Trupa Biełaruskaha teatra junaha hledača abjaviła votum niedavieru dyrektaru

U kanfliktu jość jak asabisty, tak i tvorčy aśpiekt. Trupu aburyŭ toj fakt, što novy dyrektar uziaŭ kurs na stvareńnie zabaŭlalnaha praduktu. Akciory chacieli b zachavać teatr aśvietnickim.

Apošnija hady stali vielmi ciažkimi dla Teatra junaha hledača. U 2008 hodzie było abjaŭlena pra rekanstrukcyju teatra. Kalektyŭ vyjechaŭ sa svajho budynku na Enhielsa, 26.

Śpiektakli TIUHa išli na scenie Doma litaratara. A ŭsie słužby raźmiaščalisia na ŭskrainie horada — na płoščy Kazinca.

Rekanstrukcyja pačałasia tolki ŭ listapadzie 2011 hoda.

Zrazumieła, što takaja atmaśfiera nie spryjała tvorčym pošukam. Ale TIUH rehularna pakazvaŭ biełaruskamoŭnyja śpiektakli dla dziaciej i moładzi.

Siarod repiertuaru dla darosłych jość «Michałava ziamla» (sceničny varyjant pavodle paemy Jakuba Kołasa «Novaja ziamla»), «Majho junactva kryły» (pavodle paemy Arkadzia Kulašova «Chamucius» pra Kastusia Kalinoŭskaha) i «Pan ministar» Franciška Alachnoviča.

Apošnim časam TIUH čakaŭ zaviaršeńnia rekanstrukcyi. Supracoŭniki spadziavalisia ŭžo letam viarnucca ŭ rodny budynak i pačać tam novy siezon. U jakaści adkryćcia płanavali pakazać «Siniju ptušku» Morysa Mieterlinka, łaŭreata Nobieleŭskaj premii pa litaratury.

Ale dyrektar teatra Mikałaj Kaziulin mieŭ sumnievy što da hetaj pastanoŭki.

Kaziulin prapanavaŭ skasavać pasadu mastackaha kiraŭnika, jaki pa jurydyčnym statusie roŭny dyrektaru.

Ad 2010 jaje zajmaŭ režysior Uładzimir Savicki. Raniej jon pracavaŭ u Kupałaŭskim teatry i pastaviŭ tam «Dzikaje palavańnie karala Stacha» – adno z najlepšych uvasableńniaŭ tvoraŭ Uładzimira Karatkieviča na biełaruskaj scenie. Kaziulin prapanavaŭ zamianić pasadu mastackaha kiraŭnika na pasadu hałoŭnaha režysiora, jaki pavinien padparadkoŭvacca dyrektaru.

U adkaz na pasiadžeńni mastackaj rady kalektyŭ TIUHa pastanavieŭ abjavić votum niedavieru Mikałaju Kaziulinu.

Aktrysa Viera Kavalerava, adna z zorak TIUHa, zajaviła «Interfaksu», što «Kaziulin źbirajecca zrabić z našaha teatra šou, i nie chavaje hetaha. Jon miarkuje, što my nie pavinny vychoŭvać praz svaje śpiektakli, a tolki zabaŭlać hledačoŭ».

Taja ž Kavalerava śćviardžaje, što «kali Kaziulin zastaniecca, a Savicki sydzie – teatra nie budzie. Sydzie vialikaja častka akcioraŭ. Moža, pad markaj TIUHa i budzie isnavać niešta inšaje, ale nijakaha dačynieńnia da ciapierašniaha kłasičnaha teatra heta nie budzie mieć dačynieńnia».

Raskoł u TIUHU i źmianieńnie mastackaha kursa moža mieć admoŭnyja nastupstvy dla nacyjanalnaj kultury. TIUH – adzin z čatyroch teatralnych kalektyvaŭ krainy, pastanoŭku ŭ jakim iduć vyklučna na biełaruskaj movie.

Ciapier rašeńnie za Ministerstvam kultury.

• 0
• 0
• 0
• 0
• 0
• 0
• 1
• 0