Abama — Jacaniuku: Kali Rasija budzie zastavacca na abranym joj šlachu, jana zapłacić za heta

Prezident ZŠA Barak Abama, vitajučy ŭkrainskaha premjer-ministra Arsienija Jacaniuka ŭ Biełym domie, vykazaŭ svajo zachapleńnie advahaj ukrainskaha naroda, jaki zmahajecca za demakratyju i ŭniviersalnaje prava samim vybirać svaju budučyniu.

Padajem detali hetych pieramovaŭ pavodle paviedamleńniaŭ «Hołasu Amieryki».

Što Abama skazaŭ Jacaniuku

Pavodle słovaŭ Baraka Abamy, paśla taho jak Viktar Janukovič źbieh, Viarchoŭnaja Rada Ukrainy pryniała na siabie adkaznaść za zapaŭnieńnie ŭładnaha vakuumu i sfarmavała ŭrad, jaki ciapier ažyćciaŭlaje reformy, a taksama viadzie pieramovy z MVF. I samaje hałoŭnaje, skazaŭ Abama, Viarchoŭnaja Rada maje ćviordy namier pravieści daterminovyja vybary, na jakich ukrainski narod sam zmoža abrać novuju ŭładu.

Amierykanski prezident, u pryvatnaści, adznačyŭ: «Najbolšaje vyprabavańnie, pierad jakim staić Ukraina, — heta pahroza jaje terytaryjalnaj cełasnaści i suvierenitetu.

My dakładna zajaŭlajem, što ličym rasijskaje ŭvarvańnie ŭ Krym, prasoŭvańnie za miežy jaje vajennych bazaŭ parušeńniem mižnarodnych zakonaŭ i mižnarodnych damoŭlenaściaŭ, jakija Rasija padpisała, i parušeńniem terytaryjalnaj cełasnaści i suvierenitetu Ukrainy.

My ŭžo kazali, što zastajomsia z Ukrainaj i ŭkrainskim narodam, kab zabiaśpiečyć zachavańnie jaje terytaryjalnaj cełasnaści i suvierenitetu. My ŭsio viedajem pra histaryčnyja adnosiny Rasii i Ukrainy, i ja dumaju, premjer-ministr pieršym heta paćvierdzić.

Jon i ŭkrainski ŭrad u Kijevie najpierš źviarnulisia da Rasijskaj Fiederacyi, kab vyrašyć prablemu dypłamatyčnym šlacham.

Ale, ja dumaju, premjer-ministr spraviadliva nastojvaje, što inšaja kraina nie moža dyktavać, jak Ukrainie vieści svaje spravy. Zadziejničany kanstytucyjny praces, pryznačanyja vybary, jakija mohuć pryvieści da jakich-niebudź źmienaŭ statusu Kryma, ale heta nie pavinna rabicca pad rulaj pistaleta».

Barak Abama taksama papiaredziŭ Rasiju i zaklikaŭ Pucina vybrać dypłamatyčny šlach vyrašeńnia prablemy:

«My budziem i nadalej kazać rasijskamu ŭradu, što, kali jany buduć zastavacca na abranym imi šlachu, nie tolki my, ale i mižnarodnaja supolnaść, i ES buduć vymušanyja prymusić Rasiju zapłacić za parušeńnie mižnarodnych zakonaŭ z-za ŭmiašańnia va Ukrainu.

Isnuje inšy šlach, i my spadziajemsia, što prezident Pucin hatovy stać na hety šlach. Ale, kali jon nie zachoča, ja pierakanany, što mižnarodnaja supolnaść družna stanie na bok ukrainskaha ŭrada i padtrymaje adzinstva i cełasnaść Ukrainy».

Amerykanski prezident nazvaŭ referendum u Krymie nielehitymnym, skazaŭ, što jon budzie pravodzicca pad rulami aŭtamataŭ.

Hetaja damova, skazaŭ Abama, parušaje ŭnutranaje ŭkrainskaje i mižnarodnaje zakanadaŭstvy.

Jon adchiliŭ tłumačeńni Pucina pra toje, što padobnyja pracesy prachodzili ŭ inšych krainach.

U tych vypadkach, skazaŭ Abama, adbyvaŭsia praciahły praces, častkaj jakoha byŭ centralny ŭrad, i nivodzin z bakoŭ nie ŭvodziŭ na terytoryju inšaha vojski. ZŠA hety referendum nie pryznajuć.

Taksama Abama skazaŭ, što ZŠA daduć Ukrainie pakiet dapamohi, i źviarnuŭsia ŭ Kanhres z prośbaj jak maha chutčej pryniać zakon, jaki harantuje pradstaŭleńnie Ukrainie kredytu na sumu ŭ 1 miljard dalaraŭ.

• 0
• 0
• 0
• 0
• 0
• 0
• 0
• 0