Paźniak zadavoleny «bajkotam psieŭdavybaraŭ» i biaźlitasna prajechaŭsia pa kankurentach
Zianon Paźniak u fejsbuku daŭ svaju acenku zavieršanaj učora kampanii pa pieravybrańni Łukašenki, adznačyŭšy fienamienalny pośpiech ruchu pad svaim kiraŭnictvam i poŭny pravał «zamiežnych niby «apazicyjnych» «ofisaŭ» dy «nau».
Na dumku viadomaha hramadskaha dziejača, kiraŭnika ruchu «Volnaja Biełaruś» Zianona Paźniaka, pa ŭsich haradach i miastečkach u Biełarusi 26 studzienia adbyŭsia paśpiachovy «bajkot psieŭdavybaraŭ». Pavodle jahonych nazirańniaŭ:
«Vybarčyja ŭčastki byli pustyja. I nie tolki ŭčastki, ale i vulicy ŭ haradach i miastečkach, kramy i hramadskija miescy. Biełarusy masava nie pajšli hałasavać, zastalisia doma».
Adnoj z prajaŭ tatalnaha bajkotu, pavodle mierkavańnia Paźniaka, źjaŭlajecca amal pusty śpis vybarščykaŭ, u jakim na svaim učastku raśpisvaŭsia Łukašenka.
Paźniak pierakanany, što pryčyna hetaha pośpiechu ŭ tym, što biełarusy «razumna prysłuchalisia da zaklikaŭ Nacyjanalna-Vyzvolnaha Ruchu «Volnaja Biełaruś» nie iści na falšyvyja vybary i nie hałasavać», praihnaravaŭšy «zapałochvańni režymnaj prapahandy i falšyvuju ahitacyju za prychod na hałasavańnie z boku roznych zamiežnych niby «apazicyjnych» «ofisaŭ» dy «nau», dy ŭsialakaj psieŭdademakratyčnaj kałabaranckaj chalavy».
«Ciapier nieprychod naroda na hałasavańnie byŭ taki masavy, što prapahanda zabuksavała. Ułada režymu pierajšła ŭ apošniuju stadyju svajho isnavańnia (razam z «apazicyjnaj» lipaj u Vilni i Varšavie)», — pierakanany Zianon Paźniak.
Rezkuju krytyku vieterana biełaruskaha ruchu vyklikaŭ i inšy kirunak dziejnaści jahonych kankurentaŭ u demakratyčnym łahiery:
«U dzień haniebnych dla biełarusaŭ psieŭdavybaraŭ jany arhanizavali karnavalnaje šeście ŭ Varšavie z muzykaj, dudkami i badziorymi vokličami ŭ styli chadžeńnia pa Miensku ŭ 2020 hodzie».
Kudy bolš było karyści ad taho, što
«Volnaja Biełaruś» u hety dzień la pomnika Kaściuški publična prainfarmavała hramadstva ab sutnaści falšyvych vybaraŭ, nahadała pra hadavinu śmierci vajaŭnika Pałka Kalinoŭskaha Eduarda Łobava, pra hieroja Niabiesnaj sotni Michasia Žyźnieŭskaha, pra zmahańnie biełarusaŭ z maskoŭskim mordaram».
Ciapier čytajuć
Vybityja dźviery, maski-šou, zatrymańnie top-mieniedžaraŭ. Pačaŭsia pahrom «Jeŭraopta»27
Kamientary