Historyk Piatro Piatroŭski: Biełarusi nieabchodnyja novyja dziaržaŭnyja simvały

U Biełarusi nieabchodna pryniać novyja dziaržaŭnyja simvały, stvoranyja na asnovie sintezu raniejšaj i sučasnaj simvoliki. Takoje mierkavańnie vykazaŭ historyk, kiraŭnik kansiervatyŭnaha centra NOMOS Piatro Piatroŭski, vystupajučy 14 maja na kruhłym stale, arhanizavanym hramadzianskaj kampanijaj «Havary praŭdu». 

Pavodle jaho słoŭ, histaryčny bieł-čyrvona-bieły ściah i hierb «Pahonia», jakija słužyli dziaržaŭnaj simvolikaj u 1991—1995 hadach, i simvały sučasnaj Biełarusi — heta admietnyja simvały dvuch prajektaŭ, jakija historyk nazyvaje «Biełaruś lićvinskaja» i «Biełaruś savieckaja». 

«U adzin čas na hrebni chvali byŭ lićvinski prajekt, jon pieravažaŭ; ciapier bolš apielacyj da idej BSSR, — adznačyŭ Piatroŭski. — Ale siońnia my pavinny vyjści za paradyhmy «Biełarusi lićvinskaj» i «Biełarusi savieckaj» i, jak kazaŭ Hiehiel, zrabić sintez». 

Kiraŭnik centra NOMOS skazaŭ, što na siońnia bieł-čyrvona-biełamu ściahu pryśviečana šmat daśledavańniaŭ: «Usie viedajuć, što jon źjaviŭsia ŭ 1917 hodzie, jaho raspracoŭščykam byŭ Duž-Dušeŭski, heta fakt». «Što da čyrvona-zialonaha ściaha, to taksama viadoma, chto jaho raspracavaŭ. U im, darečy, taksama jość archaičny płast — arnamient. Cikava, što ŭ savieckija časy litoŭskija i łatyšskija kamunisty zajzdrościli BSSR, tamu što ŭ jaje byŭ samy archaičny ściah», — padkreśliŭ historyk. 

Sučasnaj Biełarusi, ličyć Piatroŭski, nieabchodny «prajekt, jaki ŭźjadnaŭ by nacyju», i, adpaviedna, simvały, jakija b spałučali elemienty raniejšych kulturnych płastoŭ. U jakaści ściaha jon prapanuje dziaržaŭny ściah Vialikaha Kniastva Litoŭskaha, jaki ŭjaŭlaje saboj pałatno čyrvonaha koleru z namalavanym pa centry hierbam «Pahonia». 

«Na moj pohlad, treciaja, novaja Biełaruś pavinna raspracavać kampramisny varyjant dziaržaŭnych simvałaŭ, — skazaŭ historyk. — Heta moža być hierb «Pahonia», bo jaho pryznajuć u tym liku i dziejnyja ŭłady. A ściaham moža stać ściah VKŁ — jon spałučaje čyrvony ściah pieramohi ŭ Vialikaj Ajčynnaj vajnie i hierb «Pahonia». Takim čynam, siońnia ŭ nas staić zadača nie zacyklicca na minułym, a dumać pra budučyniu». 

Historyja pavinna abjadnoŭvać hramadstva, a nie padzialać jaho, dadaŭ Piatroŭski.

• 0
• 0
• 0
• 0
• 0
• 0
• 0
• 0