Трупа Беларускага тэатра юнага гледача аб’явіла вотум недаверу дырэктару
Яны пратэстуюць супраць спробы панізіць статус мастацкага кіраўніка, рэжысёра Уладзіміра Савіцкага.
У канфлікту ёсць як асабісты, так і творчы аспект. Трупу абурыў той факт, што новы дырэктар узяў курс на стварэнне забаўляльнага прадукту. Акцёры хацелі б захаваць тэатр асветніцкім.
Апошнія гады сталі вельмі цяжкімі для Тэатра юнага гледача. У 2008 годзе было аб’яўлена пра рэканструкцыю тэатра. Калектыў выехаў са свайго будынку на Энгельса, 26.
Спектаклі ТЮГа ішлі на сцэне Дома літаратара. А ўсе службы размяшчаліся на ўскраіне горада — на плошчы Казінца.
Рэканструкцыя пачалася толькі ў лістападзе 2011 года.
Зразумела, што такая атмасфера не спрыяла творчым пошукам. Але ТЮГ рэгулярна паказваў беларускамоўныя спектаклі для дзяцей і моладзі.
Сярод рэпертуару для дарослых ёсць «Мiхалава зямля» (сцэнічны варыянт паводле паэмы Якуба Коласа «Новая зямля»), «Майго юнацтва крылы» (паводле паэмы Аркадзя Куляшова «Хамуціус» пра Кастуся Каліноўскага) і «Пан міністар» Францішка Аляхновіча.
Апошнім часам ТЮГ чакаў завяршэння рэканструкцыі. Супрацоўнікі спадзяваліся ўжо летам вярнуцца ў родны будынак і пачаць там новы сезон. У якасці адкрыцця планавалі паказаць «Сінію птушку» Морыса Метэрлінка, лаўрэата Нобелеўскай прэміі па літаратуры.
Але дырэктар тэатра Мікалай Казюлін меў сумневы што да гэтай пастаноўкі.
Казюлін прапанаваў скасаваць пасаду мастацкага кіраўніка, які па юрыдычным статусе роўны дырэктару.
Ад 2010 яе займаў рэжысёр Уладзімір Савіцкі. Раней ён працаваў у Купалаўскім тэатры і паставіў там «Дзікае паляванне караля Стаха» – адно з найлепшых увасабленняў твораў Уладзіміра Караткевіча на беларускай сцэне. Казюлін прапанаваў замяніць пасаду мастацкага кіраўніка на пасаду галоўнага рэжысёра, які павінен падпарадкоўвацца дырэктару.
У адказ на пасяджэнні мастацкай рады калектыў ТЮГа пастанавеў аб'явіць вотум недаверу Мікалаю Казюліну.
Актрыса Вера Кавалерава, адна з зорак ТЮГа, заявіла «Інтэрфаксу», што «Казюлін збіраецца зрабіць з нашага тэатра шоу, і не хавае гэтага. Ён мяркуе, што мы не павінны выхоўваць праз свае спектаклі, а толькі забаўляць гледачоў».
Тая ж Кавалерава сцвярджае, што «калі Казюлін застанецца, а Савіцкі сыдзе – тэатра не будзе. Сыдзе вялікая частка акцёраў. Можа, пад маркай ТЮГа і будзе існаваць нешта іншае, але ніякага дачынення да цяперашняга класічнага тэатра гэта не будзе мець дачынення».
Раскол у ТЮГУ і змяненне мастацкага курса можа мець адмоўныя наступствы для нацыянальнай культуры. ТЮГ – адзін з чатырох тэатральных калектываў краіны, пастаноўку ў якім ідуць выключна на беларускай мове.
Цяпер рашэнне за Міністэрствам культуры.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Каментары