Niadaŭnija padziei ŭ Kijevie i Krymie stali nahodaj dla Alaksandra Łukašenki ŭzhadać biełaruskuju Płošču 2010 hoda. Nahadajem, tady ŭ Minsku niekalki dziasiatkaŭ tysiač demanstrantaŭ u Minsku pratestavali suprać falšavańnia vybaraŭ i zapatrabavali sychodu Łukašenki. Pratesty byli žorstka razahnanyja, prynamsi 698 čałaviek atrymali administratyŭnyja, a 50 — kryminalnyja terminy. Jašče sotni byli źbityja, prajšli dopyty, stracili pracu.
Uviečary 28 sakavika Pieršy nacyjanalny kanał Ukrainy pakazaŭ amal dvuchhadzinnaje intervju Alaksandra Łukašenki Saviku Šusteru dla pieradačy «Šuster LIVE». Kiraŭnik Biełarusi vykazaŭ svaju pazicyju adnosna padziejaŭ va Ukrainie, na Majdanie, pra zachop Kijeva Rasijaj i siarod inšaha ŭzhadaŭ «biełaruski majdan». U intervju Łukašenka, adnak, nastojvaŭ na staroj viersii padziej u 2010. Voś što jon skazaŭ:
«Nu viedajecie, heta na ekranie tak pakazvajuć. Heta ŭsio i my prachodzili ŭ 2010 hodzie. «Pravy siektar» da nas pryjazdžaŭ, tady jon pa-inšamu nazyvaŭsia. Jany ŭ 2006 hodzie sprabavali mašyny ŭ nas pierakulać i h.d. [vidać, majecca na ŭvazie pryjezd UNA-UNSO ŭ 1996]. Nie skažu, što my zamocna pryvodzili ŭ pacućci, ale pryviali ŭ 2006 hodzie».
«U 2010 hodzie, padajecca, tak elehantna abyšlisia. Tych, chto łamaŭ, krušyŭ, tych pakinuli. Čałaviek 6 nakiravali ŭ kamiery. Ale heta było źniata ukrainskim telebačańniem, rasijskim, CNN, BBC i inšyja. My ŭ žurnalistaŭ paprasili ŭ dvuchkośsi stužački ich usie ŭ hety momant. I ranicoj im viarnuli, kapiravali ich. A potym u sudzie pakazali. Kali nas pačali z Zachadu dušyć — voś Łukašenka, dyktatura i inšaje — nie, voś, pahladzicie, heta nie našaje telebačańnie, heta vy zdymali. Voś łom, voś zatočka, voś rydloŭki, voś łamajuć dźviery, voś tvary — usio ž było! I tolki tyja, chto arhanizavaŭ i łamaŭ, niepasredna, jany apynulisia ŭ kamierach. Vypuścili, zastałosia dva ci try čałavieki, za što nas ciarobić Zachad, što heta palitźniavolenyja».
«Zaraz naš narod kaža tak: voś, kali b Łukašenka zrabiŭ, jak Janukovič, to ŭ nas było b zaraz heta. Nu a śpiecsłužby našyja zafiksavali: viedajecie, adkul kiravali našym Majdanam? Z Kijeva. Naŭprost da taho, što kankretnym ludziam: «Nu čo, my tut u Domie ŭrada, — jon kaža, — voś łamajem dźviery». — «Dyk zachodź, siadaj u kresła premjer-ministra i pačynaj kamandavać». Mnie potym pieradavali hetyja razmovy, ja dahetul pamiataju: kankretnamu čałavieku. A jon staić: «Dyk jak zachodź, strašnavata». — «Jak strašnavata, zachodź, zaŭtra rankam raźbiaremsia».
«Nu my cichieńka hałavu hetuju adrezali, raziavaki raźbiehlisia. Ich było čałaviek čatyrasta, napeŭna, tych, jakija kala dźviarej Doma ŭrada apynulisia, tam ža ŭ formie «P» budynak. I pačali ich sarciravać. Vypuścili čałaviek 300 adrazu, chto raziavakami byŭ, chto prychilnikami, ale jany nie łamali i nie bili. A sto ź niečym čałaviek advieźli ŭ raźmierkavalnik. Za noč čałaviek 50 vypuścili, 50 zastałosia. Ahułam u sud patrapiła čałaviek 20, napeŭna [ahulnaja kolkaść asudžanych sudami tady skłała, prynamsi, 698 čałaviek — NN]. Nikomu hałavu nie prałamili, ślezaciečny haz na vykarystoŭvali, vadamioty nie vykarystoŭvali, nijakich kaktejlaŭ Mołatava nie było. Jak patrebna zrabili amapaŭcy. Ja niepasredna kiravaŭ hetym pracesam. Nijakaja ni Rasija, nijakija ni admirały, ni hienierały. Asabliva ŭ centry. Ja ŭsio heta bačyŭ, tam dziasiatki kamier na hetaj płoščy — režymny ž budynak. Ja bačyŭ usio, što adbyvałasia».
«Ja adrazu skazaŭ: kali buduć plavać u tvar milicyi, amapu, sałdatam, nie daj boh ruku padymuć – imhniennaja reakcyja adekvatnaja. Nichto nie plavaŭ, plunuŭ – pa mordzie atrymaŭ. Niekalki čałaviek, mnie potym dakłali, atrymali. Ty nie maješ prava dakranacca da pradstaŭnika ŭłady».
«A chto kiravaŭ z Kijeva, ja dakładna nie viedaju. Ale i ŭ nas takija atrady rychtavalisia, pad Brestam, u Polščy i ŭ Zachodniaj Ukrainie. My ich chutka vykinuli. U KDB dahetul kadry lažać, heta ŭsio fiksavali. Ale heta było nieprymalna dla nas i my ich pavykidyvali. Jany rychtavalisia tam. I paśla taho, jak my im mardasam ŭ 2006 hodzie nadavali (jany tolki-tolki tam naradžalisia, ukraincy ich vučyli), jany, kaniečnie, zub na mianie trymali, ale pavažali. Kazali: «Tak, pa mordzie ad baćki atrymali, ale pa zasłuhach. Jon adkryta da nas vyjšaŭ i pa mordzie nam nadavaŭ». I da 2010 hoda rychtavalisia i ŭ 2010-m atrymali, ale tam užo našyja napieradzie išli. U nas ich 400 čałaviek u krainie, my ich usich viedajem pajmienna, apazicyjanieraŭ jarych. Bajevikoŭ — nu ja nie viedaju… Jany tak dziejničali, bajusia skazać, napeŭna takich i niama. U nas nie takija admarozki».
