Paŭstaniec Kalinoŭskaha, jaki pražyŭ 108 hadoŭ

Imia apošniaha kalinoŭca Ihnata Abramoviča dla hramadskaści adkryŭ na pačatku 2000-ch krajaznaŭca ź vioski Krasnaje Aleś Charyton. Abramovič pražyŭ najdaŭžej z paŭstancaŭ Kalinoŭskaha ŭ Biełarusi. Ale dahetul zastavalisia nieviadomymi cikavyja fakty ź jahonaj bijahrafii. Ich udałosia ŭznavić pry dapamozie naščadkaŭ paŭstanca.

Naradziŭsia ŭ Subotnikach

Ihnat (Ihnacy) Abramovič naradziŭsia ŭ vakolicach rodnaje vioski Zianona Paźniaka Subotniki (Iviejski rajon, Hrodzienskaja vobłaść). Chłopčyk byŭ achryščany ŭ miascovym kaściole Sv. Juryja Pakutnika. Cikava, što funduš na pabudovu hetaha kaścioła daŭ jaho vierahodny svajak Ihnata Jury Abramovič z Varnianaŭ u 1774.

Błytanina z dataj naradžeńnia

U roznych krynicach nazyvajucca roznyja daty naradžeńnia Ihnata Abramoviča: ci to 1836, ci to 1839. Apošniaja data paznačana na nadhrobku paŭstanca. Ale Dziaržaŭny zanalny archiŭ Maładziečna ličyć słušnaj pieršuju datu. A ŭnučka kalinoŭca śćviardžaje, što Abramovič pamior u 106 hod. Mažliva, błytaninu z datami śviadoma zładziŭ sam paŭstaniec, kab zabłytać karnyja orhany.

Sasłany ŭ Sibir

Kali vybuchnuła paŭstańnie, Ihnatu było 24 (kali pahadzicca z dataj naradžeńnia na pomniku) ci 26 hadoŭ. Majomaść jaho siamji padčas bajavych dziejańniaŭ była kanfiskavana, a budynak radavoj siadziby carskija vojski spalili razam ź ciełami zabitych svajakoŭ. Za ŭdzieł u paŭstańni Abramovič adbyŭ 12 hod na katarzie ŭ Sibiry.

Viartańnie na Radzimu

Paśla viartańnia kalinoviec uładkavaŭsia ŭpraŭlajučym majontka ŭ vakolicach Čanstachovy (Polšča). Ihnat samavukam atrymaŭ adukacyju i ažaniŭsia ź dziaŭčynaj z rodu Šabłoŭskich. Na žal, žonku Ihnata napatkaŭ trahičny los: trapiła pad ciahnik. Paźniej Abramovič pierabraŭsia ŭ viosku Krasnaje, što pad Maładziečnam, dzie i dažyŭ da samaj śmierci ŭ 1944. 

Lejtenant paŭstańnia

U 1933 polskija ŭłady ŭznaharodzili Ihnata Abramoviča Pamiatnym Kryžom da 70-hodździa paŭstańnia. U 1938 jon byŭ zaprošany ŭ Varšavu na 75-ja ŭhodki. Vieteranu vydali za košt vajskovaha biudžetu 16 złotych na darohu. U tym ža hodzie Abramovič atrymaŭ Bronzavy Kryž Zasłuhi. Zachavałasia paśviedčańnie za podpisam premjera apošniaha ŭrada davajennaj Polščy hienierała Fielicyjana Słavoj-Składkoŭskaha. Ihnat Abramovič, jak i ŭsie inšyja žyvyja paŭstancy, byŭ padvyšany da pieršaha aficerskaha zvańnia (lejtenant).

Hanarovaja forma vieterana

Da skonu Abramovič chadziŭ u paŭstanckaj kanfiederatcy. Taksama dla vieteranaŭ uvodziłasia paradnaja forma. Zachavaŭsia fotazdymak Ihnata Abramoviča 1930-ch hadoŭ, dzie jon adpaviedna apranuty ŭ ciomna-sini surdut i šapku-rahatoŭku (kanfiederatku).

Naščadki paŭstanca

Viadoma, što Abramovič mieŭ dačku i čatyroch synoŭ. Dzieci stali technikami dy inžynierami. Praŭnuk Ździsłaŭ Abramovič žyvie ŭ polskim Balasłaŭcy. Mienavita ŭ jahonym archivie zachoŭvajucca ŭznaharody i dakumienty pradzieda.

Kožny achvočy moža naviedać mahiłu Ihnata Abramoviča ŭ Krasnym. Nadhrobak znachodzicca na starych katalickich mohiłkach. Nie zabyvajma našych hierojaŭ! 

• 0
• 0
• 0
• 0
• 0
• 0
• 0
• 0