Kampanija «Havary praŭdu» nakiravała ŭ Ministerstva adukacyi šerah prapanoŭ

Namieśnik kiraŭnika hramadzianskaj kampanii «Havary praŭdu» Andrej Dźmitryjeŭ 7 kastryčnika sustreŭsia z namieśnikam ministra adukacyi Biełarusi Vadzimam Bohušam i pieradaŭ jamu šerah prapanoŭ pa palapšeńni adukacyjnaj śfiery.

Hetyja prapanovy byli vypracavany ŭ miežach kampanii «Narodny refierendum», adznačyŭ Andrej Dźmitryjeŭ. «My pravodzili hramadskija słuchańni pa prablemach adukacyi, paśla čaho padrychtavali šerah rekamiendacyj, ź jakimi i aznajomili čynoŭnikaŭ Minadukacyi», — skazaŭ jon.

Sustreča z namieśnikam ministra adukacyi doŭžyłasia kala hadziny. Dźmitryjeŭ pastaviŭ pierad čynoŭnikam pytańnie: «Čamu nie realizujecca šerah dobrych inicyjatyŭ u adukacyjnaj śfiery, ab jakich pradstaŭniki ŭłady pastajanna havorać»? «Nie mianiajecca sistema školnaj adukacyi, zastajucca pabory ŭ škołach, jakaść adukacyi paharšajecca i, samaje hałoŭnaje, vyšejšaja adukacyja nie rychtuje dziaciej da rynku pracy. Heta adstały padychod da adukacyi, a ŭsie źmianieńni — drobnyja, taktyčnyja, nie viaduć da sapraŭdnych pazityŭnych pieramien», — ličyć palityk.

«Čynoŭniki havorać, što baćkoŭskija kamitety źbirajuć hrošy i kładuć ich na śpiecyjalnyja rachunki, — skazaŭ Dźmitryjeŭ. — Ale ž heta niapraŭda. Čamu, da prykładu, nie adkryć publičnyja rachunki samoj škoły. Ludzi nie mohuć zrazumieć, čamu jany pavinny dapłačvać, za što?»

Akramia hetaha, Ministerstvu adukacyi było prapanavana inicyjavać pavieličeńnie raschodaŭ na adukacyju, bo «ludzi hatovy płacić bolš padatkaŭ na adukacyju, kali buduć razumieć, na što kankretna jany buduć traicca i jak heta paŭpłyvaje na jakaść adukacyi ŭ Biełarusi».

U kampanii «Havary praŭdu» ličać, što adkaznaść za adukacyjnuju palityku, jakaja siońnia pa profilnym zakonie lažyć na prezidencie, treba pieradać parłamientu, «jak heta robicca ŭ narmalnych krainach».

Dźmitryjeŭ taksama pieradaŭ kankretnyja rašeńni, źviazanyja «z daškolnymi ŭstanovami, škołami, ich bolšaj prazrystaściu, razumieńniem, jak farmirujucca biudžety škoł, kudy jany traciacca».

«Heta byŭ žyvy dyjałoh, namieśnik ministra dzieści apaniravaŭ, z čymści zhadžaŭsia, — padkreśliŭ Dźmitryjeŭ. — Jak akazałasia, my adnolkava bačym, što ŭ Biełarusi adsutničaje sistema bieśpierapynnaj adukacyi. Pavinna być tak, kab dziciačy sadok rychtavaŭ dzicia da škoły, škoła — da VNU, VNU — da prafiesii. U nas u Biełarusi na kožnym z hetych etapaŭ adbyvajecca niejkaja asiečka: dziciačyja sadki nie rychtujuć dziaciej da škoły, škoła biez dadatkovych zaniatkaŭ nie ŭ stanie padrychtavać dzicia da pastupleńnia ŭ VNU. A pra ŭzrovień navučańnia ŭ VNU my ŭsie viedajem — u pieršy pracoŭny dzień paśla ŭniviersiteta nam kažuć, maŭlaŭ, zabudźcie ŭsio, čamu vas navučyli, ciapier budziem vučycca zanava».

Baki damovilisia, što «Havary praŭdu» dadatkova vyšle ŭ Minadukacyi pašyranuju viersiju rekamiendacyj.

Dźmitryjeŭ taksama raskazaŭ, što ŭ najbližejšy čas jon płanuje sustrecca sa staršynioj pastajannaj kamisii Pałaty pradstaŭnikoŭ Nacyjanalnaha schodu pa adukacyi, kultury i navucy Hienadziem Palčykam. «Na sustrečy z parłamientaryjem my chočam damovicca, kab pravieści sioleta jašče adny parłamienckija słuchańni nakont reformy adukacyi, tolki na hety raz — adkrytyja, dzie kožny zmoža vystupić», — skazaŭ palityk.

• 0
• 0
• 0
• 0
• 0
• 0
• 0
• 0