«Šachcior» - PSV - 0:2.
Nie viedaju, što heta: padniaŭsia ahulny ŭzrovień biełaruskaha čempijanatu, ci heta našyja kamandy adoleli niejki psichałahičny barjer, ci moža prosta postać «harniakoŭ» Siarhieja Baroŭskaha syhrała svaju rolu, ale salihorski «Šachcior» vyjšaŭ na matč suprać niderłandskaha PSV (taho samaha, jaki my bačyli na telebačańni ŭ Lizie čempijonaŭ ź Miemfisam Depajem u asnoŭnym składzie i Filipam Kaku ŭ roli hałoŭnaha treniera) i ničym nie sastupiła hroznym supiernikam.
Cana pieramohi ŭ hetaj kankretnaj hulni na «Barysaŭ-Arenie» była vielmi vysokaj – vychad u hrupavy etap Lihi Jeŭropy. A pahladzieć na «Šachcior» u hetych spabornictvach vielmi chaciełasia. «Šachcior» jašče nie sapsavany hłamuram. Tut tabie minimum modnych pryčosak i instahram-akaŭntaŭ. Chłopcy za salihorcaŭ hulajuć prostyja, nibyta niadaŭna vyjšli z šachty. Hetym kamanda i pryvablivaje.
Pieršy matč skončyŭsia minimalnaj pieramohaj PSV. Mikałaj Januš naprykancy hulni mieŭ cudoŭny momant adyhracca, ale pramazaŭ z vyhadnaj pazicyi.
Na matč u adkaz trenier biełarusaŭ Siarhiej Baroŭski skazaŭ, što jaho kamanda ni ŭ jakim razie nie kiniecca napierad zabivać hały. Hałoŭnaje – zachavać tyły, a šaniec u atacy pa-lubomu ŭźniknie. I jany byli!
Z paŭtuzina šancaŭ, ale nivodnaha takoha pra jaki zaštampavana kažuć «stopracentny». To Asipienka nie zmoža začapicca za miač, to Ryjosu nie chapała dakładnaści.
PSV u pieršym tajmie nie stvaryŭ uvohule nivodnaha momanta. Šancy ŭ ich pačali źjaŭlacca tolki ŭ apošniuju dziesiacichvilinku, kali «Šachcior» byŭ vymušany adkryvacca. Bramnik Kacienka kolki razoŭ vyratoŭvaŭ kamandu.
A na 89-aj chvilinie indyvidualnaje majsterstva prademanstravaŭ Miemfis Depaj, hulec zbornaj Niderłandaŭ, jon namataŭ adrazu troch abaroncaŭ «Šachciora» i nakiravaŭ miač u sietku – 0:1. Jašče praz paru imhnieńnia Depaj pavialičyŭ pieravahu svajoj kamandy – 0:2. Ale hety hoł ničoha nie vyrašaŭ.
Za «Šachcior» u hety rozyhryš nie soramna. Kamanda narešcie prajšła dva raŭndy ŭ jeŭrakubkach dy i z PSV nie zhańbiłasia.
Kamientary