Siońnia, 22 krasavika, adbyłasia sustreča kandydata na pasadu prezidenta Ukrainy Piatra Parašenki ź vice-prezidentam ZŠA Džo Bajdenam.
Pa zakančeńni sustrečy Parašenka zajaviŭ: «ZŠA zastajucca našym nadziejnym sajuźnikam. Siońnia adbyłasia vielmi pramaja i ščyraja razmova. Nie było nijakich revieransaŭ. Hučali vyrazna pastaŭlenyja pytańni ab tym, jak my možam uzmacnić naša ŭzajemadziejańnie dla dasiahnieńnia zachavańnia suvierenitetu Ukrainy i stabilizacyi situacyi ŭ krainie, jak kancentravać namahańni dla ekanamičnaha rostu».
«Klučavaja pazicyja — Ukraina pavinna žyć pa-novamu. Dla hetaha nam treba abjadnać dziaržavu.
U pieršuju čarhu my pavinny ŭdzialić uvahu tym, chto žyvie na Uschodzie Ukrainy. My pavinny harantavać ludziam biaśpieku, pracoŭnyja miescy i ŭstojlivy ekanamičny rost.
U toj ža čas, nijakaj talerantnaści da zabojcaŭ, nijakaj talerantnaści da sieparatystaŭ być nie moža», — adznačyŭ Parašenka.
«Pravaachoŭnyja orhany Ukrainy pavinny dziejničać rašuča. Tym, chto nie skarystaŭsia amnistyjaj, dla tych, chto admaŭlajecca skłaści zbroju, dla tych, chto nie źbirajecca ŭstupać u dyjałoh i pačynać mirnaje žyćcio — pravaachoŭniki pavinny dać nieadkładny i chutki adkaz», — dadaŭ jon.
Druhoje pytańnie, jakoje abmiarkoŭvali na sustrečy — vielmi žorstkaja i efiektyŭnaja baraćba z karupcyjaj.
«Hałoŭnaje, što vyvodzić ludziej na majdany, što razdražniaje ich — heta nie tolki i nie stolki mova, na jakoj jany kamunikujuć, nie fiederalizacyja abo kanstytucyja, u pieršuju čarhu ŭsich aburaje tatalnaja karupcyja, jakaja paralizavała funkcyjanavańnie ŭkrainskaj dziaržavy. Zruchi i dasiahnieńni, jakija adbylisia va Ukrainie, źjaŭlajucca całkam niedastatkovymi, kab adčuć vyniki antykarupcyjnaj dziejnaści, što adznačyŭ Džo Bajden. Ja zhodny z hetym mierkavańniem», — zajaviŭ Parašenka.
Piatro Parašenka adznačyŭ, što Ukraina čakaje pastupleńnia finansavaj dapamohi, a taksama rychtujecca padpisać miemarandum ź Mižnarodnym valutnym fondam.
«U cełym kala 27 młrd dalaraŭ pastupić u vyhladzie skaardynavanaj dapamohi. Ale nivodnaj kapiejki kraina nie atrymaje, kali nie prademanstruje rašučyja kroki ŭ baraćbie z karupcyjaj, z harantyjaj taho, što nivodnaja kapiejka sa srodkaŭ padatkapłacielščykaŭ usiaho śvietu budzie vydatkavanaja nie pa pryznačeńni. I ja pierakanany, što heta i budzie adkaz na pytańni biaśpieki, ekanamičnaha raźvićcia i intehracyi Ukrainy ŭ suśvietnuju supolnaść», — padkreśliŭ jon.
Asobna na sustrečy abmiarkoŭvali temu ab stanie ŭzbrojenych sił Ukrainy.
Na dumku Parašenki, prablema nie ŭ adsutnaści abo najaŭnaści zbroi, a ŭ funkcyjanalnaj niazdolnaści uzbrojenych sił, pravaachoŭnych orhanaŭ i śpiecsłužbaŭ harantavać biaśpieku dziaržavy.
Na žal, adznačyŭ Piatro Parašenka, uzbrojenyja siły časta robiać kroki, jakija dyskredytujuć siłavyja orhany i ŭzbrojenyja siły, a taksama dyskredytujuć dziaržavu.
«Siońnia vyznačany dakładnyja i nieabchodnyja kroki, jakija pavinny być zrobleny ŭ pieršuju čarhu dla pavyšeńnia bajazdolnaści siłavych struktur», — padkreśliŭ jon.
Ciapier čytajuć
«Padniaŭ by ž*pu, prajechaŭ pa mahazinach». Praŭładnaja błohierka abrynułasia na Azaronka za chłuśniu pra bulbu19
Kamientary