Rasija, kali joj ničoha nie zastaniecca, raskazaŭ mitrapalit Pavieł, moža i «čarnobylski kranik adkryć» pry patrebie.
Chaj by jon u siabie ŭ Rasii havaryŭ, što chacieŭ. My i viedać nie viedali, što tam toj mitrapalit havaryŭ u svajoj Razani. Ale ciapier jaho ŭ Biełaruś — dzie piataja častka zasypanaja čarnobylskim popiełam i ludzi, u kaho ŭ siamji byŭ rak ščytavicy, jak i tyja, chto nazaŭždy straciŭ svaju małuju radzimu, viedajuć, što heta takoje, — pryznačyli ŭładykam. I za adno hetaje vykazvańnie jon ryzykuje zastacca ŭ historyi našaj krainy prazvanym Kranikam…
Ab pryznačeńni Paŭła ŭ mitrapality Minskija i Słuckija abvieścili 25 śniežnia — na katalickaje Božaje Naradžeńnie. Voś Vam, łacińniki, naš chadziačy miemarandum.
Ale pasadžeńnie ŭ Minsku mitrapalita Paŭła — heta i Łukašenku zvanočak. Tak, Maskva bačyć svajoj supierzadačaj u Biełarusi — kab i prezidenta tut pryznačać, jak pryznačaje ijerarcha. Z razanskich, karahandzinskich. Abo ź miascovych janyčaraŭ. Ale kab pryznačała Maskva! Tak, jak rabiła niekalki stahodździaŭ. Kab nie biełaruskija elity ci biełaruskaja dynastyja toje vyznačała — jak chočuć adny, i kab nie biełaruski narod, jak taho dabivajucca demakraty.
A što Łukašenka moža procistavić? Pryznačeńnie mitrapalita adbyłosia ŭ adzin dzień z vydzialeńniem Minsku dvuch miljardaŭ dalaraŭ.
U Maskvy jość i hazavy Kran, i naftavy Kran, i ciapier voś carkoŭny Kranik. Ach da, i kranik Astravieckaj AES chutka pastaviać.
U Biełarusi pakul niama kiraŭnika, jaki mieŭ by volu i śmiełaść budavać nacyju. U tym liku dabicca samastojnaści dla pravasłaŭnaj carkvy.
Maskva pryznačyła mitrapalita, bo na pačatku 1990-ch BPC nie zdoleła dabicca prava samoj vybirać svajho pradstajaciela. Ukraincy zdoleli — mo tamu, što na toj momant mitrapalitam u Kijevie byŭ ukrainiec. A biełarusy nie zdoleli — u tym liku i tamu, što mitrapalitam u Minsku byŭ ruski, jaki taho nie chacieŭ.
Kab mieć svajho mitrapalita, jaki b maliŭsia za nas, biełarusaŭ, hrešnych i niedastojnych, a nie za vialikuju Rasiju, treba mieć svaju carkvu — voś pra što nam napomniła hetaje pryznačeńnie (zrešty, nie ŭpeŭnieny, što čałaviek, jaki z takoj lohkaściu razvažaje pra adkryćcio čarnobylskaha kranika, uvohule molicca). A kab mieć svaju carkvu, treba mieć svaju, biełaruskuju ŭładu. Adnaho biez druhoha nie budzie.
