17 listapada raspačynaje svaju pracu XIV Mienski kinafestyval “Listapad”. Na feście zajaŭlenyja stužki z 41 krainy śvietu. U tym liku, na feście ŭpieršyniu buduć pradstaŭlenyja filmy z Vuhorščyny (“Parcalanavaja lalka”), Indyi, Paŭdzionnaj Karei (“Tajamničaje soniečnaje śviatło”.
Siarod prysłanych stužak – redkaje na našych ekranach estonskaje kino (“Mahnus”), hruzinskaje (“Svany”), łatvijskaje (“Manatonnaść”), serbskaje (“Pastka”, “Čornyja koni”), švedzkaje (“Vandroŭka Niny”), iranskaje (“Sonca ŭsim adnolkava śviecić”).
Jak zaŭždy, šmat rasiejskich stužak: “Alaksandra” Sakurava, “Vandroŭka z chatnimi žyviołami” Viery Storažavaj, “Ahitbryhada “Bi voraha!” Vitala Mielnikava.
Na feście adbudziecca premjera biełaruskaha filma Andreja Hołubieva “Čakłun i Rumba” – pra sapiora j jahonuju sabaku. A voś stužku Maryi Mažar “Vorahi” mienskija hledačy ŭžo bačyli.
Na feście buduć paŭtorna pakazanyja “Žyćcio inšych”, “Manhoł”, “Anioł”, “1612”, “12”.
Upieršyniu adbudziecca pakaz dakumentalnych stužak. 30 dakumentalnych karcin z 15 krainaŭ śvietu buduć pradstaŭlenyja ŭ videakompleksie “Centr-videa”, što ŭ kompleksie “Stalica”.
A voś karcina “Dva ŭ adnym” Kiry Muratavaj z Alaksandram Łukašenkam – na fest nie trapiła, što ŭžo vyklikała skandał. Zvyčajna ŭsie novyja filmy Muratavaj pakazvalisia na “Listapadzie”. Hetym razam, stužka, dzie Łukašenka z teleekrana vinšuje hledačoŭ z Novym hodam, a stary erataman chvalić jaho – nia budzie pradstaŭlenaja na feście.
