Сёння, 22 красавіка, адбылася сустрэча кандыдата на пасаду прэзідэнта Украіны Пятра Парашэнкі з віцэ-прэзідэнтам ЗША Джо Байдэнам.
Па заканчэнні сустрэчы Парашэнка заявіў: «ЗША застаюцца нашым надзейным саюзнікам. Сёння адбылася вельмі прамая і шчырая размова. Не было ніякіх рэверансаў. Гучалі выразна пастаўленыя пытанні аб тым, як мы можам узмацніць наша ўзаемадзеянне для дасягнення захавання суверэнітэту Украіны і стабілізацыі сітуацыі ў краіне, як канцэнтраваць намаганні для эканамічнага росту».
«Ключавая пазіцыя — Украіна павінна жыць па-новаму. Для гэтага нам трэба аб'яднаць дзяржаву.
У першую чаргу мы павінны ўдзяліць увагу тым, хто жыве на Усходзе Украіны. Мы павінны гарантаваць людзям бяспеку, працоўныя месцы і ўстойлівы эканамічны рост.
У той жа час, ніякай талерантнасці да забойцаў, ніякай талерантнасці да сепаратыстаў быць не можа», — адзначыў Парашэнка.
«Праваахоўныя органы Украіны павінны дзейнічаць рашуча. Тым, хто не скарыстаўся амністыяй, для тых, хто адмаўляецца скласці зброю, для тых, хто не збіраецца ўступаць у дыялог і пачынаць мірнае жыццё — праваахоўнікі павінны даць неадкладны і хуткі адказ», — дадаў ён.
Другое пытанне, якое абмяркоўвалі на сустрэчы — вельмі жорсткая і эфектыўная барацьба з карупцыяй.
«Галоўнае, што выводзіць людзей на майданы, што раздражняе іх — гэта не толькі і не столькі мова, на якой яны камунікуюць, не федэралізацыя або канстытуцыя, у першую чаргу ўсіх абурае татальная карупцыя, якая паралізавала функцыянаванне ўкраінскай дзяржавы. Зрухі і дасягненні, якія адбыліся ва Украіне, з'яўляюцца цалкам недастатковымі, каб адчуць вынікі антыкарупцыйнай дзейнасці, што адзначыў Джо Байдэн. Я згодны з гэтым меркаваннем», — заявіў Парашэнка.
Пятро Парашэнка адзначыў, што Украіна чакае паступлення фінансавай дапамогі, а таксама рыхтуецца падпісаць мемарандум з Міжнародным валютным фондам.
«У цэлым каля 27 млрд даляраў паступіць у выглядзе скаардынаванай дапамогі. Але ніводнай капейкі краіна не атрымае, калі не прадэманструе рашучыя крокі ў барацьбе з карупцыяй, з гарантыяй таго, што ніводная капейка са сродкаў падаткаплацельшчыкаў усяго свету будзе выдаткаваная не па прызначэнні. І я перакананы, што гэта і будзе адказ на пытанні бяспекі, эканамічнага развіцця і інтэграцыі Украіны ў сусветную супольнасць», — падкрэсліў ён.
Асобна на сустрэчы абмяркоўвалі тэму аб стане ўзброеных сіл Украіны.
На думку Парашэнкі, праблема не ў адсутнасці або наяўнасці зброі, а ў функцыянальнай няздольнасці узброеных сіл, праваахоўных органаў і спецслужбаў гарантаваць бяспеку дзяржавы.
На жаль, адзначыў Пятро Парашэнка, узброеныя сілы часта робяць крокі, якія дыскрэдытуюць сілавыя органы і ўзброеныя сілы, а таксама дыскрэдытуюць дзяржаву.
«Сёння вызначаны дакладныя і неабходныя крокі, якія павінны быць зроблены ў першую чаргу для павышэння баяздольнасці сілавых структур», — падкрэсліў ён.
Цяпер чытаюць
Выйшаў на свабоду беларус, якога ў свой час прысудзілі да пажыццёвага зняволення. Гэта першы вядомы такі выпадак9
Каментары