŭnty, zarehistravanyja u Biełarusi i Rasii. Eratyčnaja madel — biełaruska: «Idzie vajna, ja padtrymała Ukrainu»
Akaunt Maryi (imia źmienienaje pa prośbie hieraini materyjału) zabłakavali biez papiaredžańnia. Kali stała viadoma, što Biełaruś i Rasiju mohuć adklučyć ad SWIFT, servis OnlyFans pačaŭ masava błakavać akaunty, zarehistravanyja ŭ hetych krainach, raskazvaje dziaŭčyna.
Maryi 27 hadoŭ, jana ŭradženka Biełarusi. Kaliści vučyłasia na śpiecyjalnaści «suśvietnaja ekanomika», ale ŭniviersitet tak i nie skončyła.
«Kali my pastupali, abiacali, što naša śpiecyjalnaść atrymaje adpracoŭku ŭ haradach, — kaža Maryja. — Ale kali ja ŭbačyła miescy dla raźmierkavańnia — vyrašyła ŭniviersitet kinuć. Mnie nie chaciełasia pravodzić dva hady ŭ kałhasie. Paśla ja zajmałasia fatahrafijaj, malavała na zamovu. Zachapiłasia kaspłejem, rabiła fotasiesii pa hulniach, «League of Legends», naprykład.
Pacichu pačała zarablać prodažam zdymkaŭ, zarehistravałasia na Patreon. Ale hety siervis mieŭ kiepskija ŭmovy dla madelaŭ, kiepskuju techpadtrymku. Tamu ja pierajšła na OnlyFans, dzie i zarablaju ŭžo hady dva.
Spačatku ja zdymałasia tolki ŭ tematyčnych fotasiesijach, paśla ŭ bialiźnie, adnosna niadaŭna pačała zdymacca niu.
Baćki viedajuć, čym ja zajmajusia, reahujuć całkam adekvatna. Fota ŭ kaściumach navat babuli pakazvajuć. Eratyčnyja zdymki ich taksama nie zasmučajuć. Nu, ci prosta jany nie kažuć mnie, što im nie padabajecca. Rabić porna ŭ nas i niezakonna, i ja sama nie chaču. Eratyčnyja fota — tak, ale ničoha bolš, dakładna».
Maryja zarablaje nastupnym čynam: karystalnik za hrošy moža padpisacca na jaje akaunt. Padpiska na doŭhi termin zvyčajna vychodzić tańniej, čym na karotki. Za heta padpisčyk atrymlivaje dostup da fotazdymkaŭ, videa z bekstejdžaŭ, jakija vykładvaje dziaŭčyna.
«Taksama padpisčykam adkryvajecca mahčymaść pierapisvacca sa mnoj. Ja mahu adpraŭlać im dadatkovy kantent u pryvatnyja paviedamleńni za asobnuju apłatu, — tłumačyć Maryja. — Miesiačnaja padpiska ŭ mianie kaštavała 18 dalaraŭ, ale amal zaŭsiody była źnižka bolš za 50%: ja admysłova staviła vialiki košt padpiski, kab lapić źnižki na jaje, ludzi źnižki lubiać.
Ale ceny byvajuć zusim roznyja: u niejkich madelaŭ 5-6 dalaraŭ, u inšych i 35 byvaje. Dadatkovaje paviedamleńnie z fatahrafijami niu ja rablu za 200 dalaraŭ. Za heta padpisčyk atrymaje vialiki fotaset, niekalki dziasiatkaŭ zdymkaŭ».
Ad hrošaj, jakija zarablaje madel, OnlyFans biare 20%, paśla jak praviła treba dapłacić za vyvad srodkaŭ. Da madeli dachodzić prykładna 70% ad sumy. Zarobak vychodzić vielmi rozny, kaža Maryja, bo jana šmat tracić na kaściumy, apłačvaje fatohrafa. Dakładnyja sumy dziaŭčyna nazyvać nie choča, ale, kaža, byvała i niekalki tysiač dalaraŭ.
«Ale apošnija miesiacy chapała tolki na arendu kvatery i ježu, adkłaści ničoha nie atrymlivałasia. Bo i karonavirus, i vielmi šmat madelaŭ źjaviłasia, vialikaja kankurencyja», — tłumačyć Maryja.
26 lutaha dziaŭčyna raptoŭna daviedałasia, što jaje akaunt bolš nie aktyŭny.
«Mnie pra heta paviedamiła maja siabroŭka-madel, jana pra błaikroŭku svajho akaunta daviedałasia ad padpisčykaŭ. Nijakich paviedamleńniaŭ ad siervisa nie było, — kaža Maryja. — Pry hetym, ja sama mahu zajści ŭ svoj akaunt, ja nie baču, što jon zabanieny, padpisčyki taksama mohuć padpisvacca — ale vyvieści hrošy ja nie zmahu. Padpisčyki atrymać hrošy nazad taksama nie zmohuć. Usio prosta zastaniecca OnlyFans.
Ja źviazvałasia z techpadtrymkaj, atrymała niekalki standartnych adkazaŭ: razhledzim pytańnie, dziakuj, što źviazalisia z nami. Ale reakcyi nul.
Nakolki ja viedaju, błakujuć usich, chto rehistravaŭsia z Rasii i Biełarusi. Znajomuju dziaŭčynu z ukrainskim pašpartam, jakaja rehistravałasia z Rasii, taksama zabłakavali».
Dakładnyja pryčyny błakiroŭki Maryja pakul nie viedaje. Jana miarkuje, što heta źviazana nie stolki z napadam Rasii na Ukrainu, kolki z pahrozaj adklučeńnia rasijan i biełarusaŭ ad SWIFT. Ciapier madel zarehistravałasia na inšym siervisie, anałahičnym OnlyFans, tam abiacajuć, što błakavać akunty nie źbirajucca.
Cikava, što niekalki miesiacaŭ tamu Maryja pierajechała ź Biełarusi ŭ Rasiju, siońnia žyvie ŭ Maskvie.
«Ja źjechała ź Biełarusi, bo ŭ nas nie vielmi pryjemnaja palityčnaja abstanoŭka, znachodzicca ŭ krainie było niervova i trochi strašna, — raskazvaje dziaŭčyna. — Vyrašyła pašukać bolš spakojnaje miesca. Jeŭropa mnie nie vielmi padabajecca, plus vizy, usiakaje takoje, tamu vybirała pamiž Kijevam i Maskvoj.
Vielmi lublu Kijeŭ, ale ŭ stalicy Rasii ŭ mianie banalna było bolš znajomych, tamu pierabrałasia tudy, Ja razumieła, što mahčymy niejki čarhovy kanflikt u DNR i ŁNR, ale takoha, kab Kijeŭ bambili — ja nie čakała.
I ad taho, što ciapier adbyvajecca pamiž Rasijaj i Ukrainaj ja prosta ŭ šoku. Usie maje znajomyja rasijanie ŭ šoku i ŭ žachu ad hetaj vajny, namahajemsia chacia b niejak raspaŭsiudžvać infarmacyju, danacić.
Ale kali brać rasijskaje hramadstva ahułam, ja baču, što chapaje i tych, chto nie suprać vajny. U sacsietkach baču, jak znajomyja vykazvajuć takuju pazicyju — u takim vypadku navat nie spračajusia ź imi, prosta adpraŭlaju ŭ ban.
Ja padtrymała Ukrainu, bo vidavočna, chto ahresar, a chto achviara kanfliktu. Vajna idzie na ukrainskaj terytoryi, nie Ukraina napała na Rasiju, a Rasija na jaje. Maje siabry-ukraincy pišuć, dasyłajuć videa, ja baču, što adbyvajecca, i vielmi spačuvaju im, chaču, kab heta jak maha chutčej skončyłasia. Dla mianie heta ŭsio vidavočnaja ahresija z boku Rasii».
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary