Jak Piatro Prakapovič adziny pabudavaŭ u Drazdach adrazu dva damy

Dom biehłaha kirhizskaha prezidenta znajšli ŭ Drazdach.

Biehły prezident Kyrhyzstana Kurmanbiek Bakijeŭ žyvie ŭ Biełarusi ŭžo čaćviorty hod. Za hety čas jon paśpieŭ atrymać palityčny prytułak i navat biełaruski pašpart. A voś na radzimie Bakijevu pahražaje turma. Jaho pryznali vinavatym u złoŭžyvańni słužbovymi paŭnamoctvami i arhanizacyi zabojstvaŭ. Byłoha prezidenta zavočna asudzili na 24 hady źniavoleńnia va ŭmovach strohaha režymu z kanfiskacyjaj majomaści.

Adnak, zhubiŭšy kirhizskuju majomaść, Kurmanbiek Bakijeŭ nabyŭ biełaruskuju. Jak stała viadoma «Narodnaj voli», uciakač buduje dom na ŭskrajku Minska, pobač z «Minsk-­Arenaj» i elitnym rajonam Drazdy. «Dla Bakijeva budujem. Haspadar pryjazdžaje z achovaj, ale redka», — pryznalisia žurnalistam rabočyja.

Pavialičyć

Zahadkavy dom znachodzicca ŭ katedžnym pasiołku na vulicy Vilejskaj. Dakładnaha adrasa jon pakul nie maje, rehistracyju ŭ kadastravym ahienctvie taksama nie prachodziŭ. A rašeńni Minharvykankama, pavodle jakich hramadzianam vydzialajucca ŭčastki dla budaŭnictva, u adkrytym dostupie nie znachodziacca.

Pasiołak Nacbanka

Vulica Vilejskaja pačała zabudoŭvacca dziesiać hadoŭ tamu. Tady hetaja ziamla jašče nie ŭvachodziła ŭ miežy Minska. Ź dziasiatak prestyžnych učastkaŭ pad budaŭnictva razdavaŭ Ždanovicki sielsaviet. Mienš za 500 mietraŭ da vadaschovišča, niepadaloku praśpiekt Pieramožcaŭ, karaciej, idylistyčny viaskovy ład žyćcia ŭnutry horada. Zrešty, raniej heta i była vioska. Učastki sa starymi chatami na susiednich vulicach tut pradajuć za $500 tysiač. Nu, a za novyja damy možna paprasić i da $1 miljona.

Druhoje žyćcio vulica Vilejskaja (tady ŭžo terytoryja Minska) atrymała šeść hadoŭ tamu. 31 maja 2007 Minharvykankam prymaje rašeńnie №1174 «Ab pradastaŭleńni ziamielnych učastkaŭ dla budaŭnictva i absłuhoŭvańnia žyłych damoŭ i dazvole praviadzieńnia prajektna­vyšukalnickich prac». Pavodle jaho, ziamlu vydali siemiarym dziaržaŭnym słužačym. Tahačasnamu staršyni Nacbanka Piatru Prakapoviču — 0,15 ha. A ŭsie jahonyja namieśniki — Pavieł Kałavur, Juryj Ałymaŭ, Mikałaj Łuzhin, Uładzimir Siańko, Mikałaj Kaduška i Vasil Maciušeŭski — atrymali pa 0,11 ha.

Umovy vydzialeńnia ŭčastkaŭ nieviadomyja. Adnak sumnieŭna, što heta byŭ aŭkcyjon z roŭnym dostupam usich achvotnych.

Ciapier bankiry žyvuć uzdoŭž Vilejskaj (krajni dom Maciušeŭskaha byŭ adniesieny da Ržavieckaha zavułka) plačo da plača. Admietna, što ŭ Nacbanku bolš nie pracuje nivodzin ź ich.

Kałavur kiruje bankam «BiełVEB», dzie jahonym namieśnikam staŭ Łuzhin. Maciušeŭski ŭznačaliŭ «BPS­Śbierbank». Mienavita z hetym bankam čutki źviazvali novuju pracu Uładzimira Siańko.

Samy zapatrabavany čynoŭnik

Na pavyšeńnie pajšoŭ tolki Piatro Prakapovič, jaki staŭ vice­premjeram. Aproč taho, 71-­hadovy budaŭnik uvachodić va ŭradavuju atestacyjnuju kamisiju, mižviedamasnuju radu pa dziaržaŭnaj statystycy, kamisiju pa pytańniach dziaržaŭnaha rehulavańnia cenaŭtvareńnia… Ahułam možna naličyć pad dva dziasiatki naminalnych i hanarovych pasadaŭ. Ale absalutnaja bolšaść ź ich, jak kažuć, na «hramadskich pačatkach».

Zarobak staršyni Nacbanka, pavodle słovaŭ ciapierašniaj hałoŭnaj bankirki Nadziei Jermakovaj, ciapier daros da $2 tysiač. Ale raniej jon byŭ značna mienšym. Zarobku čynoŭnika ŭ Biełarusi nie chapiła b, kab nabyć u elitnym rajonie ziamlu pa rynkavych cenach i budavać na joj kate­džy. Zrabić karjeru čynoŭnika, atrymać imia i suviazi, a paśla syści na zvyšvysokija zarobki top­-mieniedžaraŭ — šlach, jaki abrali susiedzi Prakapoviča pa Vilejskaj.

Dvojčy žychar Drazdoŭ

Ale Prakapovič na toje i Hieroj Biełarusi, što zrabiŭ faktyčna niejmaviernaje. Nie sychodziačy ź dziaržaŭnaj słužby, jon umudryŭsia ŭvajści ŭ raku dvojčy — atrymać adrazu dva elitnyja ŭčastki, cana kožnaha ź jakich ciapier padbirajecca da dvuch miljonaŭ dalaraŭ.

U pačatku stahodździa jon staŭ paŭnavartasnym žycharom čynoŭnickaha pasiołka ŭ Drazdach, uziaŭšy ad dziaržavy ziamlu pamieram 0,15 ha ŭ vodaachoŭnaj zonie Śvisłačy.

Dvuchpaviarchovy žyły dom z padvałam i dźviuma terasami ahulnaj płoščaj 370 m2 byŭ dabudavany ŭ kancy 2004.

Prakapovič nie byŭ by Prakapovičam, kab nie paprasiŭ jašče ziamli, «na bulbu». I atrymaŭ­-taki svaje dadatkovyja 670 m2 u stahadovuju arendu. Spačatku za aharod u Drazdach Prakapovič­dačnik płaciŭ $30 u ekvivalencie za hod. Paśla niekalkich devalvacyj, pravie­dzienych Prakapovičam-­bankiram, hadavaja płata pamienšała da $7 za hod…

Ale ničoha sabie — usio dzieciam. Ciapier u katedžy pa susiedstvie ź Viktaram Šejmanam žyvie syn Prakapoviča Alaksandr.

A sam Piatro Prakapovič zasialiŭsia ŭ chatu na Vilejskaj — cahlany dvuchpaviarchovik z chałodnaj prybudovaj, dźviuma terasami, padvałam i letniaj kuchniaj.

Darečy, pałovu katedža jon paru tydniaŭ tamu pierapisaŭ na dačku Ludmiłu. Hety dom bolš prastorny, čym u Drazdach, jahonaja ahulnaja płošča 500 m2.

Aščadlivy čałaviek aščadlivy va ŭsim. Prakapovič vyrašyŭ nie pierapłačvać za architekturny prajekt. Kali pahladzieć na fasady katedžaŭ bankiraŭ na Vilejskaj, bačna, što damy Prakapoviča i Kałavura… adnolkavyja. Adroźnivajecca tolki afarboŭka. A ŭsio astatniaje — ad płota da parenčaŭ na terasie druhoha paviercha — takoje samaje.

Pavialičyć

Vokny katedža Prakapoviča vychodziać jakraz na budoŭlu Bakijeva. Kirhizski inžynier, a paśla palityk, užo zasvoiŭ žyćciovy ŭrok. Nijakaja ŭłada nie harantuje, što paśla prychodu kankurentaŭ nie daviadziecca ŭciakać za 7 tysiač kiłamietraŭ, pakidajučy na radzimie šmatlikija majontki, a paśla chavacca ad svaich ziemlakoŭ.

Ślady Bakijeva

Raniej byłoha kirhizskaha prezidenta bačyli ŭ Raŭbičach, vioscy z harnałyžnym kurortam pad Minskam. Nibyta tut nabyŭ katedž adzin z synoŭ Bakijeva.

U Raŭbičach miascovyja žychary ŭkazali na adzin z budynkaŭ: maŭlaŭ, mienavita ŭ hetym domie pasialilisia kirhizy.

Hety katedž adzin z samych vialikich u vioscy. Kali hladzieć pa spadarožnikavaj karcie, to ŭčastak zajmaje stolki ž miesca, jak čatyry susiednija. Za płotam možna ŭbačyć niešta naštałt musulmanskaj «kaplicy». Na škło vakna na druhim paviersie pryklejenyja vyjavy, padobnyja da Dzieda Maroza i Śniahurki. Voś tolki šapka ŭ dziaduli niejkaja zanadta vyciahnutaja, vysokaja. Karaciej, niebiełaruskaja. Hladžu ŭ internecie — pryblizna tak vyhladaje «ak kałpak», nacyjanalnaja kirhizskaja šapka. Zrešty, takoje nazirańnie možna śpisać i na bahatuju fantaziju.

Pavialičyć

Kamu ž naležyć katedž (hladzi fota)? Na zvanok u dźviery adkazvaje małady mužčyna. «Ci mahčyma pahavaryć z Kurmanbiekam Salijevičam?» — «Napeŭna, vy niešta pierabłytali».

Kadastravaje ahienctva tym časam adkazvaje, što infarmacyja pra katedž u nacyjanalnym rejestry… adsutničaje. Usie susiednija damy jość — a hetaha čamuści niama.

Piatro Prakapovič

Nar. u 1942 u vioscy Kazły Pružanskaha rajona. Zakončyŭ Dnieprapiatroŭski inžynierna­budaŭničy instytut (1966). Pracavaŭ na calinie. U 1976—1996 — hałoŭny inžynier, a paśla hiendyrektar «Brestabłsielbuda». Deputat Viarchoŭnaha Savieta (1990—1995). U 1996—1998 — pieršy vice­premjer, namieśnik kiraŭnika Administracyi prezidenta, u 1998—2011 — kiraŭnik Nacbanka, u 2012—2013 — pamočnik Alaksandra Łukašenki. Ad 2013 — vice­premjer. Hieroj Biełarusi.

• 0
• 0
• 0
• 0
• 0
• 0
• 0
• 0