 Mikałaj Čarhiniec |
2 kastryčnika adkryłasia vosieńskaja siesija parłamienta, i ŭžo siońnia na joj razhladaŭsia prajekt Zakonu «Ab infarmacyi, infarmatyzacyi i abaronie infarmacyi«. U zakonaprajekcie jość normy, nakiravanyja niepasredna na rehulavańnie infarmacyi ŭ Internecie. Ci zmohuć takim šlacham uvieści cenzuru ŭ Internecie i pavialičyć kantrol?
Juryst Andrej Bastuniec miarkuje, što šmat pytańniaŭ zastajucca niavyrašanymi:
«Z adnaho boku, ŭ zakonaprajekcie idzie havorka pra toje, što dziejnaść u Internecie budzie svabodnaja, ale dalej zapisana — u miežach, vyznačanych zakanadaŭstvam Respubliki Biełaruś».
Jakija heta miežy? Kiraŭnik prajekta e-belarus.org Michaił Daraškievič ličyć artykuł, što tyčycca rehistracyi resursaŭ, niebiaśpiečnym:
«Na žal, tam havorycca, što rehistracyja budzie adbyvacca na dobraachvotnaj asnovie, ale my možam mierkavać, što dobraachvotnaja asnova budzie značyć, što tyja, chto nie zarehistravaŭsia, nie buduć dapuščanyja da čaho‑niebudź.
Naprykład, vy nie rehistrujecie svoj resurs, a potym uźnikaje pytańnie, što, umoŭna kažučy, na jakoje‑niebudź mierapryjemstva dapuskajecca tolki toj, chto zarehistravany».
U minułym hodzie była pryniata pastanova pra elektronnyja kramy i tyčyłasia taho, što ŭsie kramy pavinny znachodzicca u damienie BY i pavinny chościcca ŭ Biełarusi. Andrej Bastuniec upeŭnieny, što rehulavańnie takoj hłabalnaj źjavy jak internet, u miežach adnoj krainy — niedaskanałaje:
«Niekatoryja sajty mohuć rehistravacca ŭ inšych damiennych zonach, naprykład, org, info i h.d. I ja nie dumaju, što mohuć być niejkija zabarony heta zrabić. Ź inšaha boku, jakim čynam buduć rehulavać dziejnaść hetych resursaŭ, i nie abaviazkova stvoranych biełaruskimi hramadzianami ŭ Biełarusi, — vielmi vialikaje pytańnie».
Nie tak daŭno hałoŭny redaktar «Sovietskoj Biełoruśsii» Pavieł Jakubovič zajaŭlaŭ, što resursy, nie zarehistravanyja ŭ zonie BY, nie zmohuć brać rekłamu. Michaił Daraškievič ličyć, što takim čynam prahavorvajecca pieradumova da stvareńnia narmatyŭnaha akta takoha kštałtu:
«U hetym sensie ja baču, što heta moža stvaryć precedent padrychtoŭki narmatyŭnaha akta, jaki budzie rehłamientavać Internet‑rekłamu na biełaruskich resursach».
Pa słovach Andreja Bastunca, mahčymy taki varyjant, što sapraŭdy nie zarehistravanyja ŭ Biełarusi resursy nie zmohu brać rekłamu, ale tut znoŭ‑taki pytańnie, čamu biełaruski rekłamadaŭca nie zmoža dać rekłamu zamiežnamu Internet‑srodku:
«Vielmi šmat pytańniaŭ, navat technałahična, jak prymianić tyja ci inšyja normy zakanaprajekta, jaki rehuluje dziejnaść takoha hłabalnaha srodku masavaj kamunikacyi, jak Internet. Jakim čynam heta rehulavać u miežach adnoj krainy?»
Akramia pieraličanych niedakładnaściaŭ ekśpierty taksama vyłučajuć vializnuju kolkaść roznych śfier, jakija sprabujuć achapić zakonam, a taksama prablemu niedakładnaści farmulovak. Michaił Daraškievič aproč hetaha taksama adznačaje, što pakul zakon u asnoŭnym źjaŭlajecca palityčnym simvałam, jaki ŭvieś čas vykarystoŭvajuć jak srodak dla pahrozy.
Staršynia kamisii pa mižnarodnych spravach i nacyjanalnaj biaśpiecy Savieta Respubliki Mikałaj Čarhiniec u razmovie ź Jeŭraradyjo zaznačyŭ, što taki zakon nieabchodny, bo kožnaja kraina imkniecca da rehulavańnia takich pytańniaŭ zakanadaŭčym šlacham:
«Rehistracyju treba razhladać jak elemientarny ŭlik, tut niama dazvolnaj ci zabaranialnaj funkcyi — prosta rehistracyja. Prosta kantralujecca dziejnaść, i ŭ vypadku nieabchodnaści sajt mohuć zakryć».
