Za kaho buduć zaŭzieć biełarusy na čempijanacie śvietu?

Julija Laškievič, rekłamny kansultant: «Italija. Mnie padabajecca styl hulni hetaj kamandy. Niekatoryja nie lubiać italjancaŭ, bo, zabiŭšy hoł, jany mohuć adyści ŭ hłuchuju viazkuju abaronu, a ja lublu. I jašče mnie padabajecca, što ŭ samych składanych situacyjach jany mohuć damahčysia svajho».

Michaś Mazanik, mašynist ciahnika: «Budu zaŭzieć za Hiermaniju. Apošnija dva mundyjali dla ich skončylisia nie vielmi ŭdała — druhoje i treciaje miescy. Spadziajusia, što na hety raz buduć pieršyja. I pa składzie jany vielmi mocnyja. Taksama budu padtrymlivać Bielhiju, Paŭdniovuju Kareju i Ałžyr, bo jany supierniki Rasii».

Alaksiej Važnik, mieniedžar pa rabocie z klijentami: «Budu zaŭzieć za Anhliju, tamu što mnie zaŭsiody było cikava padtrymlivać hetych niebarakaŭ. Jany amal kožny čempijanat śvietu majuć adzin z najlepšych składaŭ, ale nie vyrašajuć peŭnyja psichałahičnyja prablemy, časta —mienavita lidaraŭ kamandy (Haskojn, Bekchiem, ciapier — Runi?). U hetam hodzie Chodžsan pryvioz pierśpiektyŭnuju maładuju kamandu, jakaja moža pierałamać tradycyi».

Iryna Koźlik, karespandent «Komsomolskoj pravdy v Biełarusi»: «Za ispancaŭ. I krychu za niemcaŭ. Apošnija siem hadoŭ zaŭzieju za ispancaŭ. Prosta supali ich hrandyjoznyja pośpiechi i maja luboŭ da hetaj krainy. Lublu «Barsiełonu», padabajecca «Reał». Była ź cikavaści na stadyjonach u Barsie i Madrydzie. Ispanskaja zbornaja padajecca mnie idealnaj kamandaj — najlepšyja futbalisty dźviuch kamand hulajuć u joj».

Jakub Trafimovič, prajekciroŭ-ščyk tunielaŭ: «Anhlija — bałans maładych i ŭzrostavych hulcoŭ, pačali hulać bolš dynamična — heta ŭžo nie toj anhielski futboł, jaki my zvyklisia bačyć. Bielhija — najlepšyja maładyja hulcy Jeŭropy, mahčyma, navat śvietu, amal kožny ź ich — zorka svajho kłuba. Uruhvaj —dobraja łacinaamierykanskaja kamanda, tam jość Suares, jaki ciahnie «Livierpul» i jaki zmoža vyciahnuć Uruhvaj, a Kavani jamu ŭ hetym dapamoža!»

Viera Pierahudava, dyzajnier: «Za Partuhaliju. Zaŭzieju za ich ź dziacinstva. Da taho ž na apošnim Jeŭra jany pakazali siabie niakiepska, vyjšli ŭ paŭfinał».

Vital Cyhankoŭ, žurnalist radyjo «Svaboda»: «Pryznajusia, u mianie niama na hetym čempijanacie adnaznačna ŭlubionaj kamandy, jakoj ja hatovy addać usiu svaju zaŭziatarskuju dušu. Prosta ja nie naležu da toj katehoryi ludziej, jakija dziesiacihodździami zaŭziejuć za niejkuju adnu kamandu, niezaležna ad jaje vynikaŭ i jakaści hulni. Ja chvareju za jakaść i pryhažość futboła, tamu časta maje simpatyi naradžajucca tolki ŭ pracesie čempijanatu, kali niejkaja zbornaja jarka i pryhoža siabie prajaŭlaje — na apošnim mundzijali takoj kamandaj dla mianie stała Hiermanija.

Mahu skazać, kamu ja nie žadaju pieramohi ŭ Brazilii: heta Ispanija, jakaja daŭno ŭžo mianie prytamiła svaim stylem hulni i nadakučyła svaimi pieramohami. Niama za kaho začapicca mnie i ŭ zbornaj Brazilii — nadziva, tam nie vidać supierzorak (Niejmar pakul nie ciahnie), i tamu ty nie razumieješ, chto ž moža vyklikać tvaju simpatyju. Łakalnych pośpiechaŭ zyču Paŭdniovaj Karei (vychad z hrupy), Uruhvaju (paŭfinał), Hałandyi (tradycyjna)

A voś dźvie kamandy, jakim mnie chočacca zyčyć udačy – heta Hiermanija (za svoj viasioły atakujučy styl) i Arhiencina. Arhiencina – vyklučna z-za Miesi. Ja razumieju, što kali nacyjanalnaja kamanda znoŭ pravalicca na čempijanacie śvietu, to Miesi, nie hledziačy na ŭsie kłubnyja pośpiechi, nikoli nie budzie razhladacca ŭ futbolnaj historyi na ŭzroŭni Piele, Maradony, Zidana, Kruifa. A jon hetaha zasłuhoŭvaje».

Alaksandr Paškievič, historyk, redaktar časopisa «Arche»: «Za Bośniju. Ja zvyčajna na ŭsich spabornictvach simpatyzuju nievialikim krainam, mała viadomym svaimi spartyŭnymi dasiahnieńniami. Pieradusim, naturalna, jeŭrapiejskim. Na hetym čempijanacie Bośnija —akurat toje, što dadzienamu kryteryju adpaviadaje».

Natalla Rudak, nastaŭnica: «Budu zaŭzieć za Hiermaniju, bo ź dziacinstva cikaŭlusia niamieckaj historyjaj, kulturaj i sportam, šmat što ŭ maim žyćci źviazana z hetaj krainaj. Niekalki hadoŭ zaŭzieju za «Bavaryju» i niamieckuju zbornuju, a prahlad spartovych pieradač i čytańnie artykułaŭ —dobraja i cikavaja moŭnaja praktyka».

Alaksandr Zimoŭski, były staršynia «Biełteleradyjokampanii»: «Zaŭziatar ź mianie nie vielmi, tamu budu hladzieć niemcaŭ, u asnoŭnym ja za ich zaŭzieju, ale biez fanatyzmu».

Źmicier Sałoškin, lekar: «Ispanija. Padabajecca hulnia kamandy, jakuju jany pakazvajuć apošnija hady. Padabajecca kraina. Ludzi. Tempieramient. Žarść pavinna pieramahać raźlik!A jašče Čyli. Abaviazkova tudy chaču źjeździć. Chacia hulniaŭ zbornaj nie bačyŭ».

Mikałaj Chalezin, kiraŭnik «Svabodnaha teatra»: «Moj pryjarytet «trochjarusny». U pieršuju čarhu — za Anhliju; u druhuju, tradycyjna — za Partuhaliju. Treci ešałon zaŭzieńnia — niekalki krain: Brazilija, Ispanija, Uruhvaj».

Hladzi taksama: Futboł i faveły: siońnia startuje Čempijanat śvietu pa futbole

Piać kamand čempijanatu, na jakija varta źviarnuć uvahu

• 0
• 0
• 0
• 0
• 0
• 0
• 0
• 0