Člen savieta respubliki Vital Kastahoraŭ pazbaŭleny niedatykalnaści

Člen Savieta Respubliki i mahiloŭski biznesmen Vital Kastahoraŭ byŭ zatrymany supracoŭnikami pravaachoŭnych orhanaŭ prosta na pasiadžeńni i pazbaŭleny niedatykalnaści. Pra heta paviedamiła krynica ŭ Saviecie Respubliki.

Pavialičyć

Zhodna z zakonam, pazbavić niedatykalnaści člena Savieta Respubliki možna tolki sa zhody astatnich sienataraŭ, za vyklučeńniem vypadkaŭ ździajśnieńnia zdrady dziaržavie abo inšaha asabliva ciažkaha złačynstva, a taksama zatrymańnia na miescy ŭčynieńnia złačynstva.

Pa słovach krynicy, Kastahoraŭ byŭ zatrymany prosta na pasiadžeńni vierchniaj pałaty parłamienta, jakoje prachodziła ŭ kancy červienia. Členy Savieta Respubliki bolšaściu hałasoŭ pazbavili sienatara niedatykalnaści.

U Śledčym kamitecie i KDB nie zmahli paćvierdzić abo abvierhnuć infarmacyju ab jaho zatrymańni.

Paźniej u pres-słužbie Savieta Respubliki ŭdakładnili, što Kastahoraŭ pazbaŭleny niedatykalnaści ŭ adpaviednaści z artykułam 47 zakona «Ab statusie deputata Pałaty pradstaŭnikoŭ, člena Savieta Respubliki Nacyjanalnaha schodu Respubliki Biełaruś» ad 4 listapada 1998 hoda ŭ suviazi z materyjałami, što pastupili z pravaachoŭnych orhanaŭ.

Datelefanavacca na mabilny telefon Kastahorava nie ŭdałosia. Na pradpryjemstvie ZAT «Paliteks», jakoje jon uznačalvaje, na telefonnyja zvanki na praciahu dnia taksama nie adkazvali.

Jak paviedamiŭ načalnik upraŭleńnia pradprymalnictva Mahiloŭskaha abłvykankama Viktar Krasoŭski, numar Vitala Kastahorava niedastupny ŭžo nie pieršy dzień.

ZAT «Paliteks» — adzin z najbujniejšych vytvorcaŭ niatkanych tekstylnych materyjałaŭ u Respublicy Biełaruś.

***

Vital Kastahoraŭ naradziŭsia ŭ 1969 hodzie ŭ pasiołku Taromskaje Dnieprapiatroŭskaj vobłaści va Ukrainie. U 1991 hodzie skončyŭ Kalininhradskaje vyšejšaje inžyniernaje ordena Lenina Čyrvonaściažnaje vučylišča inžyniernych vojskaŭ pa śpiecyjalnaści «fartyfikacyjnyja zbudavańni i maskiroŭka».

Z 1995 pa 1996 hady pracavaŭ namieśnikam dyrektara pa kamiercyjnych pytańniach małoha ekśpierymientalnaha pradpryjemstva «Aśpiekt». U 1997 — 1998 hadach — namieśnik dyrektara pa kamiercyjnych pytańniach vytvorčaha kamiercyjnaha pradpryjemstva «Paliteks». Z 25 śniežnia 1998 hoda i pa ciapierašni čas źjaŭlajecca dyrektaram ZAT «Paliteks».

Kastahoraŭ abrany členam Savieta Respubliki piataha sklikańnia ad Mahiloŭskaj vobłaści (vyłučany ad Mahiloŭskaha, Kličaŭskaha i Słaŭharadskaha rajonaŭ). Źjaŭlajecca členam Savieta pa raźvićci pradprymalnictva ŭ Respublicy Biełaruś. Hanarovy pradprymalnik Respubliki Biełaruś (2003). Čałaviek hoda Mahiloŭskaj vobłaści (2002). Lepšy pradprymalnik hoda ŭ naminacyi «Miecenat» (2001, 2002). Lepšy pradprymalnik hoda ŭ naminacyi «Eksparcior» (2003). Lepšy pradprymalnik hoda Mahiloŭskaj vobłaści ŭ naminacyi «Eksparcior» (2000, 2001, 2002, 2003, 2007, 2011). Lepšy pradprymalnik hoda Mahiloŭskaj vobłaści ŭ śfiery vytvorčaści spažyvieckich tavaraŭ (2010).

• 0
• 0
• 0
• 0
• 0
• 0
• 0
• 0