«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi

— Vy tolki što viarnulisia ź Litvy, dzie adbyłasia doŭhačakanaja sustreča prezidenta sa Śviatłanaj Cichanoŭskaj. Ja pravilna razumieju, što havorka idzie pra novy sistemny padychod u adnosinach ź biełaruskaj demakratyčnaj apazicyjaj?

— Tak, vy majecie racyju. Biełaruski trek patrabuje asobnaj sistemnaj palityki. Ja źviarnu vašu ŭvahu na vystup prezidenta Ukrainy ŭ Vilni: amal tracina pramovy była pryśviečanaja biełaruskamu pytańniu. I dla nas sapraŭdy važna zachoŭvać adnosiny z pradstaŭnikami demakratyčnaj Biełarusi.

My vierym, što nadydzie čas, i Biełaruś — demakratyčnaja Biełaruś — stanie čaćviortym udzielnikam Lublinskaha trochkutnika. Zaraz ja atrymaŭ daručeńnie ad prezidenta pryznačyć śpiecpradstaŭnika i ŭ najbližejšy čas uniasu kandydaturu na razhlad. Nazvu hetaj pasady my jašče vyznačajem, ale heta budzie słužbovaja asoba, upaŭnavažanaja dla kantaktaŭ z demakratyčnymi biełaruskimi siłami.

— Davajcie vyznačymsia z terminałohijaj. Chto taki Alaksandr Łukašenka?

— Heta tak zvany prezident. Ukraina, jak i inšyja jeŭrapiejskija krainy, nie ličyć jaho lehitymna abranym prezidentam Biełarusi.

— A heta ciahnie nastupstvy. Naprykład, heta aznačaje, što na jaho nie raspaŭsiudžvajecca imunitet kiraŭnika dziaržavy. A mnie padajecca, što jość dastatkova padstaŭ abvinavacić hramadzianina Łukašenku ŭ ździajśnieńni mnohich złačynstvaŭ suprać čałaviečnaści. Ukraina płanuje takija kroki?

— Ja taksama liču, što ciapierašni biełaruski režym źjaŭlajecca suadkaznym za rasijskuju ahresiju. U 2022 hodzie jon daŭ terytoryju Biełarusi dla nastupu na Ukrainu. Rakiety lacieli ź ich terytoryi. Heta robić ich saŭdzielnikam ahresii suprać Ukrainy.

Dy i zaraz my bačym novyja elemienty padtrymki rasijskaj ahresii z boku režymu Łukašenki. Jany dajuć svaju infrastrukturu dla atak ukrainskaj terytoryi bieśpiłotnikami. Ja śviadoma nie ŭdakładniaju detali, ale my ich viedajem, kožny taki vypadak fiksujem jurydyčna, natyfikujem AAN pra saŭdzieł biełaruskaha režymu ŭ ahresii i budziem stavić pytańnie pra sankcyi ŭ dačynieńni da datyčnych asob i kampanij — u pryvatnaści, zadziejničanych u pabudovie hetaj infrastruktury.

— Asabista Łukašenka źjaŭlajecca adkaznym za heta, ci tam usim kiruje Rasija i jon nie maje prava hołasu?

— Zaraz Biełaruś pieratvaryłasia ŭ «hienierał-hubiernatarstva». Łukašenka nie subjektny i, na žal, ad hetaha pakutuje ŭvieś biełaruski narod. U toj ža čas režym Łukašenki i jon asabista pavinny panieści adkaznaść za svoj saŭdzieł u rasijskaj ahresii. I dla hetaha jość usie jurydyčnyja padstavy.

— Z Łukašenkam razabralisia. A kim źjaŭlajecca dla nas Cichanoŭskaja, jaki jaje status?

— My zychodzim z taho, što jana — adna ź lidaraŭ demakratyčnych biełaruskich sił. Tamu vy ŭbačyli jaje sustreču z prezidentam Zielenskim. Darečy, razmova była vielmi pradmietnaja i budzie mieć dalejšaje raźvićcio. I nakont Biełarusi nahadvaju taksama pra Połk imia Kastusia Kalinoŭskaha, jaki vajuje ŭ składzie USU, i my heta sapraŭdy cenim.

• 35
• 1
• 0
• 1
• 0
• 0
• 0
• 0