У баі пад Луганскам захоплена расійская бронемашына з дакументамі
Каля вёскі Георгіеўка Лутугінскага раёна Луганскай вобласці ўкраінскія вайскоўцы захапілі расійскую бронемашыну БМД-2 з дакументамі. Пра гэта на сваёй старонцы ў Facebook напісаў журналіст Раман Бочкала.
«Бартавы нумар 275, з саставу 1-й парашутна-дэсантнай роты в/ч 74268, Пскоўскай паветрана-дэсантнай дывізіі (камандзір узвода арт. лейтэнант Папоў)», — паведаміў журналіст. З яго слоў, тэхніку захапілі байцы 24-й брыгады УСУ і спецпадраздзялення «Шторм».
«На здымках відаць баявую машыну і кулямёт ПКТ, які быў на ёй усталяваны, з указаннем імя кулямётчыка — радавога Сурначова. Гэта ж прозвішча і ініцыялы пазначаны ў часопісе вячэрняй праверкі, а таксама імёны іншых байцоў расійскай арміі, відаць, якія ваююць ва Украіне», — дадаў Бочкала.
Журналіст адзначыў, што ў спісе ёсць салдаты 1994 года нараджэння.
«Гэта сведчыць аб тым, што ў Пуціна праблема з вопытнымі рэкрутамі, раз у бой кідаюцца неабстраляныя байцы», — лічыць ён.
Па словах Бочкалы, адпраўку расійскіх салдат на вайну ва Украіну яму пацвердзіла жонка аднаго з вайскоўцаў Пскоўскага ВДВ.
«Нашых мужчын нядаўна адправілі ва Украіну. Нібыта на навучанне. Яны самі не ведалі, куды менавіта іх адправяць. З таго часу не ад іх ні званка, ні прывітання. Мы сядзім, плачам!» — працытаваў журналіст яе словы.
У сваю чаргу спікер РНБА Андрэй Лысенка на брыфінгу дадаў, што былі захопленыя дзве бронемашыны. Паводле яго слоў, на месцы знойдзены планшэт камандзіра ўзвода, гвардыі лейтэнанта Папова.
«Экіпаж БМД пакінуў баявую машыну», — дадаў Лысенка.
Каментары