Hety šlach nie byŭ lohkim: kampanii «Budźma» — piać hadoŭ

1 kastryčnika kulturnickaja kampanija «Budźma biełarusami» adznačaje svajo piacihodździe.

«Za piać hadoŭ dziasiatki arhanizacyj, kampanij dy inicyjatyvaŭ padtrymali ideju abjadnańnia dla papularyzacyi biełaruskaj kultury i dałučylisia da kampanii, kab prasoŭvać trend biełaruskaha jak sučasnaha i pierśpiektyŭnaha», — adznačajecca ŭ pres-relizie arhanizacyi.

Siarod bujnych prajektaŭ — štohadovy fiestyval biełaruskamoŭnaj rekłamy i kamunikacyi «Adnak!», kamunikacyjnyja prahramy «Kraina Cmokaŭ» i «Kultura palapšaje žyćcio», muzyčny prajekt «Tuzin. Pierazahruzka» i adnajmiennaja animacyja «Budźma biełarusami!».

Za hety čas supolnymi namahańniami litaraturnyja i muzyčnyja sustrečy, festy i kancerty, vandroŭki i lekcyi, kirmašy prajektaŭ i tok-šou, što ładziacca pa ŭsioj krainie, achapili bolš za 800 nasielenych punktaŭ, a ich ahulnaja kolkaść pieravysiła 9 000.

Alena Makoŭskaja, kaardynatar kampanii, kaža:

«5 hadoŭ kampanii — dobraja nahoda pierš za ŭsio skazać dziakuj usim, chto pavieryŭ u naš zapał i praciahvaje supolnuju pracu. Taksama dziakuj usim, chto za hety čas dałučyŭsia da nas, padtrymaŭ kampaniju kankretnymi dziejańniami, uzbahaciŭ idejami, svaim talentam. Usim, chto pryniaŭ biełaruskija kaštoŭnaści i dalej retranśluje ich praz svoj hurt, miedyi, tvorčuju supołku, rekłamnuju ahiencyju ci adździeł kultury.

Hety šlach nie byŭ prostym i lohkim: uvieś čas treba vynachodzić niešta admietnaje, bo situacyja ŭ Biełarusi ŭ peŭnym sensie ŭnikalnaja, tamu i anałahaŭ našaj kampanii, kab było ŭ kaho pieraniać dośvied, my nie znajšli. Stanoŭčym faktaram jość padvyšeńnie zacikaŭlenaści biełarusaŭ svajoj kulturaj, ale naša meta — spryjać tamu, kab biełaruščyna z trendu kančatkova stała asnovaj dziaržaŭnaj palityki».

Za čas svajho isnavańnia kampanija pačała tryvała asacyjavacca z paniatkam «jakasnaja biełaruskaja kultura». U najbližejšaj pierśpiektyvie — bolš ščylnaja praca ŭ rehijonach, stvareńnie rezanansnych kamunikacyjnych prahram, aktualnych dla biełaruskaha hramadstva.

«Praviedzienyja ŭ abłasnych centrach dyskusijnyja mierapryjemstvy, skiravanyja na abmierkavańnie aktualnych prablemaŭ kulturnaha asiarodździa, prademanstravali, što jość šmat nieabyjakavych ludziej, hatovych addać svoj čas i enierhiju, kab zrabić žyćcio rodnaha horada ci miastečka bolš cikavym i raznastajnym. Natchnionyja hetym, my abviaścili «Kirmaš prajektaŭ», kab kožnaja vartaja inicyjatyva mahła znajści sabie adnadumcaŭ i paplečnikaŭ, bolš za toje, pracujem nad stvareńniem banka idej, kab pakazać žyvyja prykłady tym, chto choča palepšyć žyćcio svajho rehijona.

Adna z zadač kampanii — nie tolki dapamahać ci samim realizoŭvać cikavyja mierapryjemstvy, ale i natchniać inšych na aktyŭnuju dziejnaść, jakaja b dapamahała palapšać kulturnicki fon krainy», — dadaje kaardynatarka kampanii Nina Šydłoŭskaja.

***

Hramadskaja kulturnickaja kampanija «Budźma biełarusami!» pačałasia 1 kastryčnika 2008 hoda.

Kampanija spryjaje kansalidacyi biełaruskaha hramadstva praz uzmacnieńnie nacyjanalnaj identyčnaści. Kaardynatar kampanii — Mižnarodnaje hramadskaje abjadnańnie «Zhurtavańnie biełarusaŭ śvietu «Baćkaŭčyščyna».

• 0
• 0
• 0
• 0
• 0
• 0
• 0
• 0