Ech, zamała ŭ našaj apazycyi manachaŭ!

U ofisie BNF na kruhłym stale "Sto dzion paśla kanhresu" palityki znoŭ trochi paskublisia z analitykami (ci naadvarot?).

Viktar Ivaškievič: "Vy analityki. Voś i dajcie nam nie publicystyku, a analiz usiaho, što adbyłosia z krainaj za apošnija 15 hadoŭ. A my, palityki, na padstavie vašych detalovych vysnoŭ i budziem dziejničać. A pryhožaja, ale ni na čym nie hruntavanaja publicystyka nikomu nie patrebnaja".

Kamu sapraŭdy nadakučyła pałymianaja publicystyka z refrenami pra "złačynny režym", raju zazirnuć na sajt niadaŭna stvoranaha Biełaruskaha instytutu stratehičnych daśledavańniaŭ. Toha samaha, što niadaŭna zładziŭ vialikuju kanferencyju "Da novaha bačańnia Biełarusi" ŭ Kijevie. Voś tut davoli bahataja padborka materyjałaŭ. Jany nieraŭnacennyja, ale ŭdumlivamu čytaču jość čym pažyvicca.

Što ž da pikiroŭki miž palitykami i analitykami, to, na moj pohlad, hodzie ŭžo šukać krajnich. Pijanisty — i adnyja, i druhija — hrajuć, jak umiejuć:) Inšym razam dziviśsia, što pad hetym asfaltavym katkom uvohule niešta jašče varušycca.

Kaniešnie, apazycyja bahata nastupała i nastupaje na hrabli. Ale zaraz sytuacyja takaja, što ŭziać uładu joj niemahčyma nu choć treśni. I, darečy, kali źmiena ŭłady adbudziecca, to naŭrad ci hałoŭnyja partfeli apynucca ŭ ciapierašnich lideraŭ ADS.

Analitykam taksama možna, viadoma, zakinuć šablonnaść, krytykanstva, brak śviežych dumak. Varta lepiej varušyć hłuzdami. Ale ž naiŭna spadziavacca, što voś zaŭtra Karbalevič ci Roŭda napiša niejki pieramožny scenar, pavodle jakoha Labiedźka dy Kalakin jak dvojčy dva raźbiarucca z režymam. (Hałoŭnaje tolki — nie adchilacca ad instrukcyi dy peŭny čas trymacca suchoha zakonu, kab siłaviki nie paŭtaryli specaperacyju pad kodavaj nazvaj "El Pamidora":)

Kalarovyja revalucyi adbyvalisia nia tam, dzie apazycyja prydumlała niešta "zvyš-zvyš", a tam, dzie vyśpiavali umovy (čytajcie Iljiča:). Siońnia ŭ Mjanmie na čale revalucyjnaj chvali ŭvohule manachi, jakija nia ładzili kanhresaŭ i nie raspracoŭvali stratehijaŭ. Słuchajcie, moža zahvazdka ŭ tym, što ŭ našaj apazycyi manachaŭ zamała? Kali ž surjozna, dyk jašče pytańnie, što macniej spracavała u Mjanmie — ichni maralny aŭtarytet (jon ža byŭ i miesiac, i piać hadoŭ tamu) ci piacirazovaje padvyšeńnie cenaŭ na haz.

Zrešty, biełaruski varyjant moža akazacca (i najchutčej što akažacca) zusim nie revalucyjnym. Ale heta ŭžo asobnaja tema.

• 0
• 0
• 0
• 0
• 0
• 0
• 0
• 0