Hienieralny sakratar AAN Pan Hi Mun zaklikaŭ mižnarodnuju supolnaść vydzielić $600 młn na baraćbu z epidemijaj Eboła i abjaviŭ ab stvareńni kryzisnaha centra dla kaardynacyi mižnarodnych dziejańniaŭ u procistajańni ŭźnikšaj niebiaśpiecy. Ab hetym paviedamlaje Centr navin AAN.
Pa vynikach sustrečy, u jakoj pryniali ŭdzieł hienieralny dyrektar Suśvietnaj arhanizacyi achovy zdaroŭja (SAAZ) Marharet Čań, kaardynatar AAN pa baraćbie ź lichamankaj Eboła Devid Nabara, prezident Suśvietnaha banka i mnohija inšyja kiraŭniki ŭstanoŭ sistemy AAN, Pan Hi Mun raskazaŭ, što była dasiahnuta damoŭlenaść ab stvareńni kryzisnaha centra pa baraćbie ź lichamankaj Eboła dla zabieśpiačeńnia zładžanaści i efiektyŭnaści namahańniaŭ pa baraćbie ź virusam.
«Naša meta — spynić lichamanku Eboła ŭ paciarpiełych krainach na praciahu šaści-dzieviaci miesiacaŭ i praduchilić raspaŭsiudžvańnie virusa ŭ mižnarodnym maštabie, — skazaŭ kiraŭnik AAN. — Kolkaść vypadkaŭ lichamanki Eboła raście imkliva. Chvaroba raspaŭsiudžvajecca značna chutčej, čym dziejańni ŭ adkaz».
Jon nastojliva zaklikaŭ avijakampanii i sudnachodnyja kampanii nie admianiać rejsy ŭ paciarpiełyja krainy. «Zabarona palotaŭ i dastaŭki pasłuh nie strymaje lichamanku Eboła ad raspaŭsiudžvańnia, adnak heta nie daść mahčymaści miedykam dabracca da ludziej, jakija majuć patrebu ŭ dapamozie, — ličyć Hi Mun. — Styhma i domysły mohuć nanieści takuju ž škodu, jak i sam virus».
U adkaz na ŭspyšku lichamanki Eboła ŭ krainach Zachodniaj Afryki AAN užo vydzieliła sa svajho Centralnaha fondu reahavańnia na nadzvyčajnyja situacyi $6 młn. Hetyja srodki, jakija nakiroŭvalisia ŭ rehijon u pieryjad z krasavika pa červień, byli pryznačany dla akazańnia pieršaj miedycynskaj i charčovaj dapamohi. Tym časam Suśvietnaja arhanizacyja achovy zdaroŭja paviedamlaje, što dla pieramohi nad lichamankaj Eboła nieabchodny sotni miljonaŭ dołaraŭ ZŠA.
Pradstaŭnik SAAZ Taryk Jasarevič paviedamiŭ, što Suśvietny bank paabiacaŭ vydzielić $200 młn. Afrykanski bank raźvićcia pradastaviŭ $60 młn. Samoj SAAZ spatrebicca suma ŭ pamiery $60 młn, a astatnija srodki buduć nakiravany ŭ krainy, jakija paciarpieli ad epidemii.
U rehijonie Zachodniaj Afryki nie chapaje miedykaŭ, miedycynskich centraŭ i abstalavańnia. Ciapier u piaci krainach rehijona Zachodniaj Afryki pracujuć prykładna 200 śpiecyjalistaŭ SAAZ: 70 — u Śjera-Leone, 59 — u Hviniei, 58 — u Libieryi, 14 — u Nihieryi i Sieniehale. Taksama z dapamohaj nacyjanalnych ministerstvaŭ achovy zdaroŭja da baraćby ź virusam pryciahvajecca miascovy miedycynski piersanał, što apłačvajecca SAAZ.
Ciapierašniaja ŭspyška lichamanki Eboła ŭ Zachodniaj Afrycy źjaŭlajecca biesprecedentnaj pa maštabach. Na hety momant u Libieryi, Śjera-Leone i Hviniei virusam Eboła byli inficyravany 3069 čałaviek. Prykładna 1550 ź ich pamierli. Da hetaha času virusam zarazilisia 256 miedrabotnikaŭ.
