Były ministr abarony Ukrainy Anatol Hrycenka zaklikaŭ lehalnych ułaśnikaŭ zbroi mieć jaje z saboj na Majdanie.
«Kali ŭłada nie abaraniaje žyćcia ludziej, ja zaklikaju tych, chto maje lehalnuju zbroju, vyjści na abaronu Majdanu i na patrulavańnie vulić sa zbrojaj, lehalnaj zbrojaj», — cytuje jaho aficyjnaje ahienctva Ukrinfarm.
«Ja budu pieršy, ja i ciapier sa zbrojaj, i ja budu toje rabić, heta nie zaklik da hvałtu, heta zaklik da spakoju», — dadaŭ były ministr, jaki ciapier narodny deputat Ukrainy.
Hrycenka padkreśliŭ, što zbroju treba vykarystoŭvać tolki dla samaabarony i ni ŭ jakim razie pieršym.
Za minuły tydzień zahinuli prynamsi 5 demanstrantaŭ, jašče niekalki źnikli bieź viestak. Pryčym ludziej vykradajuć nie z Majdanu, a kala kvater abo ŭ horadzie. Adnaho z vykradzienych, navukoŭca-siejsmołaha ź Lvova, znajšli zakatavanym u lesie pad Kijevam.
Pavodle vynikaŭ niezaležnaha rasśledavańnia, zabityja na vulicy Hrušeŭskaha, u tym liku biełarus Michał Žyźnieŭski, zahinuli ad papadańnia kuli, vypuščanaj z hładkastvolnaha ružža 12-milimietrovaha kalibra. Pryčym ahoń vioŭsia ź blizkaj adlehłaści. Vykazvalisia mierkavańni, što asobnyja ekstremisty ź liku bajcoŭ śpiecpadraździaleńniaŭ zaradžali takija łatunnyja palaŭničyja kuli ŭ ružžy, jakija vykarystoŭvajucca dla stralby humovymi kulami. Technična heta mahčyma.
Žyźnieŭski i inšy aktyvist, Nihajan zahinuli ŭranku 22 studzienia ŭ časie sprobaŭ śpiecpadraździaleńniaŭ, viernych Viktaru Janukoviču, ačyścić vulicu Hrušeŭskaha ad demanstrantaŭ.
Ciapier čytajuć
Rytu Dakotu abvinavacili, što jana terminova raspradała nieruchomaść u Rasii amal na $2 miljony. Jana adkazała2
Kamientary