«Jany sami paklikali mianie ŭ hety čat, a ciapier nazyvajuć miarzotnikam». Hałoŭred Atlantic raskazaŭ, čamu apublikavaŭ pierapisku amierykanskich siłavikoŭ u Signal
Hałoŭny redaktar časopisa Atlantic Džefry Hołdbierh, jakoha daradca prezidenta ZŠA pa nacyjanalnaj biaśpiecy Majk Uołc vypadkova dadaŭ u hrupavy čat u mesendžary Signal, dzie amierykanskija siłaviki abmiarkoŭvali płany ataki na chusitaŭ u Jemienie, u intervju karespandentcy Bi-bi-si Sary Śmit raskazaŭ, jak usio adbyvałasia — i patłumačyŭ, čamu časopis navažyŭsia apublikavać usiu pierapisku całkam.
«Viedajecie, mnie b chaciełasia, kab heta było niešta ŭ duchu Le Kare, — kaža Hołdbierh, majučy na ŭvazie brytanskaha aŭtara špijonskich ramanaŭ Džona Le Kare. — Ale było tak: jon [Uołc] zaprasiŭ mianie [u čat] pahutaryć. Ja pahadziŭsia. I voś ja ŭžo ŭ hetym vielmi dziŭnym hrupavym čacie z kiraŭnictvam słužbaŭ nacyjanalnaj biaśpieki Złučanych Štataŭ».
Uołc pryznaŭ, što heta jon dadaŭ Hołdbierha ŭ hrupavy čat u Signal, ale zajaviŭ, što z žurnalistam jon nie znajomy.
«Ja b nie paznaŭ jaho, kali b sutyknuŭsia b ź im abo kali b palicyja prapanavała mnie apaznać jaho», — skazaŭ daradca Trampa.
Adnak Hołdbierh śćviardžaje, što jany sustrakalisia z Uołcam niekalki razoŭ. Žurnalist admoviŭsia raskryvać detali ich uzajemaadnosin.
«Jon, viadoma, moža kazać usio, što choča, ale ja nie budu kamientavać našy adnosiny ci ich adsutnaść, — kaža Hołdbierh. — Jak žurnalistu mnie niekamfortna publična havaryć pra adnosiny, jakija ŭ mianie mohuć być abo adsutničać ź ludźmi, jakija traplajuć u zahałoŭki navin».
U lubym vypadku, va Uołca musiŭ być numar telefona Hołdbierha, inakš jon nie zmoh by dadać žurnalista ŭ čat u Signal.
Daradca Trampa pa biaśpiecy skazaŭ, što jon paprasiŭ Iłana Maska — paplečnika amierykanskaha prezidenta i technałahičnaha miljardera — razabracca z tym, jak u jaho źjaviŭsia kantakt Hołdbierha.
«Surjozna, vy adpravicie Iłana Maska raźbiracca, jak čyjści numar apynuŭsia ŭ kahości ŭ telefonie? Viedajecie, bolšaść vaśmihodak mohuć z hetym spravicca», — kamientuje Hołdbierh ideju Uołca.
U pieršaj publikacyi Atlantic byli pryviedzienyja nie ŭsie cytaty ź pierapiski ŭ Signal, a siakija-takija detali i padrabiaznaści naŭmysna nie publikavalisia. Ale paśla taho, jak administracyja prezidenta stała prymianšać značnaść infarmacyi z čata i abvinavaciła Hołdbierha ŭ chłuśni, časopis vyrašyŭ apublikavać skrynšoty ŭsioj pierapiski.
Ci ciažkaje heta było rašeńnie?
«Kali Donald Tramp skazaŭ, što tam [u čacie] niama ničoha takoha, pa sutnaści, a [kiraŭnik Nacyjanalnaj raźviedki] Tałsi Habard i [dyrektar CRU] Džon Retklif skazali, što tam nie było adčuvalnaj infarmacyi, nie było sakretnaj infarmacyi i hetak dalej, my padumali — nu nie, my z hetym nie zhodnyja, — tłumačyć Hołdbierh rašeńnie Atlantic apublikavać usio źmieściva čata. — Jany kažuć, [što tam ničoha niama], a ŭ nas jość usia hetaja pierapiska, tak što, napeŭna, ludzi pavinny jaje ŭbačyć».
Na publikacyju skrynšotaŭ Bieły dom i Pientahon adkazali, što heta nie «vajennyja płany», a značyć, ničoha sakretnaha ŭ detalizavanym apisańni taho, kali źniščalniki F18, drony i «tamahaŭki» pavinny atakavać celi ŭ Jemienie, niama.
«Kali Pit Chiehsiet — ministr abarony — paviedamlaje mnie, što voś-voś budzie naniesieny ŭdar pa Jemienie, piša, jakaja mienavita avijacyja budzie zadziejničanaja, jakaja zbroja budzie vykarystoŭvacca i što bomby pavinny parazić celi praź dźvie hadziny — mnie heta zdajecca adčuvalnaj infarmacyjaj, infarmacyjaj, źviazanaj z płanavańniem vajennych dziejańniaŭ», — kaža Hołdbierh.
Jość i inšy važny momant.
«Ci pavinny vy, kiraŭniki słužbaŭ nacyjanalnaj biaśpieki, abmiarkoŭvać heta ŭ Signal na svaim telefonie?» — pytańnie hučyć rytaryčna.
Hałoŭny redaktar Atlantic trapiŭ i pad asabistyja ataki. Prezident Tramp nazvaŭ jaho «niaŭdačnikam» i «miarzotnikam», a Uołc, jaki sam dadaŭ žurnalista ŭ čat, — «chłusam» i «miarzotaj».
«Heta ŭłaścivaja im maniera pavodzin: nikoli nie abaraniajsia, tolki atakuj, — kamientuje Hołdbierh. — Heta značyć, ja siadzieŭ, zajmaŭsia svaimi spravami, jany sami paklikali mianie ŭ hety čat u Signal, a ciapier jany napadajuć na mianie i nazyvajuć miarzotnikam. Čahości ja tut nie razumieju».
Tramp abaraniaje svaju kamandu i, padobna, nie źbirajecca nikoha zvalniać, nazyvajučy skandał «palavańniem na viedźmaŭ», jakoje nibyta zładziła presa. Ale, pa słovach Hołdbierha, u Biełym domie mnohija dumajuć, što Uołc zrabiŭ surjoznuju pamyłku, i ŭsurjoz zaniepakojenyja tym, jak ułady adrehavali na toje, što adbyłosia.
«Dapuścim, ty vajskoviec, lotčyk, pracuješ z CRU i Dziarždepartamientam, i ty abychodzišsia z adčuvalnaj infarmacyjaj nienaležnym čynam, tak, jak heta zrabili hetyja ludzi — što z taboj budzie? Ciabie zvolniać, ciabie adpraviać pad sud», — razvažaje Hołdbierh.
Ź jahonych słoŭ, u palityčnych elitach pajšli razmovy, što da ludziej z administracyi Trampa ŭžyvajucca svaje, asablivyja standarty adkaznaści.
Prysutnaści ŭ čacie starońniaha čałavieka nichto ź jaho 17 udzielnikaŭ tak i nie zaŭvažyŭ. Hołdbierh sam vyjšaŭ ź jaho nieŭzabavie paśla taho, jak zrazumieŭ, što heta nie rozyhryš, a razmova sapraŭdnych amierykanskich siłavikoŭ. [Jon zrabiŭ heta paśla taho, jak udar pa pazicyjach chusitaŭ byŭ naniesieny ŭ paznačany ŭ pierapiscy čas].
Hałoŭny redaktar Atlantic kaža, što heta było prajavaj adkaznaści ź jaho boku. Ale niekatoryja žurnalisty ź ciažkaściu pavieryli ŭ toje, što jon vyjšaŭ z čata pa dobraj voli.
«Niejkaja častka mianie vielmi chacieła b viedać, što tam było dalej. Ale tut uźnikaje šmat prablem, źviazanych z zakonam i etykaj, i inšych pytańniaŭ, u jakija ja nie mahu ŭdavacca, — tłumačyć Hołdbierh. — Paviercie, ja pryniaŭ hetaje rašeńnie, atrymaŭšy parady ad roznych ludziej».
Čarhovy skandał z administracyjaj Trampa: žurnalisty znajšli ŭ internecie piersanalnyja danyja top-čynoŭnikaŭ
Na abvinavačańni ŭ chłuśni Atlantic apublikavaŭ novyja skrynšoty z uradavaha čata ŭ Signal. Tramp adkazaŭ novymi abrazami ŭ adras hałoŭnaha redaktara
«Jon dobry čałaviek». Tramp nie staŭ zvalniać svajho daradcu paśla ŭciečki infarmacyi ŭ čat Signal
Ministr abarony ZŠA admaŭlaje ŭciečku vajennych płanaŭ praz čat u Signal. A Kanhres patrabuje rasśledavańnia
Daradca Trampa pa nacbiaśpiecy vypadkova dadaŭ žurnalista ŭ sakretny čat u Signal. Raskrytyja miechanizmy pryniaćcia rašeńniaŭ
Kamientary