Член Савета Рэспублікі і магілёўскі бізнэсмэн Віталь Кастагораў быў затрыманы супрацоўнікамі праваахоўных органаў проста на пасяджэнні і пазбаўлены недатыкальнасці. Пра гэта паведаміла крыніца ў Савеце Рэспублікі.
Згодна з законам, пазбавіць недатыкальнасці члена Савета Рэспублікі можна толькі са згоды астатніх сенатараў, за выключэннем выпадкаў здзяйснення здрады дзяржаве або iншага асаблiва цяжкага злачынства, а таксама затрымання на месцы ўчынення злачынства.
Па словах крыніцы, Кастагораў быў затрыманы проста на пасяджэнні верхняй палаты парламента, якое праходзіла ў канцы чэрвеня. Члены Савета Рэспублікі большасцю галасоў пазбавілі сенатара недатыкальнасці.
У Следчым камітэце і КДБ не змаглі пацвердзіць або абвергнуць інфармацыю аб яго затрыманні.
Пазней у прэс-службе Савета Рэспублікі ўдакладнілі, што Кастагораў пазбаўлены недатыкальнасці ў адпаведнасці з артыкулам 47 закона «Аб статусе дэпутата Палаты прадстаўнікоў, члена Савета Рэспублікі Нацыянальнага сходу Рэспублікі Беларусь» ад 4 лістапада 1998 года ў сувязі з матэрыяламі, што паступілі з праваахоўных органаў.
Датэлефанавацца на мабільны тэлефон Кастагорава не ўдалося. На прадпрыемстве ЗАТ «Палітэкс», якое ён узначальвае, на тэлефонныя званкі на працягу дня таксама не адказвалі.
Як паведаміў начальнік упраўлення прадпрымальніцтва Магілёўскага аблвыканкама Віктар Красоўскі, нумар Віталя Кастагорава недаступны ўжо не першы дзень.
ЗАТ «Палітэкс» — адзін з найбуйнейшых вытворцаў нятканых тэкстыльных матэрыялаў у Рэспубліцы Беларусь.
***
Віталь Кастагораў нарадзіўся ў 1969 годзе ў пасёлку Таромскае Днепрапятроўскай вобласці ва Украіне. У 1991 годзе скончыў Калінінградскае вышэйшае інжынернае ордэна Леніна Чырвонасцяжнае вучылішча інжынерных войскаў па спецыяльнасці «фартыфікацыйныя збудаванні і маскіроўка».
З 1995 па 1996 гады працаваў намеснікам дырэктара па камерцыйных пытаннях малога эксперыментальнага прадпрыемства «Аспект». У 1997 — 1998 гадах — намеснік дырэктара па камерцыйных пытаннях вытворчага камерцыйнага прадпрыемства «Палітэкс». З 25 снежня 1998 года і па цяперашні час з'яўляецца дырэктарам ЗАТ «Палітэкс».
Кастагораў абраны членам Савета Рэспублікі пятага склікання ад Магілёўскай вобласці (вылучаны ад Магілёўскага, Клічаўскага і Слаўгарадскага раёнаў). З'яўляецца членам Савета па развіцці прадпрымальніцтва ў Рэспубліцы Беларусь. Ганаровы прадпрымальнік Рэспублікі Беларусь (2003). Чалавек года Магілёўскай вобласці (2002). Лепшы прадпрымальнік года ў намінацыі «Мецэнат» (2001, 2002). Лепшы прадпрымальнік года ў намінацыі «Экспарцёр» (2003). Лепшы прадпрымальнік года Магілёўскай вобласці ў намінацыі «Экспарцёр» (2000, 2001, 2002, 2003, 2007, 2011). Лепшы прадпрымальнік года Магілёўскай вобласці ў сферы вытворчасці спажывецкіх тавараў (2010).
Каментары