Ukraina vymušana całkam spynić ekspart kandytarskich vyrabaŭ u Biełaruś. Ab hetym zajaŭlaje asacyjacyja «Ukrkandpram».
Pavodle słoŭ kiraŭnika asacyjacyi Alaksandra Bałdziniuka, rašeńnie ŭrada Biełarusi pra ŭviadzieńnie licenzavańnia impartu kandytarskich vyrabaŭ «pryviało da poŭnaha prypynieńnia ŭvozu ŭkrainskich łasunkaŭ u Biełaruś».
Pavodle mierkavańnia kiraŭnika «Ukrkandprama», jakoje pryvodzić pres-słužba asacyjacyi, biełaruskija čynoŭniki ŭ jakaści ŭmovy atrymańnia impartnych licenzij patrabujuć ad ukrainskich vytvorcaŭ značnaha zavyšeńnia cen na ŭkrainskija łasunki — u dyjapazonie ad 30% da 500% ad cen vytvorcy, — što «praktyčna poŭnaściu vyklučaje ich realizacyju biełaruskim spažyŭcam».
Kiraŭnik «Ukrkandprama» ličyć, što «rašeńnie biełaruskich uład, jakim Biełaruś daje sabie prava patrabavać ad ukrainskich vytvorcaŭ vykanańnia administracyjna ŭstanoŭlenych minimalnych cen na ich pradukcyju, supiarečyć mižnarodnym abaviazacielstvam Biełarusi, parušaje bazavyja pryncypy kankurencyi i ŭstanaŭlivaje nieraŭnapraŭnyja ŭmovy handlu ŭkrainskimi kandytarskimi vyrabami na biełaruskim rynku».
«Biełaruskija čynoŭniki adkryta topčucca pa abaronienych mižnarodnym pravam handlovych intaresach Ukrainy, navat nie turbujučy siabie choć by farmalnym vykanańniem mižnarodnych pahadnieńniaŭ», — adznačyŭ Bałdziniuk.
Pavodle padlikaŭ asacyjacyi, «ukazanyja niedružalubnyja i dyskryminacyjnyja dziejańni z boku Biełarusi nanosiać značny ŭron ukrainskaj dziaržavie, jakaja, z ulikam padzieńnia naličeńniaŭ padatku na prybytak, skaračeńnia valutnaj vyručki, skaračeńnia pracoŭnych miescaŭ u kandytarskaj halinie i ŭ sumiežnych cukrovaj, mučnoj, kruchmała-patačnaj, upakovačnaj, alejnatłuščavaj, małočnaj i inšych halinach, źnižeńnia adličeńniaŭ u fondy apłaty pracy i h. d., da kanca 2014 hoda składzie 130 młn. hryŭnaŭ».
Čakajecca pamianšeńnie ŭnutranaha popytu na cukar u abjomie 15 tys. ton, muku — 12 tys. ton, kruchmała-patačnuju pradukcyju — 7 tys. ton, alejnatłuščavuju pradukcyju — 3 tys. ton, małočnuju pradukcyju — 1 tys. ton. Heta rašeńnie taksama vykliča skaračeńnie pracoŭnych miescaŭ u APK — da 2,5 tys. čałaviek.
Asacyjacyja ŭ čarhovy raz zaklikała ŭrad Ukrainy pryniać adekvatnyja miery ŭ adkaz na niezakonnyja dziejańni z boku Biełarusi.
«Biełaruś nie ŭ pieršy raz hruba parušaje abaronienyja mižnarodnym zakanadaŭstvam handlova-ekanamičnyja pravy Ukrainy, — padkreśliŭ Bałdziniuk. — Nieefiektyŭnaje reahavańnie z boku ŭkrainskich uład tolki ŭmacavała biełaruskich čynoŭnikaŭ va ŭłasnaj biespakaranaści ŭ dačynieńni da niezakonnych dziejańniaŭ pa ŭkrainskich pradpryjemstvach».
Jak paviedamlałasia, 16 maja 2014 hoda Saviet ministraŭ Biełarusi pryniaŭ pastanovu № 469 «Ab licenzavańni impartu asobnych vidaŭ makaronnych vyrabaŭ, a taksama kandytarskich vyrabaŭ i syraviny dla ich vytvorčaści z-za miežaŭ adzinaj mytnaj terytoryi Mytnaha sajuza». Zhodna z hetaj pastanovaj impart u Biełaruś z-za miežaŭ Mytnaha sajuza kandytarskich vyrabaŭ ažyćciaŭlajecca pa razavych licenzijach, jakija vydajucca Minhandlu pa ŭzhadnieńni ź Ministerstvam sielskaj haspadarki i charčavańnia i dziaržaŭnym kancernam charčovaj pramysłovaści «Biełdziaržcharčpram». Zajava ab vydačy licenzii pavinna ŭzhadniacca z «Biełdziaržcharčpramam» pry najaŭnaści zaklučanych pamiž kancernam i vytvorcam kandytarskaj pradukcyi pahadnieńniaŭ ab umovach pastavak u Biełaruś, dzie pavinny być ustanoŭleny minimalnyja ceny na pradukcyju.
U kancernie «Biełdziaržcharčpram» paviedamili, što pakul nivodnaj licenzii na impart kandytarskich vyrabaŭ nie vydadziena, ale «pieramovy pa zaklučeńni pahadnieńniaŭ i vydačy licenzij iduć».
Biełaruś źjaŭlajecca čaćviortym najbujniejšym zamiežnym rynkam zbytu ŭkrainskich kandytarskich vyrabaŭ. Pavodle danych Ministerstva dachodaŭ i zboraŭ Ukrainy, u 2013 hodzie ekspart kandytarskich vyrabaŭ z Ukrainy ŭ Biełaruś skłaŭ 24,4 tys. ton na sumu 70 młn. dołaraŭ ZŠA. Asacyjacyja «Ukrkandpram» padrychtavała i nakiravała ŭ Ministerstva ekanamičnaha raźvićcia i handlu Ukrainy «zajavu na praviadzieńnie rasśledavańnia z metaj ustanaŭleńnia dyskryminacyjnych i niedružalubnych dziejańniaŭ z boku Respubliki Biełaruś u dačynieńni da ŭkrainskich pradpryjemstvaŭ kandytarskaj haliny».
Što za «Sihma boj»? Hetaj virusnaj pieśniaj zaniepakoilisia ŭ Jeŭraparłamiencie13
Kamientary