Biełaruskija aktyvisty pieradali achviaravańni, sabranyja ŭ Miensku dla paranienych ukrainskich sałdat.Srodki, sabranyja na dabračynnaj akcyi salidarnaści z ukraincami «My lubim ukrainski boršč», pieradadzienyja Tacianie Davydzienka z supołki «Vajna i słova». Dadatkova sabranyja pa-za akcyjaj 250 dalaraŭ pieradadzienyja pradstaŭnictvu «Valanterskaj sotni» ŭ Kijeŭskim špitali.
Taciana Davydzienka — fatohraf i vykładčyk. Jana pačała zajmacca valanterskaj pracaj 19 lutaha. Spačatku źbirała leki i medyčnyja materyjały.
Biełaruski aktyvist Aleś Marčanka pieradaŭ Tacianie Davidzienka 704 dalary, 10 eŭra i 65 hryvień, sabranych na dabračynnaj akcyi salidarnaści z ukraincami «My lubim ukrainski boršč», jakaja prajšła 9 vieraśnia ŭ siadzibie Partyi BNF. Valanterka ščyra padziakavała biełarusam i raspaviała niekalki słoŭ pra dziejnaść svajoj supołki:
«Kali pačałasia vajna, ja i maja siabroŭka, žonka biełaruskaha piśmieńnika Siarhieja Pryłuckaha Alena Ściepanienka, my zładzili razavuju akcyju — dabračynny viečar, na jakim paety čytali svaje vieršy. Tady było sabrana bolš za 5000 hryvień. My ź jašče niekalkimi dziaŭčatami vyrašyli pravodzić padobnyja akcyi rehularna. Častku srodkaŭ źbirajem praz takija akcyi, častku nam achviarujuć ludzi. Voś tolki ŭčora była na Forumie vydaŭcoŭ va Lvovie, razmaŭlała ź Siarhiejem Žadanam, jaki pieradaŭ 12000 hryvień. 1000 eŭra pieraličyŭ ź Niamieččyny Jury Andruchovič. Spačatku my źbirali tolki na paranienych, ale zrazumieła, što bintami vajnu nie vyhraješ, my źbirajem hrošy na ŭsio, što treba dla našych chłopcaŭ. Naš znajomy Andrej ź siabrami raźminoŭvajuć vyzvalenuju ziamlu ad terarystaŭ. Ciapier z prychodam vosieni časta patrebnyja ciopłyja rečy», — kaža Taciana Davidzienka.
Dziaŭčaty supołki źbirajucca patracić biełaruskija hrošy na leki i medyčnaje abstalavańnie dla paranienych. Pavodle Taciany, šmat paranienych u troch kijeŭskich špitalach, a taksama ŭ Dnieprapietroŭskim, u Lvoŭskim špitalach. Častka lekaŭ i srodkaŭ budzie pierasłana ŭ frantavyja špitali, dzie pracujuć medyki, jakich asabista viedaje Taciana.
U Fejsbuku stvorana admysłovaja supołka «Vajna i słova». Tam rehularna raźmiaščajecca prazrystaja spravazdača pra toje, kudy raschodujucca srodki. Jany iduć na ekipiroŭku sapioraŭ, na leki i medabstalavańnie dla paranienych, pobytavuju techniki, u jakoj majuć patrebu špitali (časta patrebnyja tyja ž prałki). Kuplajucca racyi, dalnamiery. Dla tych, chto choča zrabić achviaravańnie z-za miažy, jość mižnarodny rachunak.
Jašče 250 dalaraŭ, jakija byli sabranyja dla paranienych ukraincaŭ pa-za akcyjaj «My lubim ukrainski boršč» pieradadzienyja ŭ pradstaŭnictva «Valanterskaj sotni», jakaja miesicca ŭ Hałoŭnym vajskovym kliničnym špitali.
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu14
Kamientary