U bai pad Łuhanskam zachoplena rasijskaja broniemašyna z dakumientami
Kala vioski Hieorhijeŭka Łutuhinskaha rajona Łuhanskaj vobłaści ŭkrainskija vajskoŭcy zachapili rasijskuju broniemašynu BMD-2 z dakumientami. Pra heta na svajoj staroncy ŭ Facebook napisaŭ žurnalist Raman Bočkała.
«Bartavy numar 275, z sastavu 1-j parašutna-desantnaj roty v/č 74268, Pskoŭskaj pavietrana-desantnaj dyvizii (kamandzir uzvoda art. lejtenant Papoŭ)», — paviedamiŭ žurnalist. Ź jaho słoŭ, techniku zachapili bajcy 24-j bryhady USU i śpiecpadraździaleńnia «Štorm».
«Na zdymkach vidać bajavuju mašynu i kulamiot PKT, jaki byŭ na joj ustalavany, z ukazańniem imia kulamiotčyka — radavoha Surnačova. Heta ž proźvišča i inicyjały paznačany ŭ časopisie viačerniaj pravierki, a taksama imiony inšych bajcoŭ rasijskaj armii, vidać, jakija vajujuć va Ukrainie», — dadaŭ Bočkała.
Žurnalist adznačyŭ, što ŭ śpisie jość sałdaty 1994 hoda naradžeńnia.
«Heta śviedčyć ab tym, što ŭ Pucina prablema z vopytnymi rekrutami, raz u boj kidajucca nieabstralanyja bajcy», — ličyć jon.
Pa słovach Bočkały, adpraŭku rasijskich sałdat na vajnu va Ukrainu jamu paćvierdziła žonka adnaho z vajskoŭcaŭ Pskoŭskaha VDV.
«Našych mužčyn niadaŭna adpravili va Ukrainu. Nibyta na navučańnie. Jany sami nie viedali, kudy mienavita ich adpraviać. Z taho času nie ad ich ni zvanka, ni pryvitańnia. My siadzim, płačam!» — pracytavaŭ žurnalist jaje słovy.
U svaju čarhu śpikier RNBA Andrej Łysienka na bryfinhu dadaŭ, što byli zachoplenyja dźvie broniemašyny. Pavodle jaho słoŭ, na miescy znojdzieny płanšet kamandzira ŭzvoda, hvardyi lejtenanta Papova.
«Ekipaž BMD pakinuŭ bajavuju mašynu», — dadaŭ Łysienka.
Kamientary