Apazicyjny biełaruski deputat pryznačany hałoŭnym trenieram zbornaj Rasii pa viesłavańni

Hałoŭnym trenieram zbornych kamand Rasii pa viesłavańni na bajdarkach i kanoe stanie vydatny biełaruski spartsmien, deputat pałaty pradstaŭnikoŭ nacyjanalnaha schodu druhoha sklikańnia Uładzimir Parfianovič. 

Jak paviedamiŭ Parfianovič, rašeńnie ab jaho pryznačeńni pryniata prezidyumam Usierasijskaj fiederacyi viesłavańnia na bajdarkach i kanoe. Usie nieabchodnyja dakumienty pieradadzieny ŭ Ministerstva sportu Rasii. Na praciahu 30 dzion jany pavinny prajści ŭsie ŭzhadnieńni, paśla čaho Parfianovič pačnie vykonvać svaje abaviazki. «Chacia ja ŭžo pryniaŭ styrno ŭłady», — dadaŭ spartsmien.

Pieršačarhovaj zadačaj Uładzimira Parfianoviča na novaj pasadzie stanie «dastojnaje vystupleńnie rasijskaj zbornaj na Alimpijskich hulniach, jakija majuć adbycca «. Akramia taho, jon budzie nieści adkaznaść za vykanańnie prahramy raźvićcia rasijskaha viesłavańnia ŭ cełym, raźvićcio viaślarnych centraŭ, kiravać rabotaj pa padrychtoŭcy junackaj, mužčynskich i žanočych zbornych kamand.

Imklivy karjerny ŭźlot Parfianoviča ŭ Rasii pačaŭsia kala čatyroch hadoŭ tamu, kali jon byŭ pryznačany na pasadu pamočnika prezidenta Usierasijskaj fiederacyi viesłavańnia na bajdarkach i kanoe, a paśla staŭ staršym trenieram zbornaj kamandy Rasii pa mužčynskaj bajdarcy. Pry hetym spartsmien zastajecca hramadzianinam Biełarusi. «U mianie biełaruski pašpart, hramadzianstva ja nie mianiaŭ», — padkreśliŭ jon. 

Pavodle słoŭ Parfianoviča, u Biełarusi jon zastavaŭsia biespracoŭnym na praciahu čatyroch hadoŭ, «navat dvornikam nie moh uładkavacca».

Takaja situacyja, ličyć spartsmien, skłałasia z-za roznahałośsiaŭ z kiraŭnictvam krainy padčas jaho deputactva ŭ parłamiencie, z-za ŭvachodžańnia ŭ apazicyjnuju deputackuju hrupu «Respublika». 

Uładzimir Parfianovič naradziŭsia 2 śniežnia 1958 hoda ŭ Minsku. U 1979 hodzie staŭ zasłužanym majstram sportu SSSR, uznaharodžany ordenami Pracoŭnaha Čyrvonaha Ściahu i Družby narodaŭ.

Na Alimpijskich hulniach u Maskvie ŭ 1980 hodzie staŭ trochrazovym čempijonam pa viesłavańni. Źjaŭlajecca adzinym u śviecie bajdaračnikam, jaki zavajavaŭ try załatyja miedali na praciahu adnoj Alimpijady.

Parfianovič čatyry razy stanaviŭsia čempijonam śvietu — u 1979-m i ŭ pieryjad 1981—1983 hadoŭ, a taksama šeść razoŭ — čempijonam SSSR. U 1980—1983 hadach pryznavaŭsia lepšym spartsmienam BSSR.

• 0
• 0
• 0
• 0
• 0
• 0
• 0
• 0