U bližejšy čas buduć raspracavany prapanovy pa razhruzcy nastaŭnikaŭ ad lišniaj raboty, paviedamiŭ vice-premjer Biełarusi Anatol Tozik.
«Zakančvaje rabotu hrupa pa kompleksnym vyvučeńni stanu spraŭ u sistemie adukacyi. Abmiarkoŭvałasia ŭ tym liku prablema pa pierahruzcy nastaŭnikaŭ niepatrebnymi funkcyjami. U bližejšy čas my vyznačymsia, jakuju dakumientacyju i tolki pavinien vieści nastaŭnik, jakuju — kłasny kiraŭnik i administracyja škoły. Funkcyi, jakija nie pavinien vykonvać nastaŭnik, pavinny vykonvać adpaviednyja dziaržaŭnyja orhany. Kali kožny pačnie zajmacca svajoj spravaj, budzie paradak», — skazaŭ vice-premjer.
Adkazvajučy na pytańnie ab raspracoŭcy sistemy mier pa vykaranieńni ŭtrymanstva i darmajedstva, Anatol Tozik adznačyŭ, što heta tema patrabuje vielmi daskanałaha vyvučeńnia.
«Učora na naradzie ŭ prezidenta pytańnie było akreślena pryncypova: my pavinny maksimalnuju kolkaść ludziej uciahnuć, jak kazali raniej, u hramadska karysnuju pracu. Nichto nie pavinien karystacca dabrotami za košt inšych, tamu što dziaržaŭny biudžet nie biazdonny — kolki my tudy nasyplem, stolki adtul i vysyplem. I, kali čałaviek pa svaim fizičnym stanie moža pracavać, jon pavinien pracavać, nichto za jaho napaŭniać dziaržbiudžet nie budzie», — padkreśliŭ namieśnik premjer-ministra.
Kryteryi, pa jakich hramadzianie buduć traplać u katehoryju «darmajed», pakul nie raspracavany.
«Prezident pastaviŭ zadaču da kanca hoda razabracca i stvaryć miechanizm, pry jakim usie pracazdolnyja ludzi prymali b udzieł u stvareńni materyjalnych dabrot i ŭ budaŭnictvie našaj rodnaj dziaržavy», — dadaŭ Anatol Tozik.
Ciapier čytajuć
Što Babaryka i Kaleśnikava adkazali na pytańni pra vajnu97
Kamientary