Hidra, abo Čym skončyłasia reforma dziaržaparatu

Zusim niadaŭna Alaksandr Łukašenka anansavaŭ čarhovuju chvalu skaračeńnia kolkaści hasudaravych ludziej. Adnak prykarytnyja srodki masavaj dezynfarmacyi čamuści «pasaromielisia» pry hetym apublikavać vyniki papiaredniaj hrandyjoznaj reformy dziaržaŭnaha aparatu, paśla jakoj tak chutka spatrebiłasia novaja. Pasprabujem papoŭnić taki prykry prabieł samastojna.

Dla hetaha nam spatrebicca «Statystyčny štohadovik Respubliki Biełaruś — 2014». U im raźmiaściłasia cikavaja tablica. Jakaja adlustroŭvaje dadzienyja ab kolkaści słužačych dziaržaŭnaha aparatu ŭ jaho dareformiennym stanie i postreformiennym.

Vidać, što nijakaha 25%-aha skaračeńnia dziaržsłužačych ni ŭ cełym, ni pa jakoj-niebudź asobnaj katehoryi nie adbyłosia. Rabotnikaŭ usich dziaržorhanaŭ i arhanizacyj stała až na 7,7% mienš, a tych, chto vałodaje statusam «dziaržsłužačaha» — na 15,2%.

Bolš za ŭsich razahnali dziaržorhany i arhanizacyi, padparadkavanyja Miaśnikoviču. U ich pieralik uvachodziać raznastajnyja ministerstvy, kancerny, kamitety (akramia siłavych), ahienctvy i inšyja struktury respublikanskaha maštabu. Usiaho kantynhient rabotnikaŭ Saŭmina pamienšaŭ na cełych 16%, ź ich dziaržsłužačych — na 17,1%.

Druhimi ŭ śpisie paciarpiełych apynulisia abłasnyja, rajonnyja i sielskija vykankamy razam ź ich šmatlikimi padraździaleńniami. Płač Jarasłaŭny prahučaŭ u vykanańni 12,6% rabotnikaŭ miascovych orhanaŭ vykanaŭčaj ułady, na 15,5% paradzieli šeryja šerahi niepasredna čynoŭnikaŭ.

Krakadziłavu ślazu ŭ pieryjad pieraźmienki 2012—2013 hadoŭ puścili 8,1% zaniatych u dziaržaŭnych orhanach zakanadaŭčaj ułady. Kolkaść dziaržsłužačych, nadzielenych pravam prymać da viedama dekrety i zredku praštampoŭvać zakony, źniziłasia na 7,5%. Pakolki ni skład pakorlivaj «pałatki», ni «savieta respubliki» nie źmianiŭsia, byli puščanyja pad nož hałovy sa šmatlikaha natoŭpu ich absłuhi.

Naohuł nie zaŭvažyli śvist kul nad hałavoju sabratoŭ pa ručcy i kłavijatury ŭ ajčynnych sudach.

Samaja cikavaja situacyja pa dobraj tradycyi skłałasia la noh hasudaravych. Kali z utvareńniaŭ, kiravanych kamandante, z najvialikšym napružańniem atrymałasia vypchnuć 13,5% čynoŭnaha składu, to kolkaść rabotnikaŭ dziaržorhanaŭ i arhanizacyj, padparadkavanych albo padspravazdačnych asabista kiraŭniku dziaržavy, vyrasła na 23,7%! Heta značyć, 909 tavaryšaŭ z kryštalova sumlennymi vačami nie pa-zdradnicku vyhnali z chaty na maroz, a pa-baćkoŭsku pieraviali za štat čynoŭnickaj słužby. Voś užo dzie — dziaržava dla naroda!

Uvohule, ź nieciarpieńniem čakajem raźvićcia padziej vakoł namienkłaturnaj hidry. Bo hidra, jak viadoma, adzinaja žyvioła, jakaja ličycca navukaj patencyjna nieśmiarotnaj.

• 0
• 0
• 0
• 0
• 0
• 0
• 0
• 0