U Mahilovie raźvitalisia z Hienadziem Sudnikam

25 žniŭnia na Hruzaŭskich mohiłkach Mahilova pachavany Hienadź Sudnik — adzin sa starejšych žurnalistaŭ Biełarusi, člen praŭleńnia hramadskaha abjadnańnia «Biełaruskaja asacyjacyja žurnalistaŭ» (BAŽ).

Hienadź Sudnik pamior u noč na 24 žniŭnia ad ankałahičnaha zachvorvańnia — raku lohkich.

Raźvitacca z žurnalistam u rytualnuju zału pa vulicy Čaluskincaŭ pryjšli prykładna 150 čałaviek — pradstaŭniki niedziaržaŭnych i dziaržaŭnych ŚMI, viadomyja ŭ Mahilovie i vobłaści palityki i hramadskija aktyvisty, prosta znajomyja niabožčyka. Na žałobnym mitynhu ŭsie, chto viedali Hienadzia Sudnika, adznačali jaho vysoki prafiesijanalizm, havaryli pra jaho vialiki ŭniosak u raźvićcio nie tolki mahiloŭskaj žurnalistyki, ale i pravaabarončaj dziejnaści.

«Jon byŭ vialikim žurnalistam — prafiesijanałam vyšejšaj marki. Heta čałaviek, jaki moh na 100 pracentaŭ ubačyć u maładym čałavieku talent i dapamahać jamu», — zajaviŭ hramadski aktyvist Vital Vasilkoŭ.

U pačatku 1990-ch hadoŭ Hienadź Sudnik kiravaŭ mahiloŭskim abłasnym telebačańniem i radyjo. Paśla sychodu adtul staŭ vydavać hazietu «Tydniovik Mahiloŭski», dapamahaŭ u arhanizacyi małatyražnaj presy ŭ vobłaści, spryjaŭ pracy niezaležnych teležurnalistaŭ.

«My pravodzim u apošni šlach epochu ŭ raźvićci i dziaržaŭnaha abłasnoha telebačańnia, abłasnoha radyjo, i epochu ŭ raźvićci niezaležnaha telebačańnia i radyjo, vydańni haziet», — skazaŭ namieśnik staršyni Partyi BNF, eks-kandydat u prezidenty Biełarusi Ryhor Kastusioŭ.

A prafiesar Valeryj Bierazijenka, namieśnik staršyni abłasnoj arhanizacyi Biełaruskaj partyi levych «Spraviadlivy śviet» skazaŭ pra Hienadzia Sudnika tak: «Jamu byli charakternyja sumlennaść, prystojnaść, advaha. Kinuć vyklik ciapierašniaj uładzie i stać u apazicyju da ciapierašniaj ułady — treba być vielmi prystojnym, sumlennym i spraviadlivym čałaviekam. Heta byŭ vielmi dobry čałaviek. My ź im adroźnivalisia pa palityčnych pohladach, ale zaŭsiody znachodzili ahulnuju movu».

Namieśnik staršyni BAŽ Alaksandr Starykievič adznačyŭ uniosak Hienadzia Sudnika ŭ pracu asacyjacyi žurnalistaŭ i raźvićcio biełaruskaj žurnalisckaj supolnaści ŭ cełym. «Spadziajemsia, što praciah budzie… Ja b vielmi chacieŭ, kab tyja mary, jakija jon mieŭ, ažyćciavilisia», — skazaŭ Starykievič.

Addanaje ziamli cieła Hienadzia Sudnika było nakryta bieł-čyrvona-biełym ściaham.

• 0
• 0
• 0
• 0
• 0
• 0
• 0
• 0