Sukupny košt aktyvaŭ, jakija kantraluje viarchoŭny lidar Irana ajatała Ali Chamieniei, dasiahaje 95 miljardaŭ dalaraŭ. Pra heta 11 listapada paviedamiła ahienctva Reuters pa vynikach svajho paŭhadavoha rasśledavańnia.
Aktyvy Chamieniei kirujucca kampanijaj Setad, jakaja vałodaje roznymi pradpryjemstvami ŭ iranskaj ekanomicy, u tym liku, u śfiery kamunikacyj, finansaŭ, nafty i miedycyny.
Prykładna ŭ 52 miljardy dalaraŭ aceńvajecca košt aktyvaŭ arhanizacyi ŭ nieruchomaści, a ŭ 43 miljardy — doli ŭ iranskich pradpryjemstvach.
U Reuters padkreślili, što heta amal na 40% bolš, čym naftavy ekspart ź Irana, jaki ŭ 2012 hodzie aceńvaŭsia ŭ 67,4 miljarda dalaraŭ.
Asnovu roskvitu Setad składaje kanfiskavanaja ŭłasnaść irancaŭ, jakija pakinuli krainu paśla revalucyi 1979 hoda, a taksama pazbaŭlenych pravoŭ pavodle prysudu suda. Sama Setad abaroniena ad sudovych pazovaŭ sistemaj ukazaŭ i pastanoŭ, śćviardžaje adna z krynic ahienctva. Pavodle infarmacyi Reuters, u mai 2013 h. Setad vystaviła na tarhi kala 300 ziamielnych učastkaŭ. Ich sukupny košt składaje niekalki miljonaŭ dalaraŭ.
Arhanizacyja atrymała nazvu pavodle ŭkaza ajatały Ruchały Chamiejni, vydadzienaha niezadoŭha da jaho śmierci ŭ 1989 hodzie. Poŭnaja nazva Setad — «Centr vykanańnia zahadaŭ imama».
Pieršapačatkova metaj arhanizacyi była dabračynnaść — dapamoha vieteranam i biednym — a čas dziejnaści nie pavinien byŭ pieravyšać dvuch hadoŭ. Ciapier Setad praciahvaje zajmacca dabračynnaściu, ale maštab jaje dziejnaści ŭ hetaj śfiery nieviadomy.
Pradstaŭnik Setad nazvaŭ vykładzienyja Reuters fakty «niapravilnymi i jakija nie adlustroŭvajuć sapraŭdnaha stanu spraŭ», ale nie staŭ udavacca ŭ padrabiaznaści.
Ajatała Chamieniei źjaŭlajecca viarchoŭnym lidaram Irana z 1989 hoda. Jon zaniaŭ hetu pasadu paśla śmierci pieršaha viarchoŭnaha lidara — ajatały Ruchały Chamiejni.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach3
Kamientary