Paśla śpiecnarady ŭ Alaksandra Łukašenki i ŭviadzieńnia biełaruskim uradam abmiežavalnych pošlin na impart ukrainskaha piva, Mižviedamasnaja kamisija Ukrainy pa mižnarodnym handli (MKMH) «pa vynikach rasśledavańnia dyskryminacyjnych abo niedružalubnych dziejańniaŭ z boku Biełarusi» pryniała rašeńnie ŭvieści pošliny na impart cełaha šerahu tavaraŭ ź Biełarusi. Ukraina uvodzić zaharadžalnyja pošliny na małočnuju pradukcyju, kandytarskija vyraby, piva, elektralampy napalvańnia, ŭhnajeńni, šyny, chaładzilniki.
Napiaredadni ŭstupleńnia ŭ siłu rašeńnia MKMH pres-sakratar MZS Dźmitryj Mirončyk raspavioŭ, jak budzie raźvivacca situacyja, kali Kijeŭ nie admienić rašeńnia MKMH.
«Asablivy, prefierencyjny, handlovy režym z krainami — členami dahavora ab zonie svabodnaha handlu ad 18 kastryčnika 2011 hoda dziejničaje tolki ŭ tym vypadku, kali jany nie ŭvodziać u adnosinach da biełaruskich tavaraŭ abmiežavalnych mieraŭ, nie praduhledžanych nazvanaj damovaj. Vyklučeńnie składajuć śpiecyjalnyja achoŭnyja miery (antydempinhavyja, kampiensacyjnyja i inšyja pošliny), jakija ŭvodziacca ŭ paradku, jaki adpaviadaje normam SHA. Pryniatyja ŭkrainskim bokam kroki da takich nie naležać», - adznačyŭ pradstaŭnik biełaruskaha MZS.
«Kali ŭkrainskija rašeńni ŭstupiać u siłu, my vymušanyja budziem prymać miery adekvatnaha reahavańnia. Choć spadziajemsia, što pa niehatyŭnamu scenary padziei raźvivacca nie buduć, bo heta nie adpaviadaje duchu i ŭzroŭniu ŭzajemadziejańnia pamiž našymi brackimi krainami», — cytuje Dźmitryja Mirončyk BiełTA.
Jak stała siońnia viadoma, Biełaruś admianiaje časovaje licenzavańnie pastavak tavaraŭ z krain — členaŭ dahavora ab zonie svabodnaha handlu ŭ SND.
«24 lipienia premjer-ministram Respubliki Biełaruś padpisana pastanova (№ 719), jakaja zdymaje aściarohi, jakija mieli miesca ŭ našych partnioraŭ pa SND, adnosna dostupu ich tavaraŭ na biełaruski rynak», — zajaviŭ Dźmitryj Mirončyk.
Kamientary