«Nie chaču stać babkaj z knopačnym telefonam». Doktar staŭ ajcišnikam — i znajšoŭ pracu ź pieršaha vodhuku

Vadzimu pakul nie płaciać, ale jon kaža, što heta drobiazi: naźbirany dośvied dapamoža jamu ŭ pošuku pracy ŭ budučyni, a z vypuskam MVP mahčymyja inviestycyi ŭ startap — a značyć, i hrošy. Ale hałoŭnaje — praca prynosić jamu zadavalnieńnie, «i heta darahoha vartaje», kaža Vadzim.

Vadzim adznačaje, što staŭ doktaram «z paryvu dušy». I dahetul lubić svaju prafiesiju: «Ja nie źbirajusia pakidać miedycynu, — kaža jon. — Praciahvaju pracavać na poŭnuju staŭku».

— Prosta nastupiŭ momant, kali zachaciełasia čahości jašče — novaha, što było b mnie cikava. 

Sumiaščać pryjom pacyjentaŭ ź IT akazałasia niaprosta, ale «daktary pryvučanyja prystasoŭvacca», śmiajecca Vadzim. 

—U mianie źmienny hrafik pracy, to-bok ja pracuju nie kožny dzień i nie 5/2, tamu ŭ niejkija dni ja terapieŭt, a ŭ volny čas — biznes-analityk u startapie EmTalk. Nu i nie mnie vam kazać, što ŭ IT nichto nie pryviazany da pracoŭnaha miesca i času — jość ža jašče i nočy! 

U nas vielmi hnutkija ŭmovy — kožny pracuje, kali jamu zručna. Sazvony z kamandaj ładziacca štodnia, ale my ich padbudavali pad usich (to-bok prosta ź miedkabinieta na anłajn-sustreču mnie vychodzić nie prychodzicca) — bo maje kalehi znachodziacca ŭ roznych łakacyjach, naprykład, adzin čałaviek u nas žyvie ŭ Manholii. 

Vadzim u startapie voś užo 1,5 hoda, i heta pieršy i pakul adziny jaho pracadaŭca ŭ IT.

— Ja vam bolš skažu: mnie mocna pašancavała — jany naohuł pieršyja, kamu ja adpraviŭ svajo reziume, pakul jašče vučyŭsia na kursach.

Pra toje, jak heta zdaryłasia, Vadzim raskazvaje zdaloku: u 2022 hodzie jon vyrašyŭ pačać vyvučać prahramavańnie.

— Ale jak i mnohija, chto tolki choča ŭvajści ŭ IT, mieŭ vielmi paviarchoŭnaje ŭjaŭleńnie pra heta. Pajšoŭ na kursy — asvoiŭ na bazavym uzroŭni C#, Python i Java, u apošniuju zakachaŭsia…

Vadzim nie šukaŭ pracy, ale ŭ čat na adukacyjnaj placoŭcy, dzie jon vučyŭsia, vykłali abjavu z zaprašeńniem na biaspłatnuju stažyroŭku — i jon adhuknuŭsia («vyrašyŭ, što dapamoža mnie padciahnuć chard-skiły», — pryznajecca surazmoŭca). «I binha» — jaho ŭziali! 

— Heta ŭnikalnaja situacyja, kali pieršy ž vodhuk staŭ paśpiachovym — bo ŭ mianie, pa-mojmu, na toj momant navat nie było profilu na LinkedIn.

Vadzim nieŭzabavie zrazumieŭ, što jak Java-raspracoŭščyk jon nie budzie zapatrabavany ŭ startapie, zatoje budzie kaštoŭny jak miedyk — prahrama, jakuju raspracoŭvaje kamanda EmTalk, źviazanaja ź mientalnym zdaroŭjem.

— A jašče ja zacikaviŭsia biznes-analizam (reč u tym, što lubuju hipotezu treba praviarać — i ŭ nas hetym zajmałasia ŭsia kamanda, uklučajučy raspracoŭščykaŭ), i mianie «zaciahnuła», — śmiajecca Vadzim. — Vyjaviłasia, heta bolš majo, čym prahramavańnie.

Vadzim pamianiaŭ kurs — placoŭka, na jakoj jon prachodziŭ navučańnie, «akazałasia ŭ hetym płanie hnutkaj». 

Surazmoŭca dahetul sa startapam. Pracuje na vałanciorskich pačatkach, jak i mnohija tam.

— U nas niama inviestara, i z abjektyŭnych pryčyn my jaho i nie šukajem. Tak, inviestycyi pryciahvać płanujem, ale praź niekalki miesiacaŭ — spačatku treba vypuścić MVP. 

Vadzim kaža, što jaho intares — «nie hrašovy»: «usie, chto pracavaŭ u nas u kamandzie, vielmi vyraśli pa navykach, — dziakujučy hetamu stali zapatrabavanyja na rynku pracy. Maja kaleha, biznes-analityk, papracavaŭšy ŭ nas miesiacy 4, znajšła pracu litaralna za tydzień. A našaha Kotlin-raspracoŭščyka paklikali pracavać u «Jandeks».

Surazmoŭca dev.by kaža, što nie pakinie miedycyny, navat kali znojdzie paŭnavartasnuju pracu ŭ IT. 

— Čamu ja pajšoŭ u IT — nie tolki praz mahčymaść u pierśpiektyvie zarablać «vialikija hrošy», pra jakija ŭsie kažuć: maŭlaŭ, ajcišniki hrabuć ich šuflem. Nie tak užo mała ja zarablaju jak doktar. Mnie treba było pieraklučyć mozh z taho, što adbyvałasia ŭ śviecie — znajści niejkaje zachapleńnie. A mnie zaŭsiody byli cikavyja technałohii, jašče sa škoły, ale nie było mahčymaści zajmacca hetym paralelna. 

Ale ja ŭ niejki momant złaviŭ siabie na dumcy: voś ja pačynaju čytać pra błakčejn, — i nie razumieju, što heta. A ŭ mianie maleńkija dzieci — praz 10 hadoŭ my ź imi ž budziem razmaŭlać na roznych movach, dla ich usio heta budzie zrazumieła, a dla mianie — nie.

Heta było niemałavažnym faktaram: ja nie chaču stać babkaj z knopačnym telefonam najbližejšymi hadami, a być u kursie, jak raźvivajucca technałohii. 

Vadzim nie chavaje, byvaje vielmi niaprosta: zavał na ŭsich frantach — i nie chočacca ničoha rabić. «Ale chvala nakacić, potym schłynie — i byccam usio i niadrenna».

— Maja siamja mianie padtrymlivaje. Žonka jakraz i była tym čałaviekam, jaki padšturchnuŭ mianie pajści na kursy. I ciapier jana padstaŭlaje plačo, kali mnie zdajecca, što ŭ mianie ruki apuskajucca.

Siarod znajomych było niamała tych, chto kruciŭ palcam la skroni (i kalehi-miedyki, i dalokija i ad miedycyny, i ad IT). Niekatoryja i ciapier kruciać: maŭlaŭ «Nu-nu, davaj biaspłatna pracuj…» A ja atrymlivaju ad hetaj pracy zadavalnieńnie – i heta darahoha vartaje.

• 6
• 2
• 0
• 4
• 0
• 0
• 0
• 0