U Baranavičach 2 lipienia byŭ zatrymany indyvidualny pradprymalnik Mikałaj Čarnavus paśla vizitu ŭ harvykankam i sustrečy z žurnalistam rajonnaj haziety. Jaho advieźli ŭ haradski adździeł milicyi, dzie načalnik achovy hramadskaha paradku i prafiłaktyki pravaparušeńniaŭ major milicyi Alaksiej Hiećman pačaŭ składać na aktyvista administracyjny pratakoł za praviadzieńnie niesankcyjanavanaha mierapryjemstva indyvidualnych pradprymalnikaŭ 1 lipienia na haradskim kaaprynku i ŭ vialikaj zale harvykankama. Hety praces zaciahnuŭsia amal na 5 hadzin. Padčas składańnia pratakołu Mikałaju Čarnavusu (jon invalid II-oj hrupy) stała kiepska, i jon nieadnarazova prasiŭ ab dapamozie, ale major milicyi Alaksiej Hiećman admaŭlaŭsia vyklikać chutkuju dapamohu.
Paśla składańnia administracyjnaha pratakoła Mikałaj Čarnavus nie byŭ vyzvaleny, a jaho nakiravali ŭ izalatar časovaha ŭtrymańnia, dzie jamu stała zusim kiepska. U hramadskaha aktyvista rezka pavialičyŭsia cisk i zdaryŭsia hipiertaničny kryz. U hetych umovach supracoŭniki milicyi vymušany byli vyklikać chutkuju dapamohu i dastavić Mikałaja Čaravusa ŭ haradski špital, dzie jon znachodzicca pad nahladam 2-ch supracoŭnikaŭ milicyi.
Pa słovach Viktara Syrycy, jaki paśpieŭ pierahavaryć ź Mikałajem Čarnavusam padčas jaho pierachodu z pryjomnaha pakoja ŭ I-aje chirurhičnaje adździaleńnie, vyhladaje jon vielmi stomlenym i chvorym.
Adnačasova stała viadoma, što supracoŭniki milicyi nie puścili ŭ pałatu da Mikałaja Čarnavusa jaho syna.
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary